Connect with us

පුවත්

නිකන් දුන්න ඉන්දීය බඩු බෙදන්න කෝටි 20ක් ගෙවලා!

Published

on

ඉන්දිය රජයෙන් පරිත්‍යාග ලෙස ලැබුණු සහල්, අත්‍යවශ්‍ය ආහාර හා ඖෂධ රටපුරා බෙදාහැරීමේදී රුපියල් කෝටි විස්සකට ආසන්න මුදලක් ආහාර කොමසාරිස් දෙපාර්තමේන්තුව වැඩිපුර වැයකරමින් ඇති බවට එක්සත් සහල් නිෂ්පාදකයන්ගේ සංගමයේ සභාපති මුදිත් පෙරේරා මහතා චෝදනා කරයි.

ඒ අනුව සහල් කිලෝ ග්‍රෑමයක් ප්‍රවාහනයට අය කරනු ලබන සම්මත මිල ගණන් අභිභවා කිලෝ ග්‍රෑමයකට වැඩිපුර රුපියල් පහක් හෝ හයක් ගෙවා ඇති බව ඔහු පවසයි.

දැනට ප්‍රවාහනය කළ සහල් සඳහා කෝටි අටහමාරකට අධික මුදලක්ද ගෙවා ඇත.

ජුනි මාසයේදී ඉන්දියන් රජයෙන් අවස්ථා දෙකකදී ලැබුණු සහල් මෙට්‍රික් ටොන් හතළිස්දහසක්, කිරිපිටි මෙට්‍රික් ටොන් හාරසිය පනහක්, ඖෂධ මෙට්‍රික් ටොන් 4.6ක් දිස්ත්‍රික්ක 25 සඳහා බෙදාහැරීමට ජුනි 15 දින ටෙන්ඩර් කැඳවා ඇත.

ඊට කොන්ත්‍රාත්කරුවන් ලෙස තිදෙනකු ඉදිරිපත් වී ඇතත් ඉන් අයෙක් ටොන් එකක් කිලෝ මීටරයක් දුර ප්‍රවාහනයට රුපියල් 50ක මුදලක් ඉදිරිපත් කර තිබූ නිසා ඔහු ඉවත් කර කිලෝ මීටරයක් සඳහා ටොන් එකකට රුපියල් තිස්පහක මුදලක් ඉදිරිපත් කර තිබූ ඉතිරි දෙදෙනා තෝරාගෙන තිබේ.

එම ආයතන දෙක ප්‍රවාහන ආයතන නොවන අතර ඒවා සහල් මෝල් බවත්, ඉන් එක මෝලකට ටොන් 20 එක් ලොරියක්ද, අනෙක් මෝලට ටොන් දහයට අඩු ලොරි රථ පමණක් ඇති බවත් හෙළි වී ඇතැයි මුදිත් පෙරේරා මහතා කියා සිටී.

සතොස හා සමුපකාර සමිති සතුව රටපුරා ලොරි රථ තිබියදී දිස්ත්‍රික්ක අනුව වෙන වෙනම හෝ කඳුකර හෝ තැනිතලා මාර්ග පදනම අතහැර පවතින මිලට වඩා දෙගුණයකට ආසන්න මුදලක් යටතේ ටෙන්ඩරය පිරිනමා ඇති බවද හෙතෙම පවසයි.

දිස්ත්‍රික් ලේකම්වරුන් ගොවීන්ගෙන් මිලදී ගත් වී සහල් කර ප්‍රවාහනයට හා මේ දිනවල පොහොර ප්‍රවාහනයට කිලෝමීටරයක් දුර සඳහා කිලෝග්‍රෑමයක රුපියල් 6 – 8 අතර මුදලක් ගෙවයි.

කොළඹ හතරවන හරස් වීදියේ සිට ටොන් විස්සේ ලොරියක් අම්පාර, පොළොන්නරුව වැනි ප්‍රදේශවලට සහල් කිලෝග්‍රෑමයක් ප්‍රවාහනයට රුපියල් 5ත් 7ත් අතර මුදලක් අයකරන බව මුදිත් පෙරේරා පවසයි.

කෙසේ වෙතත් ආහාර කොමසාරිස් දෙපාර්තමේන්තුව අම්පාරට සහනාධාර සහල් ප්‍රවාහනය කළ ලොරියට රුපියල් දෙලක්ෂ හතළිස් දහසකට ආසන්න මුදලක් ගෙවා ඇති බව සභාපතිවරයා සඳහන් කළේය.

