ප්‍රවාහන, මහාමාර්ග හා ජනමාධ්‍ය ඇමැති බන්දුල ගුණවර්ධන මහතාගේ ක්‍රෙඩිට් කාඩ්පතක් අනවසරයෙන් ලබාගෙන භාණ්ඩ ලබාගත් සැකකරුවන් පිළිබඳව විමර්ශනයක් පවත්වන ලෙස අධිකරණය ඊයේ (30) අපරාධ පරීක්ෂණ දෙපාර්තමේන්තුවට නියෝග කළේය.

අංක 142, ජම්බුගස්මුල්ල මාවත, නුගේගොඩ පදිංචි ඇමැති බන්දුල ගුණවර්ධන විසින් කරන ලද පැමිණිල්ලක් පිළිබඳව අපරාධ පරීක්ෂණ දෙපාර්තමේන්තුවේ උප පොලිස් පරීක්ෂක නිරෝෂන් ලක්මාල් විසින් අධිකරණය වෙත කරුණු වාර්තා කළ අවස්ථාවේදී කොළඹ අතිරේක මහෙස්ත්‍රාත් හර්ෂණ කැකුණවෙල එම නියෝගය කළේය.

රුපියල් ලක්ෂ 05 ක ණය සීමාවක් හිමි පැමිණිලිකාර ඇමැති බන්දුල ගුණවර්ධනට අයත් ලංකා බැංකුවේ ණය කාඩ්පතක් ගිණුම් හිමියා වන පැමිණිලිකරුගේ කිසිදු අනුදැනුමකින් හෝ අවසරයක් නොමැතිව ලබාගෙන විශ්වාසය කඩකර, වංචා කර, සාවද්‍ය පරිහරණය කිරීම සම්බන්ධයෙන් විමර්ශන පවත්වා අධිකරණයට කරුණු වාර්තා කරන ලෙස අතිරේක මහෙස්ත්‍රාත්වරයා, අපරාධ පරීක්ෂණ දෙපාර්තමේන්තුවට නියම කළේය.

පැමිණිලිකාර ඇමැතිවරයාගේ ක්‍රෙඩිට් කාඩ්පතට අදාළ ගනුදෙනු ඇතුළත් ගිණුම් විස්තර ලබා දෙන ලෙස එම බැංකුවේ කළමනාකරුට නියෝගයක් නිකුත් කරන ලෙස අපරාධ පරීක්ෂණ දෙපාර්තමේන්තුවේ නිලධාරීන් අධිකරණයෙන් ඉල්ලා සිටියේය.

අදාළ බැංකු ගිණුම් විස්තර ලබා ගැනීමට අධිකරණය, අපරාධ පරීක්ෂණ දෙපාර්තමේන්තුවට අවසර ලබා දුන්නේය.