පසුගිය සැප්තැම්බර් 21 දින සිඩ්නි සිට කොළඹ බලා පියාසර කරමින් තිබූ ගුවන්යානයේ හටගත් සිදුවීමක් සම්බන්ධයෙන් එහි ගුවන් නියමුවරයා සේවයෙන් ඉවත් කර ඇති බවට ශ්‍රී ලංකන් ගුවන් සේවය නිවේදනයක් නිකුත් කර තිබේ.
අදාළ ගුවන් යානය පියාසර කරන අවස්ථාවේදී ගුවන් නියමුවරයා සහ සහය ගුවන් නියමුවරියක් අතර හටගත් ආරවුලක් මෙම සිදුවීමට හේතු වී ඇති බව වාර්තා වේ.
UL607 අංක දරණ එම ගුවන් යානය ගමන් කරමින් තිබියදී සහය නියමුවරිය වැසිකිළිය වෙත යෑම සඳහා කෙටි විවේකයක් ගෙන ඇති අතර, ඇයට නැවත ගුවන් යානයේ නියමු කුටියට (cockpit) පිවිසිය නොහැකි පරිද්දෙන් එය අගුලු දමා වැසීමට අදාළ ගුවන් නියමුවරයා කටයුතු කර තිබේ.
ගුවන් නියමුවරිය නැවත පැමිණියත් එම අවස්ථාවේදී ගුවන් නියමුවරයා නියමු කුටියේ දොර විවෘත කිරීමට ප්‍රතික්ෂේප කර ඇති අතර එහිදී යානයේ සිටි මගීන් සහ කාර්ය මණ්ඩල සාමාජිකයින් අතට උණුසුම් තත්වයක් හට ගෙන ඇති බවද වාර්තා වේ.
ජාත්‍යන්තර සිවිල් ගුවන් සේවා සංවිධානයේ රෙගුලාසි වලට අනුව ගුවන් යානයක් ගමන් කරන සෑම අවස්ථාවකම නියමු කුටියේ අවම වශයෙන් දෙදෙනෙකු සිටිය යුතු වේ.
කෙසේවෙතත්, මේ සම්බන්ධයෙන් නිවේදනයක් නිකුත් කරමින් ශ්‍රීලංකන් ගුවන්සේවය සඳහන් කළේ මගී ආරක්ෂාව සහතික කිරීම සහ සියලු නියාමන අවශ්‍යතා සමඟ අනුකූලව කටයුතු කිරීම ශ්‍රීලංකන් ගුවන්සේවයේ ප්‍රමුඛ කාර්යයක් බවය.
ඒ අනුව, ශ්‍රීලංකන් ගුවන්සේවය අදාළ බලධාරීන් සමඟ පූර්ණ සහයෝගයෙන් කටයුතු කරන බවත් විමර්ශන වාර්තාව ලැබෙන තෙක් එහි ගුවන් නියමුවා (Captain) සේවයෙන් ඉවත්කර ඇති බවත් එම නිවේදනයේ වැඩිදුරටත් සඳහන්ය.