පුවත්

ලියනගේ මුල්ලේදී කතක් අභිරහස් ලෙස මරාදාලා!

Published

on

By

රාත්‍රී සමාජ ශාලාවක ඇති වූ ගැටළුවක් මුල් කර ගනිමින් හට ගත් ආරවුලක් දුර දිග යාමෙන් කටුනායක නිදහස් වෙළෙඳ කළාපයේ සේවයේ නියුතු සේවිකාවක අද (28) දින අලුයම සීදුව ලියනගෙමුල්ල ප්‍රදේශයේ දී මරා දමා තිබේ.

36 හැවිරිදි එක් දරු මවක වන බටහිර බටුවත්ත නෙළුව, ගාල්ල යන ලිපිනයෙහි පදිංචි උස්ගොඩ මානගේ තිසාරා මධුවන්ති නැමැති කාන්තාව මෙසේ මරා දමා තිබේ.

ඇය මීට වසර 06 කට පමණ පෙර කටුනායක නිදහස් වෙළෙඳ කළාපයේ සේවය සදහා පැමිණ තිබූ අතර පසුව ඇය සීදුව සංචාරක හෝටලයක සේවය කරන පුද්ගලයෙකු සමග සීදුව , ලියනගෙමුල්ල , ජූඩ් මාවත ප්‍රදේශයේ නේවාසිකාගාරයක තාවකාලිකව පදිංචි වී සිට තිබේ.

ඇය රාත්‍රී සමාජ ශාලාවක සිදු වූ සිදු වීමක් මුල් කර ගෙන මෙම පුද්ගලයා සමග ආරවුලක් ඇති කර ගෙන ඇති අතර අද (28) දින අලුයම 02.00 ත් 03.00 ත් අතර කාළයේ ඇය සහ එම පුද්ගලයා සාන්ත සෙබස්තියන් දේවස්ථානයේ ඉදිරිපිටින් ගමන් කරන ආරක්ෂිත කැමරා දර්ශන සීදුව පොලිසිය විසින් සොයා ගෙන තිබේ.

ඒ අනුව මෙම දේවස්ථානය ඉදිරිපිට මාර්ගය අසළ දරුණු කැපුම් තුවාල සහිතව ඇය මරා දමා තිබුණි.

මීගමුව වැඩබලන මහේස්ත්‍රාත් ඉන්දික සිල්වා මෙම ස්ථානයට පැමිණ ස්ථානීය පරීක්ෂාව සිදු කළ අතර ඇයගේ සිරුර අධිකරණ වෛද්‍ය පරීක්ෂණය සදහා මීගමුව මහ රෝහල වෙත යොමු කර තිබේ.

Continue Reading

පුවත්

ජාතික ජන බලවේගය ශ්‍රේෂ්ඨාධිකරණයට

Published

on

By

ඉදිරි මැතිවරණ සමයේ  ආණ්ඩු පක්ෂයේ දේශපාලන පක්ෂවලට වාසි සහගත වන ආකාරයේ ව්‍යාපෘතීන් ක්‍රියාත්මක කිරීම සඳහා අනුමැතිය නොදෙන ලෙසත් මෙම කරුණට අදාළව මැතිවරණ කොමිෂන් සභාව විසින් නිකුත් කර ඇති ලිපියට අනුකූලව කටයුතු කරන ලෙසත් ජනාධිපති ලේකම් ඇතුළු පිරිසකට නියෝග නිකුත් කරන්නැයි ඉල්ලා ශ්‍රේෂ්ඨාධිකරණය හමුවේ මූලික අයිතිවාසිකම් පෙත්සමක් ගොනුකර තිබේ.

ජාතික ජන බලවේගයේ කඩුවෙල හිටපු නාගරික මන්ත්‍රී අසිත නිරෝෂන් මහතා විසින් පෙත්සම ඉදිරිපත් කළේය.

එහි වගඋත්තරකරුවන් ලෙස නීතිපතිවරයා, අග්‍රාමාත්‍යවරයා ඇතුළු අමාත්‍ය මණ්ඩල සාමාජිකයින්, ජනාධිපති ලේකම්වරයා, මුදල් අමාත්‍යාංශයේ ලේකම්වරයා ඇතුළු පිරිසක් නම්කර තිබේ.

