ඇමරිකානු ඩොලර් බිලියන 42.1ක් වන දේශීය ණය ප්රමාණයෙන් ප්රතිව්යූහගතකරණයට අදාළ කර ගැනෙන්නේ බිලියන 19.8ක ප්රමාණයක් බව ආර්ථික කටයුතු පිළිබඳ ජනාධිපති ජ්යෙෂ්ඨ උපදේශක ආචාර්ය ආර්.එච්.එස්. සමරතුංග මහතා කියයි.
ආචාර්ය ආර්.එච්.එස්. සමරතුංග මහතා වැඩිදුරටත් මෙසේද පැවසීය.
ජාත්යන්තර මූල්ය අරමුදලේ සහාය ගැනීමට රජය තීරණය කිරීමත් සමග ඒ සඳහා අප පසුගිය වසරේ සැප්තැම්බර් මාසයේදී මාණ්ඩලික මට්ටමේ එකඟතාවකට පැමිණියා. නමුත් ශ්රී ලංකාවේ ණය තිරසරභාවය ඇති කරගන්නාතුරු එම යෝජනාව ක්රියාත්මක කළ නොහැකි බව ජාත්යන්තර මූල්ය අරමුදල සඳහන් කර සිටියා.
ඒ අනුව සැප්තැම්බර් මාසයේ 01 වනදා සිට මාර්තු 20 වනදා වන තුරු රජය සහ ජාත්යන්තර ණයකරුවන් අතර දීර්ඝ සාකච්ඡාවක් පැවැත්වුණා. එහි මූලික අරමුණ වුණේ මූල්යකරණ සහතිකයක් එම ණයකරුවන්ගෙන් ලබා ගැනීමයි. අපට එය සම්පූර්ණ කළ හැකි වුණේ මාර්තු මාසයේ දෙවන සතියේයි. ඒ අනුව මාර්තු 20 වැනිදා වන විට ජාත්යන්තර මූල්ය අරමුදල විසින් අපේ ඉල්ලීම පිළිගැනීමට සහ ඉදිරි කටයුතු කිරීමට එකඟත්වය පළ කරනු ලැබුවා.
වසර 04ක වැඩසටහනක් ලෙස මෙය ක්රියාත්මක වන්නේ. එහි ප්රධාන අංග 05ක් තිබෙනවා. පළමුවැනි එක තමයි ආදායම් පාදක රාජ්ය මූල්ය ඒකාබද්ධකරණයක් සිදු කළ යුතුයි කියන එක. 2020- 2021 වසරවල මෙරට දළ දේශීය නිෂ්පාදිතය සියයට 8ක් දක්වා පහත වැටී තිබුණා. එම තත්ත්වය ඉහළ නංවා ගැනීම සහ තවත් කරුණු ඊට ඇතුළත් වෙනවා.
දෙවැනි කාරණය තමයි ණය ප්රතිව්යූහගතකරණය. ශ්රී ලංකාවේ ණය තිරසරභාවයක් නැහැ කියන එක ජාත්යන්තර මූල්ය අරමුදල බොහෝ කලකට පෙර ප්රකාශ කළා. තුන්වැනි කාරණය මිල ස්ථායිතාවයක් රටතුළ ගොඩ නගා ගැනීම. හතරවැන්න මූල්ය අංශයේ ස්ථාවරභාවය ආරක්ෂා කර ගැනීමයි. පස්වැනි කරුණ වශයෙන් දූෂණ විරෝධී ක්රියා පිළිවෙතකට රජය ප්රවේශ විය යුතුයි යන්නයි. මේ ඉලක්ක සපුරා ගැනීම සඳහා අප ව්යූහාත්මක ප්රතිසංස්කරණ සිදු කළ යුතුයි.
මේවායින් ණය ප්රතිව්යූහගතකරණය හැර අනෙකුත් කාරණා සම්බන්ධයෙන් රාජ්ය ප්රතිපත්ති දැනටමත් ක්රියාත්මක කර තිබෙනවා.
අද අප කතා කරන දේශීය ණය ප්රමාණය ඇමරිකානු ඩොලර් බිලියන 42.1 යි. එයිනුත් ප්රතිව්යූහගතකරණයට අදාළ කර ගන්නේ බිලියන 19.8ක ප්රමාණයක්. එයට ශ්රී ලංකා මහ බැංකුව, වාණිජ බැංකු සහ අනෙකුත් බැංකු, සේවක අර්ථ සාධක අරමුදල සහ රජයට ණය සපයා ඇති වෙනත් ආයතන 04ක් ඇතුළත් වෙනවා.
මේ ආයතන අතරේ ණය ප්රතිව්යූහගතකරණය විවිධාකාරයට සිදු වුවත් කිසියම් ආකාරයක මිශ්රිත වැඩපිළිවෙළක් ඔස්සේ යම්කිසි සහන ප්රමාණයක් රජයට ලබා ගැනීම එහි අවසන් ප්රතිඵලය විය යුතු බව අපේක්ෂා කරනවා.
