Connect with us

පුවත්

නිර‌ෝෂා නිශාන්ති ඇපමත මුදාහරියි

Published

on

ඉහළ පොලියක් දෙන බව සඳහන් කරමින් ගාල්ල හා ඒ අවට පදිංචි පුද්ගලයන් විශාල පිරිසක් රවටා රුපියල් කෝටි ගණනක මුදලක් වංචා කර සැඟව සිටියදී අත්අඩංගුවට ගත් නිරෝෂා නිශාන්ති නැමැති කාන්තාව ගාල්ල මහේස්ත්‍රාත් අධිකරණයට ඉදිරිපත් කිරීමෙන් අනතුරුව රුපියල් ලක්ෂ 500ක ශරීර ඇපයක් මත මුදාහරනු ලැබීය.

 මේ කාන්තාව ප්‍රතිඅපනයනය කරන මුවාවෙන් මිල අධික විදෙස් මත්පැන් මෙරටට ගෙන්වා බෙදා හැරීමේ ජාවාරමක නිරතව සිට ඇති බවට ද තොරතුරු රැසක් අපරාධ පරීක්ෂණ දෙපාර්තමේන්තුවේ නීති විරෝධී වත්කම් විමර්ශන කොට්ඨාසයට ලැබී ඇතැයි පැවසේ.

ඒ සම්බන්ධයෙන් ද මේ වන විට විමර්ශනයක් ආරම්භ කර ඇති අතර, මෙම ජාවාරමට ඇයට දූෂිත රේගු නිලධාරීන්ගේ ද සහාය ලැබී ඇති බව හෙළිව තිබේ.

එසේ ඇයට සහාය දෙන එක් රේගු නිලධාරියකුව හඳුනාගෙන ඔහුගෙන් නීති විරෝධී වත්කම් විමර්ශන කොට්ඨාසයේ නිලධාරීන් ප්‍රශ්න කර තිබිණ. 

එහිදී ඔහු පවසා ඇත්තේ තමා ඇයට මුදල් දී වංචාවට හසුවී සිටින්නකු බවය. එහෙත් එම රේගු නිලධාරියා ඒ ගැන කිසිදු පොලිසියකට පැමිණිලි කර නැති බව විමර්ශනයේදී පෙනී ගොස් ඇත. 

එම රේගු නිලධාරියාත් ඇයත් අතර දුරකතන ඔස්සේ දිගින් දිගටම සම්බන්ධකම් තිබී ඇති බවද දුරකතන ජාල විශ්ලේෂණයකදී පෙනී ගොස් තිබේ.

මෙම කාන්තාව විසින් බොහෝ අයගෙන් මුදල් ගෙන ඇත්තේ විදෙස් මත්පැන් ගෙන්වා අලෙවි කිරීමේ ව්‍යාපාරයකට මුදල් ආයෝජනය කරන බව කියමිනි. 

විමර්ශනයේදී පෙනී ගොස් ඇත්තේ ඇය විසින් විදෙස් මත්පැන් කන්ටේනර් පිටින් මෙරටට ප්‍රතිඅපනයනය කිරීමේ මුවාවෙන් රැගෙනවිත් මෙම ජාවාරම කරගෙන ගොස් ඇති බවය. 

ප්‍රති නැව්ගත කිරීමේ මුවාවෙන් ගෙන්වන ලද විදෙස් මත්පැන් තොගයක් රේගුවේ සිරවීමක් හෝ රට තුළට ගෙන්වා ගැනීමට නොහැකි වීමක් හේතුවෙන් ඇයට ගනුදෙනුකරුවන්ට මුදල් දීමට නොහැකිව සිරවී ඇති බව ද විමර්ශනයේදී පෙනී ගොස් තිබේ. 

රුපියල් කෝටියකට වැඩි මුදල් ඇයට දුන් පුද්ගලයන් ද සිටින බව විමර්ශනයේදී පෙනී ගොස් තිබේ.

