මෙවර මහ කන්නයේ (2024/25) වී වගා කටයුතු සඳහා රජයෙන් නොමිලේ ලබාදෙන පොහොර සහනාධාර මුදල සිය බැංකු ගිණුම්වලට බැරවී නැතැයි දිස්ත්‍රික්ක රැසක ගොවීහු කියා සිටිති.
මහ කන්නයේ වගා කටයුතු සඳහා හෙක්ටයාර් දෙකක උපරිමයකට යටත්ව හෙක්ටයාර් එකකට රුපියල් 25,000 ක පොහොර සහනාධාරයක් ලබා දීමට පසුගිය රජයේ හිටපු කෘෂිකර්ම ඇමැති මහින්ද අමරවීර කැබිනට් පත්‍රිකාවක් ඉදිරිපත් කළ අතර,එවකට කැබිනට් මණ්ඩලය විසින් ඊට අනුමැතිය ලබාදී තිබිණි. ඒ අනුව, එම මුදල වහාම ගොවීන්ට ලබාදීමට වර්තමාන ජනාධිපතිවරයා තීරණය කළේය.
පොහොර සහනාධාරය සඳහා මුදල් වෙන්කර ඇතත්,එම මුදල් ගොවි ගිණුම්වලට බැර කිරීමට ප්‍රමාද වූයේ ගොවිජන සංවර්ධන දෙපාර්තමේන්තුව ඇතුළු ආයතනවල නිලධාරීන් රැසක් මැතිවරණ රාජකාරිවල නිරතවී සිටීම නිසා බව කෘෂිකර්ම අමාත්‍යාංශයේ ඉහළ නිලධාරියකු කියා සිටියේය.
කෙසේ නමුත්,ගොවීන් කියා සිටින්නේ මහ කන්නයේ බිම් සැකසීමේ කටයුතු ආරම්භ කර ඇතත්, පොහොර මිලදී ගැනීමට මුදල් නොමැතිවීම නිසා තමන් දැඩි අසීරුතාවට පත්ව සිටින බවය.
අමරේ….
මේ අතර, වී මිලදී ගැනීමේ රජයේ වැඩපිළිවෙළ ක්‍රියාත්මක වන ප්‍රධානතම ආයතනය වන වී අලෙවි මණ්ඩලයේ වෙබ් අඩවිය මාස ගණනකින් යාවත්කාලීන කර නැතැයි මාධ්‍ය වාර්තා කර තිබේ.
එම වෙබ් අඩවියට අනුව තවමත් කෘෂිකර්ම ඇමැතිවරයා වන්නේ, හිටපු කෘෂිකර්ම ඇමැති මහින්ද අමරවීරය.
තවමත් එහි සභාපතිවරයා ලෙස සඳහන්කර ඇත්තේ හිටපු ඇමැතිවරයාගේ පුද්ගලික ලේකම්වරයාය.
එහි නියෝජ්‍ය සාමාන්‍යාධිකාරිවරයා දැනට වසරකට ආසන්න කාලයක් තිස්සේ කෘෂිකර්ම අමාත්‍යාංශයේ වෙනත් ආයතනයකට ස්ථාන මාරු ලබා ඇතත්, වෙබ් අඩවියට අනුව ඔහු තවමත් නියෝජ්‍ය සාමාන්‍යාධිකාරී තනතුර දරන්නේය.
ඉදිරි මහ කන්නයේ (2024/25) වී මිලදී ගැනීමේ වැඩපිළිවෙළ සම්බන්ධව කිසිදු සටහනක් මෙම වෙබ් අඩවියේ සඳහන්කර නැත. පසුගිය කන්නවලදී මිලදී ගත් වී තොග සම්බන්ධ තොරතුරුද නොමැත.
එමෙන්ම, මෙම වෙබ් අඩවියේ වී මිලදී ගැනීමේ ප්‍රගතිය ලෙස සඳහන්කර ඇත්තේ ඉකුත් 2020/21 වර්ෂයේ මහ කන්නයේ වී මිලදී ගැනීමේ ප්‍රගතිය පමණි. එය යාවත්කාලීන කර ඇත්තේද 2021 වසරේ මාර්තු මාසයේදීය.
ඉන්පසු වී මිලදී ගැනීම සම්බන්ධ කිසිදු තොරතුරක් මෙහි ඇතුළත් කර නැත.
මෙම වෙබ් අඩවියේ නවතම පුවත් ලෙස තොරතුරු අවසන් වරට ඇතුළත් කර ඇත්තේ ඉකුත් මාර්තු මස 13 වැනිදාය.
