පසුගිය වසරේදී නීති විරෝධී ධීවර කටයුතු කළ ඉන්දීය ජාතිකයින් 174ක් හා යාත්‍රා 25ක්ද, මේ වසරේ ගෙවුණ තුන්මස තුළ ඉන්දීය ජාතිකයින් 28 සමඟ ධීවර යාත්‍රා 04 ක්ද නාවික හමුදා භාරයට ගෙන තිබේ.

මෙම ඉන්දියානුවෝ බලපත් නොමැතිව ධීවර කර්මාන්තයේ නියැළීම, නීති විරෝධී ලෙස මුහුදු කූඩැල්ලන් ඇල්ලීම හා ප්‍රවාහනය, පුපුරණ ද්‍රව්‍ය භාවිතයෙන් මසුන් ඇල්ලීම, බලපත්‍ර රහිතව රාත්‍රී කාලයේ කිමිදුම් කටයුතු සිදුකරමින් නීති විරෝධී ධීවර කර්මාන්තයේ නියැලීම, බලපත්‍ර කොන්දේසි උල්ලංඝනය කරමින් වියලි මුහුදු කූඩැල්ලන් ප්‍රවාහනය, නීති විරෝධී ලෙස හක් බෙල්ලන් ළඟ තබාගැනීම, කැස්බෑවන් ඇල්ලීම, තහනම් පන්නක්‍රම භාවිතය සහ නීති විරෝධී දැල් භාවිත කිරීම යනාදී නීති විරෝධී ධීවර කටයුතු හේතුවෙන් මෙලෙස අත්අඩංගුවට පත්ව තිබේ.

එසේම මෙවැනි නීති විරෝධී කටයුතු හේතුවෙන් 2022 වර්ෂයේදී දේශීය පුද්ගලයින් 150 ක් සමඟ ධීවර යාත්‍රා 55 ක් ද, 2023 වර්ෂයේ මේ දක්වා සිදුකළ මෙහෙයුම් මඟින් දේශිය පුද්ගලයින් 94 ක් සමඟ ධීවර යාත්‍රා 31 ක් ද නාවික හමුදා භාරයට ගෙන තිබේ.

මේ අතර, ශ්‍රී ලංකා නාවික හමුදාව ඉකුත් 2022 ජනවාරි මස 01 වැනිදා සිට මේ වසරේ (2023) අප්‍රේල් 06 වැනිදා වූ කාලය තුළ තුළ උතුරු මුහුදේ සිදු කළ සෝදිසි මෙහෙයුම් මඟින් මත්ද්‍රව්‍ය ජාවාරම් සහ නීති විරෝධී ධීවර කටයුතු සිදු කළ දේශීය හා විදේශීය පුද්ගලයන් 486ක් සහ ධීවර යාත්‍රා 115ක් අත්අඩංගුවට ගෙන ඇත. 

එසේම ධීවර ආම්පන්න රැසක්ද අත්අඩංගුවට ගෙන තිබේ.

මත්ද්‍රව්‍ය ප්‍රවාහනය සම්බන්ධයෙන් 2022 වර්ෂයේ දේශීය සැකකරුවන් 29 සහ ධීවර යාත්‍රා 07 ක්ද 2023 වර්ෂයේ මේ දක්වා දේශීය සැකකරුවන් 11 සහ ධීවර යාත්‍රා 05 ක්ද නාවික හමුදා භාරයට ගෙන ඉදිරි නීතිමය ක‍ටයුතු සඳහා යොමු කර ඇත.

මූලාශ්‍රය – සිළුමිණ