මාලදිවයිනට ප්‍රතිඅපනයනය කරන මුවාවෙන් යුරෝපීය රටවලින් මිල අධික මත්පැන් ගෙන්වා රට අභ්‍යන්තරයේ ඇති ගුදම්වල එම කන්ටේනර් තබා එහි ඇති රේගු මුද්‍රා කඩා එහි ඇති මත්පැන් ඉවත් කර ඒ වෙනුවට ජල බෝතල් පුරවා නැවත රේගුවේ මුද්‍රා හොරට තබා එම කන්ටේනර් මාලදිවයිනට නැව්ගත කිරීමේ ජාවාරමක් ද පසුගිය කාලයේ සිදුව තිබිණි.

එම ජාවාරම අනාවරණය කර ගැනීමට පොලිසියටත් රේගුවටත් හැකි විය. 

මෙම කාන්තාවත් මෙවැනි ජාවාරමක් කරගෙන ගොස් ඇතැයි සැක කරන බවත් ඒ සම්බන්ධයෙන් පුළුල් විමර්ශනයක් පැවැත්වෙන බවත් නීති විරෝධී වත්කම් විමර්ශන කොට්ඨාසය සඳහන් කරයි.

පසුගිය 21 වැනිදා මේ කාන්තාව නීති විරෝධී වත්කම් විමර්ශන කොට්ඨාසයේ නිලධාරීන් විසින් අත්අඩංගුවට ගනු ලැබුවේ මුදල් වංචා කරමින් නීති විරෝධිව වත්කම් රැස් කිරීම සම්බන්ධයෙනි.

පුවත්

රුසියාවට සෙබළු යැවූ අයෙක් දෙහිවලදී අත්අඩංගුවට

Published

on

By

විශ්‍රාමලත් ත්‍රිවිධ හමුදා සෙබළු සංචාරක වීසා මත රුසියාව සහ යුක්රේනය වෙත රැගෙන ගොස් කුලී හේවායන් ලෙස යෙදවීමේ මිනිස් ජාවාරමට සම්බන්ධ තවත් පුද්ගලයකු දෙහිවල ප්‍රදේශයේදී ඊයේ (මැයි 20) අත්අඩංගුවට ගත් බව පොලිසිය නිවේදනය කළේ ය.

මේ සම්බන්ධයෙන් සැකපිට අත්අඩංගුවට ගත් පුද්ගලයා සංචාරක වීසා මත රුසියාවට පුද්ගලයන් 120 දෙනෙකු පමණ යැවූ බවට තොරතුරු අනාවරණය වී ඇති බවත් ඒ අනුව ඊට සැකපිට අදාළ පුද්ගලයා මෙලෙස අත්අඩංගුවට ගෙන ඇති බවත් පොලිස් මාධ්‍ය කොට්ඨාසය සඳහන් කළේය.

සැකකාර පුද්ගලයා රුසියානු තානාපති කාර්යාලය ඉදිරිපිට සිට සංචාරක වීසා මත රුසියාව සඳහා යාමට පුද්ගලයන්ට ආධාර අනුබල දී ඇති බව විමර්ශනවලදී අනාවරණය වී ඇති අතර අපරාධ පරීක්ෂණ දෙපාර්තමේන්තුවේ “තැනැත්තන් වෙළෙඳාම සහ සමුද්‍රීය අපරාධ විමර්ශන අංශය” විසින් එම සැකකරු අත්අඩංගුවට ගන්නා ලදී.

අත්අඩංගුවට ගත් සැකකරුගෙන් වැඩිදුර ප්‍රශ්න කිරීමෙන් අනතුරුව අද දිනයේ (21) අධිකරණය වෙත ඉදිරිපත් කිරීමට නියමිත බව අපරාධ පරීක්ෂණ දෙපාර්තමේන්තුවේ ආරංචි මාර්ග සඳහන් කරයි.

අපරාධ පරීක්ෂණ දෙපාර්තමේන්තුවේ ජ්‍යෙෂ්ඨ නියෝජ්‍ය පොලිස්පති රොහාන් ප්‍රේමරත්න මහතාගේ උපදෙස් මත “තැනැත්තන් වෙළෙඳාම සහ සමුද්‍රීය අපරාධ විමර්ශන අංශයේ” අධ්‍යක්ෂ ජ්‍යෙෂ්ඨ පොලිස් අධිකාරි සමරකෝන් බණ්ඩා මහතාගේ අධීක්ෂණය යටතේ වැඩිදුර පරීක්ෂණ පවත්වන බව පොලිසිය පැවසීය.