මුදල් අමාත්‍යංශයේ ලේකම්වරයා විසින් 2024 අයවැය යෝජනා යනුවෙන් චක්‍රලේඛයක් නිකුත් කර ඇති අතර ඒ යටතේ ග්‍රාමීය ප්‍රදේශවල සංවර්ධන ව්‍යාපෘති ක්‍රියාත්මක කිරීමට යෝජනා කර ඇතැයි පෙන්වා දෙන පෙත්සම්කරු ඊට අමතරව “කඳුකර දශකය” නමින් තවත් චක්‍රලේඛයක් නිකුත් කරමින් ග්‍රාමීය ප්‍රදේශවල ජනතාවගේ ජීවන තත්ත්වය උසස් කිරීම සඳහා මූල්‍ය පහසුකම් ලබා දීමට යෝජනා කර ඇති බවත් සඳහන් කළේය.

මෙම ව්‍යාපෘති 2කම මෙම වසරේ ජූලි 31 වනදා වනවිට අවසන් කළ යුතු බවට ද නිවේදනය කර ඇති බවත් මෙම ව්‍යාපෘතී ඉටුකිරීම සඳහා ප්‍රජා කමිටුවලට මිලියන 10 බැගින් මුදල් වෙන්කිරීමටද තීරණය කර ඇති බවත් පෙත්සමේ සඳහන් වෙයි.

පළාත් පාලන ඡන්ද විමසීම සඳහා නාමයෝජනා බාරදුන් අපේක්ෂකයින් මෙම ප්‍රජා කමිටුවල කටයුතු කරන බවත් මෙම ව්‍යාපෘති හරහා ඔවුන්ට දේශපාලනික වශයෙන් වාසි ලබාගැනීමට අවස්ථාව ලැබෙන බවත් පෙත්සමේ පෙන්වා දී තිබේ.

එම නිසා එවැනි අපේක්ෂකයින්ට රාජ්‍ය ප්‍රතිපාදන වෙන්කිරීමට පියවර නොගන්නා ලෙස රාජ්‍ය ආයතන සහ ඒවායේ ප්‍රධානීන් දැනුවත් කරන්නැයි දන්වා මැතිවරණ කොමිසමේ සභාපතිවරයා විසින් ජනාධිපති ලේකම්වරයා වෙත ඉකුත්දා ලිපියක් යොමුකර තිබෙන බවත් පෙත්සම්කරු සඳහන් කරයි.

ඉදිරියේදී පැවැත්වීමට නියමිත ජනාධිපතිවරණයේදී හා පළාත් පාලන ඡන්ද විමසීමේදී දේශපාලන වාසියක් ලබාගැනීමේ අරමුණින් එම ව්‍යාපෘති ක්‍රියාත්මක කෙරෙන බවත් ඒ තුළින් සිය මූලික මිනිස් අයිතීන් උල්ලංඝනයවීමක් සිදුවන බවට තීන්දුවක් ලබාදෙන ලෙසත් පෙත්සම්කරු ශ්‍රේෂ්ඨාධිකරණයෙන් ඉල්ලා  සිටියි.

Continue Reading

පුවත්

අමුණුගම දිලිත්ව හැර යයි

Published

on

By

දිලිත් ජයවීර මහතාගේ මව්බිම ජනතා පක්ෂයෙන් ආචාර්ය සරත් අමුණුගම මහතා ඉල්ලා අස්වී තිබේ.

අදාළ ඉල්ලා අස්වීමේ ලිපිය ඊයේ (27) භාර දුන් බව සඳහන්ය.

ආචාර්ය සරත් අමුණුගම මහතා මව්බිම ජනතා පක්ෂයේ සභාපති ධුරය හෙබවූයේය.

‘එක්ව නංවන රටක් – සතුටු පිරුණු දැයක්’ තේමා කරගනිමින් දේශපාලන පක්ෂ කිහිපයක් සහ සිවිල් සංවිධාන කිහිපයක් එක්වී ‘සර්ව ජන බලය’ නමින් නව දේශපාලන ව්‍යාපාරයක් ඊයේ (27) පිහිටුවනු ලැබූ අතර ඒ සඳහා මව්බිම ජනතා පක්ෂය ඇතුළු පක්ෂ කිහිපයක්ම එක්විය.

සබැඳි පුවත්:

Continue Reading
Advertisement

Trending

Copyright © 2023 Sri Lanka Mirror. All Rights Reserved