මහා පරිමාණ මත්ද්‍රව්‍ය ජාවාරම්කරුවන් හා බෙදාහරින්නන් ඉලක්ක කරමින් පොලිසිය, ත්‍රිවිධ හමුදාව හා බුද්ධි අංශ ඒකාබද්ධව පළමු වරට ඊයේ සිදුකළ පැය අටක මෙහෙයුමකින් හඳුනාගත් මත්ද්‍රව්‍ය ජාවාරම්කරුවන් ඇතුළු 285 දෙනෙකු අත්අඩංගුවට ගෙන තිබේ.
බස්නාහිර, දකුණ හා උතුරු පළාත්වල හඳුනාගත් ස්ථාන හා ජාවාරම්කරුවන් ඉලක්ක කරමින් මෙම මෙහෙයුම ක්‍රියාත්මක වූයේ ඊයේ (29) අලුයම 04 සිට 12 දක්වා කාලය තුළය.
අත්අඩංගුවට ගත් සැකකරුවන් සන්තකයේ තිබී හෙරොයින් සහ ගංජා කිලෝග්‍රෑමය බැගින් හමුවී තිබෙන බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී නීතිඥ නිහාල් තල්දූව පැවැසීය.
මේ වැටලීමේදි විදෙස්ගත මහා පරිමාණ මත්ද්‍රව්‍ය ජාවාරම්කරුවන් සමගින් සමීප සම්බන්ධතා පවත්වමින් පළාත් අතර මහා පරිමාණයෙන් ජාවාරම් හා මත්ද්‍රව්‍ය ප්‍රවාහනය කරන 60 දෙනෙකු ඇතුළු 260 දෙනෙකු ඉලක්කය වූ බව මෙම මෙහෙයුමට සම්බන්ධ වූ උසස් නිලධාරියකු පැවැසීය.
එකී මත්ද්‍රව්‍ය ජාවාරම්කරුවන් 60 දෙනාගෙන් 10 දෙනෙකු පමණක් නිවෙස්වල සිටි බවත්, ඔවුන් මත්ද්‍රව්‍ය ද සමගින් අත්අඩංගුවට ගත් බවත් එම නිලධාරියා කීවේය.
මෙම වැටලීම සිදුවන අවස්ථාවේදී ගුවන් හමුදාව ගුවන් මගින් හඳුනාගත් ප්‍රදේශ නිරීක්ෂණය කර තොරතුරු යාවත්කාලීන කළ අතර පොලිසිය හා විශේෂ කාර්ය බළකාය ඩ්‍රෝන කැමරා මගින් එම ස්ථාන නිරීක්ෂණය කර ඇත.
එමෙන්ම මෙම මෙහෙයුම සඳහා පොලිස් නිල සුනඛයන්ද සම්බන්ධ කරගෙන ඇති අතර නාවික හමුදාව මුහුදු සීමාව අවට විශේෂ සෝදිසි මෙහෙයුමක්ද දියත් කර ඇත.
එක් එක් ස්ථානවල වැටලීම් සඳහා පොලිසිය, යුද හමුදාව, විශේෂ කාර්ය බළකාය හා බුද්ධි අංශවල නිලධාරීන් 15 ක පමණ පිරිසක් යොදවා තිබුණු අතර සමස්ථ වැටලීමට නිලධාරීන් 2500 කට අධික පිරිසක් සම්බන්ධ කරගෙන ඇත.
මහජන ආරක්ෂක ඇමැති ටිරාන් අලස්ගේ උපදෙස් මත සති හතරක පමණ කාලයක සිට යෙදූ රහසිගත සැලසුමකට අනුව පොලිසිය, ත්‍රිවිධ හමුදාව සහ බුද්ධි අංශ සම්බන්ධ කරගනිමින් මත්ද්‍රව්‍ය ජාවාරම්කරුවන් ඉලක්ක කරමින් මේ ආකාරයෙන් මෙහෙයුමක් දියත් කළ පළමු අවස්ථාව මෙය බවත් මෙහි දෙවන මෙහෙයුම මීටත් වඩා බරපතළ වනු ඇති බවත් ආරක්ෂක අංශ සඳහන් කරති.
(අරුණ)
