අතිරික්ත වයින් තොග විනාශ කර නිෂ්පාදකයන් හට සහය දීමට ප්රංශ රජය විසින් යුරෝ මිලියන 200ක මුදලක් වෙන් කර ඇත.
මෙයට හේතුව නම් අතිරික්ත නිෂ්පාදන ධාරිතාව, ජීවන වියදම් අර්බුද හා වයින් වලට ඇති ඉල්ලුම අඩුවීම ඇතුළු ගැටළු රැසකට මුහුණ දීමට එරට වයින් නිෂ්පාදකයන් හට සිදුවී ඇතැයි විදෙස් වාර්තා සඳහන් කරයි.
මෙසේ වෙන් කරන අරමුදල් වලින් වැඩි ප්රමාණයක් අතිරික්ත වයින් තොග මිලදී ගැනීමට යොදා ගැනෙනු ඇති බවත්, එම වයින් මඟින් සුවඳ විලවුන්, සැනිටයිසර් හා පිරිසිදු කාරක නිපදවීමට යොමු කරනු ඇති බවත් පැවසේ.
තවද, නිෂ්පාදන අතිරික්තය පාලනය කිරීම සඳහා ඔලිව් වැනි වෙනත් නිෂ්පාදන කරා යොමු වීමටත් වයින් නිෂ්පාදකයන් හට මුදල් හිමිවනු ඇත.
එසේම ප්රංශ කෘෂිකර්ම අමාත්ය මාක් ෆෙස්නෝ පවසා ඇත්තේ මෙම පියවර මගින් වයින් වල මිල කඩා වැටීම පාලනය කිරීමට ප්රංශ රජය අරමුණු කරන බවයි.
මෙම පියවර වලට අනුව වයින් ක්ෂේත්රයේ නිරත වන්නන් අනාගතයට සිත යොමු කර පාරිභෝගිකයන් ගේ වෙනස් වීම් පිළිබඳව සිතා බලා නිසි ලෙස අනුගත විය යුතු බවද ඔහු වැඩිදුරටත් පවසා ඇත.
පසුගිය වසරේ ජූනි මාසයේ සිට වසරක කාලයක් පුරාවට යුරෝපීය කොමිසම විසින් රැස් කරගත් දත්ත වලට අනුව වයින් පරිභෝජනය ඉතාලියේ 7%, ස්පාඤ්ඤයේ 10%, ප්රංශයේ 15%, ජර්මනියේ 22% සහ පෘතුගාලයේ 34% ලෙස පහත වැටී තිබුණු නමුත්, ලොව වැඩියෙන්ම වයින් නිෂ්පාදනය වන මෙම කලාපයේ නිෂ්පාදන ධාරිතාවය 4% කින් ඉහළ ගොස් තිබේ.
