ඖෂධ 47ක් ඉන්දියානු ඒකාධිකාරය යටතේ මෙරටට ගෙන්වීම සඳහා රමේෂ් පතිරණ අමාත්‍යවරයා අමාත්‍ය මණ්ඩල පත්‍රිකාවක් ඉදිරිපත් කර ඇති බවට සෞඛ්‍ය වෘත්තීයවේදීන්ගේ විද්වත් සංගමය චෝදනා කරයි.

එහි සභාපති රවී කුමුදේශ් මහතා මේ බව ප්‍රකාශ කළේ, ඊයේ  (25) විශේෂ මාධ්‍ය හමුවක් කැඳවමිනි.

මේ හරහා ඖෂධ පිළිබඳව ඉන්දියානු ඒකාධිකාරයක් ගොඩනැංවීම ශ්‍රී ලංකාවේ සෞඛ්‍ය සේවාවට සහ පුරවැසියන්ට වාසි සහගත වන්නේ කෙසේ දැයි අමාත්‍යවරයා පැහැදිලි කළ යුතු බවට ඔහු අවධාරණය කළේය.

මේ දක්වා රට තුළ ඖෂධයක් ලියාපදිංචි වීම සඳහා යුරෝපීය හෝ අමෙරිකානු තත්ත්වය අත්‍යවශ්‍ය වූඅ අතර ඉන්දියානු තත්ත්වයේ ඖෂධ සඳහා ලියාපදිංචියට අවසර ලබා දී තිබුණේ නැත.

නමුත් මෙම අමාත්‍ය මණ්ඩල පත්‍රිකාවට අනුව ඉන්දියානු තත්ත්වය වුවද සලකා බැලිය හැකිය.

ඒ අනුව ලංකාවේ ඖෂධ තත්ත්ව ප්‍රමිතිය පිළිබඳව ප්‍රතිපත්තිය කවුරුන් හෝ බාල කර ඇති බවට ද රවී කුමුදේශ් මහතා චෝදනා කරයි.

දේශීය නිෂ්පාදකයන් නිෂ්පාදනය කරනු ලබන ඖෂධ රැසක් ද මෙම ලේඛනයට ඇතුළත් කර ති‌බේ.

ඒ හරහා ඉන්දියානු සමාගම්වල මහා පරිමාණයේ තරගයට ලංකාවේ දේශීය නිෂ්පාදනකරුවන් යට කරමින් අතුගා දැමීම සිදු වනු ඇත.

එසේ සිදු කරන්නේ මෙතෙක් කලක් දේශීය නිෂ්පාදකයන් නගා සිටුවීම රටක් ලෙස අප නාස්ති කළ මුදලට වගකියන්නේ කවුරුන් දැයි ඒ මහතා ප්‍රශ්න කරයි.

“දේශීය සැපයුම්කරුවන් විසින් ඉල්ලා ඇති ලියාපදිංචි විය ඖෂධ නියාමන අධිකාරිය හරහා අවහිර කරමින්, ඉන්දියාවෙන් ලියාපදිංචි නොවූ ඖෂධ ගෙන්වීම හරහා නැවත වතාවක් ඖෂධ පිළිබඳව තත්ත්වය බාල්දු නොවන බව මහජනතාවට තහවුරු කරන්නේ කවුද.?

ඉන්දියානු සවරයිට් සමාගම සමඟ හිටපු සෞඛ්‍ය ඇමතිවරයා ගිවිසුම් ගත වූ ගිවිසුම හරහා සිදුවූ විපත, ඒ හා සමාන ස්වරූපයෙන් පෙනෙන මෙම ගිවිසුම හරහා සිදු නොවන්නේ යැයි කිව හැක්කේ කෙසේද?

ඖෂධ පිළිබඳ ප්‍රතිපත්තිමය තීරණ තවදුරටත් මහජනතාවට රහසක් බවට පත් නොකොට මෙම තීරණ පිළිබඳව ප්‍රසිද්ධියේ පැහැදිලි කරන ලෙස අප පතිරණ අමාත්‍යවරයාගෙන් ඉල්ලා සිටිනවා.”

අත්‍යවශ්‍ය ඖෂධ හදිසි පදනම යටතේ මිලදී ගැනීම සඳහා ඉන්දියාවේ සෞඛ්‍ය අමාත්‍යාංශය සමඟ අවබෝධතා ගිවිසුමක් අත්සන් කිරීමට සැලැසුම් කර තිබෙන අත්‍ර ඊට අදාළ අනුමැතිය ඉල්ලා සෞඛ්‍ය අමාත්‍ය රමේෂ් පතිරණ මහතා කැබිනට් පත්‍රිකාවක් යොමු කර ඇති බව සඳහන්ය.

ජුලි මස 23 වැනිදා අමාත්‍ය මණ්ඩල පත්‍රයක් යොමු කරමින් ඔහු අවධාරණය කළේ ශ්‍රී ලංකාව තුළ දැනට ඖෂධ වර්ග 862ක් පවතින බවය.

ඉන් 14ක් අත්‍යවශ්‍ය ඖෂධ ලෙස වර්ග කර ඇති අතර ඖෂධ 474ක් අත්‍යවශ්‍ය ඖෂධ කාණ්ඩයට අයත් විය.

වර්ග 160ක් අත්‍යවශ්‍ය නොවන ඖෂධ බව සඳහන්ය.

සෙසු 214 ඖෂධ සමාගම් මගින් ලබාදෙන සහ ‘ප්‍රචාරක’ ඖෂධ ලෙස වර්ග කර තිබුණි.

කැබිනට් සංදේශයට අනුව සෞඛ්‍ය සේවා පවත්වාගෙන යෑම සඳහා වෛද්‍ය සැපයුම් අංශයට අවශ්‍ය ඖෂධවලින් 90% ක්ම සපයනු ලබන්නේ රාජ්‍ය ඖෂධ නීතිගත සංස්ථාව විසිනි.