මාතර දිස්ත්‍රික් ලේකම්වරයා ලෙස සේවය කරන සමයේ කරන ලද වැරැද්දකට අදාළව නාගරික සංවර්ධන හා නිවාස අමාත්‍යාංශයේ ලේකම් ප්‍රදීප් රත්නායක මහතා රාජ්‍ය පරිපාලන අමාත්‍යාංශය යටතේ තිබෙන පරිපාලන නිලධාරින්ගේ සංචිතය (Pool) හෙවත් සයිබීරියාවට යොමුකර ඇතැයි අනාවරණය වේ.
ලේකම්වරයා මාතර දිස්ත්‍රික් ලේකම්වරයා ලෙස කටයුතු කරන සමයේදී කරන ලද විනය විරෝධී කටයුත්තකට අදාළව ජනාධිපති කාර්යාලය විසින් මෙම පියවර ගෙන ඇතැයිද රාජ්‍ය පරිපාලන අමාත්‍යාංශයේ අභ්‍යන්තර ආරංචිමාර්ග සඳහන් කරයි.
එම විනය විරෝධී කටයුත්තේ මූලික පරීක්ෂණ වාර්තාව ජනාධිපති කාර්යාලයට ලැබීමෙන් පසු මෙම පියවර ගෙන තිබේ.
මෙම ලේකම්වරයා මේ වසර අගදී විශ්‍රාම යැවීමට නියමිතව සිටි බවද පැවැසේ.
අමාත්‍යංශ ලේකම්වරු පාලනය කිරීමේ කටයුතු සිදුකෙරෙන්නේ ජනාධිපති ලේකම් කාර්යාලය හරහාය.
රාජ්‍ය පරිපාලන අමාත්‍යංශය යටතේ තිබෙන පරිපාලන නිලධාරීන්ගේ සංචිතය හිස්කිරීමට රජයේ අවධානය යොමුකර ඇති අතර, මෙම සංචිතයට යොදන නිලධාරීන් රජයේ තාවකාලික තනතුරකට යෙදවීමට නියමිත බවද රාජ්‍ය පරිපාලන අමාත්‍යාංශය කියයි.
ක්‍රීඩා අමාත්‍යාංශයේ හිටපු ලේකම් අනුරාධ විජේකෝන්ද මෙම සංචිතයේ සිටින අතර ඔහුටද රාජ්‍ය පරිපාලන අමාත්‍යාංශයේ අතිරේක ලේකම් තනතුරක්ද ලබාදීමට පසුගියදා කටයුතු කෙරුණි.
ඊළඟ බෝට්ටුව
මේ අතර, පෑලියගොඩ, කැලණිය, ගම්පහ, වත්ත හා ඡාඇල ප්‍රධාන කොට සේවයේ නියුතුව චෝදනා එල්ලව සිටින ප්‍රධාන හා සුළු පරිපාලන නිලධාරීන් කිහිපදෙනෙකු සම්බන්ධයෙන් ද ස්ථාන මාරු ලබාදීමට රාජ්‍ය පරිපාලනයේ අවධානය යොමුව ඇති බව වාර්තා වේ.
මේ අතරින් වැඩි දෙනෙකුට චෝදනා එල්ලව ඇත්තේ අනවසර ගොඩනැගිලි තැනීමට බලපත්‍ර ලබාදීමට හවුල්වීම, මහජන සෞඛ්‍ය අනතුරේ හෙලීම, ප්‍රමිතියෙන් තොර පාරවල් සකස්කිරීමට හවුල්වී යන කාරණා සම්බන්ධයෙනි.
එසේම, රාජ්‍ය පරිපාලන අමාත්‍යංශය වෙත දැනුවත් කර අල්ලස් හෝ දූෂණ චෝදනා විමර්ශන කොමිෂන් සභාවට ඉදිරිපත්ව ඇති ජනතා පැමිණිලි විශාල ලෙස ලැබී ඇති පුද්ගලයන් සම්බන්ධයෙන්ද විශේෂ අවධානයක් යොමුකර ඇතැයි පැවසේ.
මේ අතර, බස්නාහිර පළාත් ආණ්ඩුකාරවරයාගේ අනනොතකා කටයුතු කරනු ලබන රාජ්‍ය පරිපාලන නිලධාරීන් සම්බන්ධයෙන් වාර්තාවක් ආණ්ඩුකාරවරයාගේ කාර්යාලය තුළ සැකසෙමින් ඇති බවට ද ඉතා විශ්වාසකටයුතු ආරංචි මාර්ගයකින් වාර්තා වේ.
මේ අතර, මාධ්‍ය ඔස්සේ චෝදනා එල්ලවන පරිපාලන නිලධාරීන්ගේ දත්ත එකතු කිරීම සඳහා ද ජනාධිපති කාර්යාලයේ විශේෂ වැඩසටහනක් ක්‍රියාත්මක කර ඇතැයි වාර්තා වේ.