Continue Reading

පුවත්

කළුතර වෙඩි තැබිමක්

Published

on

By

කළුතර, කටුකුරුන්ද ප්‍රදේශයේ ඊයේ (20) රාත්‍රීයේ සිදුවූ වෙඩිතැබීමකින් පුද්ගලයෙකු මියගොස් ඔහුගේ 08 හැවිරිදි දියණිය තුවා ලබා තිබේ.

කටුකුරුන්ද දුම්රිය පොළ පාර ප්‍රදේශයේ දී යතුරුපැදියකින් පැමිණි නාඳුනන පුද්ගලයින් දෙදෙනකු විසින් නිවසකට ඇතුළු වී එම වෙඩිතැබීම සිදුකර පළාගොස් ඇති බව පොලීසිය පවසයි.

මියගොස් ඇත්තේ 39 හැවිරිදි තස්මින් මදුවන්ත සිල්වා නමැති කටුකුරුන්ද ප්‍රදේශයේ පදිංචිව සිටි තිදරු පියෙකි.

පොලීසිය සඳහන් කලේ අදාළ පුද්ගලයා සිය නිවසේ දරු තිදෙනා සමඟ රාත්‍රි ආහාරය ලබා ගනිමින් සිටියදී යතුරුපැදියකින් පැමිණි පුද්ගලයින් දෙදෙනෙකු වෙඩිතබා පළාගොස් තිබෙන බවය.

ටී – 56 වර්ගයේ ගිනිඅවියකින් වෙඩිතැබීම සිදුකර ඇති බවට මෙතෙක් සිදුකළ මූලික පරීක්ෂණවලදී අනාවරණය වී ඇති අතර වෙඩිතැබීමට හේතුව මෙතෙක් තහවුරු වී නොමැත.

Continue Reading

පුවත්

වෙසක් සතිය ඇරැඹෙයි

Published

on

By

මෙවර වෙසක් මහෝත්සවය වෙනුවෙන් ප්‍රකාශයට පත් කර ඇති ජාතික වෙසක් සතිය අද (21) ආරම්භ වේ.

අද (21) සිට 27 වැනිදා දක්වා කාලය වෙසක් සතිය ලෙස ප්‍රකාශිත අතර මෙවර රාජ්‍ය වෙසක් උත්සවය මාතලේ ධර්මරාජ පිරිවෙන් විහාරස්ථානයේදී අති උත්කර්ෂවත් අන්දමින් පැවැත්වීමට සැලසුම් කර තිබේ.

ජාතික වෙසක් සතිය නිමිත්තෙන් සමාරම්ක උත්සවය අද (21) අගමැති දිනේෂ් ගුණවර්ධන මහතාගේ ප්‍රධානත්වයෙන් පැවැත්වීමට නියමිතය.

23 වැනි දින ජනාධිපති රනිල් වික්‍රමසිංහ මහතා ද වෙසක් සතිය නිමිත්තෙන් මාතලේ ධර්මරාජ පිරිවෙන් විහාරස්ථානයේ පැවැත්වෙන ජාතික මහෝත්සවයට එක්වීමට නියමිතය.

‘අත්තනො ව අවෙක්ඛෙය්‍ය කතානි අකතානි ච” (අනුන් කළ දේ නොව තමන් කළ දේ ගැන විමසිලිමත් වෙමු) යන තේමාවෙන් යුතුව මාතලේ දිස්ත්‍රික්කය කේන්ද්‍ර කර ගනිමින් රාජ්‍ය වෙසක් උත්සවය මෙවර පැවැත්වේ.

23 වැනි දින රාජ්‍ය උත්සවය පෙරවරු 9.30ට මාතලේ ධර්මරාජ පිරිවෙන් විහාරස්ථානයේදී ත්‍රෛනිකායික මහ නාහිමිවරුන් ප්‍රමුඛ, ජනාධිපති රනිල් වික්‍රමසිංහ මහතාගේ ප්‍රධානත්වයෙන් පැවැත්වෙන අතර මෙම වැඩසටහනේදී පූජා භූමි සන්නස් පත්‍ර ප්‍රදානය ද සිදුවේ. විදේශ දූත පිරිස් විසින් තිළිණ ප්‍රදානයක් ද මෙහිදී සිදු කෙරේ.

රාජ්‍ය වෙසක් උත්සව වැඩසටහන අද (21) පස්වරු 2.00ට ත්‍රෛනිකායික මහ නාහිමිවරුන්ගේ සහ අගමැති දිනේෂ් ගුණවර්ධන මහතාගේ ප්‍රධානත්වයෙන් පැවැත්වේ.

වෙසක් සමරු මුද්දරයක් නිකුත් කිරීම, විහාරස්ථාන සංවර්ධන ආධාර ප්‍රදානය, බුද්ධශාසන අරමුදලේ ආධාර ප්‍රදානය, දහම් පාසල් ප්‍රතිපාදන ලිපි ප්‍රදානය, සාමණේර ස්වාමීන් වහන්සේලා සඳහා සංකේතාත්මක පොත් කට්ටල ප්‍රදානය, බුදුපුත් මාපිය උපහාර චෙක්පත් ප්‍රදානය මෙහිදී සිදු කෙරේ.

මෙම අවස්ථාවන් සඳහා බුද්ධ ශාසන ආගමික හා සංස්කෘතික කටයුතු ඇමැති විදුර වික්‍රමනායක මහතා, මධ්‍යම පළාත් ආණ්ඩුකාරවරයා සහ මැති ඇමැතිවරු සහභාගි වෙති.

රාජ්‍ය වෙසක් උත්සවයට සමගාමීව මාතලේ දිස්ත්‍රික්කයේ ග්‍රාමීය බෞද්ධ විහාර 22ක් සංවර්ධනය සඳහා රුපියල් මිලියන 22ක් ද රාජ්‍ය වෙසක් උත්සවයට සමගාමීව වැඩසටහන් පැවැත්වෙන විහාරස්ථාන 05ක් සංවර්ධනය සඳහා රුපියල් මිලියන 2.6ක් ද ආපදාවට ලක්වූ විහාරස්ථාන 03ක් ප්‍රතිසංස්කරණය සඳහා රුපියල් මිලියන 0.4ක් ද දහම් පාසල් 12ක් සංවර්ධනය සඳහා රුපියල් මිලියන 5ක් ද බුද්ධශාසන අරමුදල යටතේ දුෂ්කර විහාරස්ථාන 32ක් සඳහා සනීපාරක්ෂක පහසුකම් සැපයීම සඳහා රුපියල් මිලියන 32ක් ද වෙන් කර තිබේ. මෙම සම්පූර්ණ ප්‍රතිපාදන ප්‍රමාණය රුපියල් මිලියන 26.6කි. මීට සමගාමීව දිස්ත්‍රික්කයේ විහාරස්ථාන 25කට වැඩි ප්‍රමාණයක සංවර්ධන කටයුතු ත්‍රිවිධ හමුදාවේ සහ සිවිල් ආරක්ෂක බළකායේ ශ්‍රම දායකත්වයෙන් ආරම්භ කර තිබේ. වෙසක් සතිය නිමිත්තෙන් දිවයින පුරා භක්ති ගීත වැඩසටහන්, වෙසක් කලාප, මත්ද්‍රව්‍ය නිවාරණ වැඩසටහන් ආදී විවිධ වැඩසටහන් ක්‍රියාත්මක වේ.

සමස්ත ලංකා ශාසනාරක්ෂක මණ්ඩලය, බුද්ධශාසන, ආගමික හා සංස්කෘතික කටයුතු අමාත්‍යාංශය, බෞද්ධ කටයුතු දෙපාර්තමේන්තුව, මාතලේ දිස්ත්‍රික් ලේකම් කාර්යාලය මඟින් රාජ්‍ය වෙසක් උත්සව වැඩසටහන සංවිධානය කර තිබේ.

Continue Reading

Trending

Copyright © 2023 Sri Lanka Mirror. All Rights Reserved