ප්‍රධාන පෙළේ මත්කුඩු ජාවාරම්කරුවෙක් වූ කළුදුර චමින්ද තාබ්‍රේවච්‌ නොහොත් බලපිටියේ බොබ්මාලි නැමති අනවර්ථ නාමයෙන් හැඳින්වෙන අපරාධකරු ඔහුගේ බිරිය සහ චීවරධාරියකු ඇතුළු සිව් දෙනෙක් ඊයේ (01) පස්වරුවේදී අත්අඩංගුවට ගත් බව ඕපාත පොලිසිය පවසයි .
මොවුන් විදේශගතවීමේ අරමුණින් ඕපාත වීරපාන ප්‍රදේශයේ නිවසක සැඟවී සිටියදී ඕපාත පොලිසියේ නිලධාරීන් විසින් කරනු ලැබූ විශේෂ මෙහෙයුමකින් පසු අත්අඩංගුවට ගෙන ඇත.
කවුද මේ බොබ්මාලි –
බුද්ධි අංශ විසින් හඳුනාගෙන ඇති පරිදි ඩුබායි රැඳි සිටින පාතාල අපරාධකරුවෙක් වූ කොස්ගොඩ සුජීගේ මත්ද්‍රව්‍ය ජාලය මෙහෙයවූ ප්‍රධානම අපරාධකරු මේ තැනැත්තාය.
රාජ්‍ය බුද්ධි අංශය, ශ්‍රි ලංකා නාවික හමුදාව සහ පොලිස් මත්ද්‍රව්‍ය කාර්යංශය විසින් 2021 වසරේ අගෝස්තු මාසයේ සිදුකළ වැටලීමක දී බේරුවල මුහුදු තීරයේ ධීවර යාත්‍රාවක සිටි සැකකරුවන් 05 දෙනෙකු සමග අත්අඩංගුවට ගත් කිලෝ 288 ක හෙරොයින් මත්ද්‍රව්‍ය තොගය මෙරටට ගෙන්වීම මෙහෙයවු ප්‍රධාන සැකකරු වූයේ මොහුය.
කළුදුර චමින්ද තාබ්‍රේවච්‌ නොහොත් බොබ් මාලි නමැති ඔහු අංක 128/09, නිසංසලා මාවන, තලාහේන, මාලඹේ සහ අංක 522/1/2, සල්මල්‌ මාවත, උඩුමුල්ල, බත්තරමුල්ල යන ලිපිනවල පදිංචිව සිටි 41 හැවිරිදි පුද්ගලයෙකි. ඔහු රැකියාව ලෙස බහුදින ධීවර යාත්‍රා නියමුවෙක් ලෙස කටයුතු කළේය.
අතට අසු වී අතහැරිය හැටි සහ යළි අත් අඩංගුවට පත් වූ හැටි
පසුගිය 2021 වසරේ සැප්තැම්බර් 09 දා මෙම පුද්ගලයා පොලිස් මත්ද්‍රව්‍ය නාශක අංශය විසින් ඇල්පිටියේ දී අත්අඩංගුවට ගෙන තිබිණි.
අත් අඩංගුවට පත්වන අවස්ථාවේ දී ඔහු සිය කොණ්ඩය සහ රැවුල කපා හඳුනා ගැනීමට අසීරු වන ආකාරයට සිය බාහිර පෙනුම වෙනස් කරගෙන සිට ඇත.
පොලිසිය විසින් ඡායාරූප සමඟ ප්‍රසිද්ධ කොට අල්ලා ගැනීම සඳහා මහජන සහය පැතූ පසුගිය 2021 අගොස්තු මාසයේ දී ගාල්ල දිස්ත්‍රික්කයේ පොලිසියක නිලධාරීන් පිරිසක් විසින් අත්අඩංගුවට ගෙන පසුව මුදාහැර ඇති බවට ද තොරතුරු වාර්තා වේ.
ගාල්ල පොලිසියකින් අත්අඩංගුවට ගන්නා ලද අවස්ථාවේ චන්ද්‍රිකා (සැටලයිට්) දුරකථනයක්ද ඔහු සතුව තිබී ඇති බව පැවසේ.
දූෂිත පොලිස් නිලධාරීන් සමග ඉතා කිට්ටු සම්බන්ධකම් ඇති බොබ් මාලේ නැමැත්තා මුදා හැර ඇත්තේ අත යට සිදුවූ ගනුදෙනුවකින් පසුව බවට බුද්ධි අංශ සැක පහළ කර තිබිණි.
ඕපාත දී අත් අඩංගුවට ගැනීම
නො. 45/10, සුභද්‍රාරාම පාර, බළපිටිය ලිපිනයේ පදිංචි කළුදුර චමින්ද තාබ්‍රේව් (43) නොහොත් බළපිටියේ බොබ්මාලි ට අමතරව ඊයේ (01) අත් අඩංගුවට ගෙන ඇත්තේ , නො. 337/5, කැන්දලියද්ද පාලුව, ගණේමුල්ල ලිපිනයේ පදිංචි වෙන්ගප්පුලි විදානච්චිගේ සුජානි කුමාරි වික්‍රමරත්ත (37), නො. 99/1, ‘රංගිරි’, බුද්දගයා, වීරපානේ ලිපිනයේ පදිංචි මහේන්ද්‍ර රණසිංහ සහ ශ්‍රී බෝධිරාජාරාමය, බතලහේනවත්ත, ගෝනවල, කැළණිය ලිපිනයේ පදිංචි වීරපානේ සීලසුමන (27) යන සිව් දෙනාය.
සැකකරුවන් වීරපානේ සීලසුමන හිමියන්ගේ ගිහිකල නිවසේ රැදී සිටියදී ලද තොරතුරක් මත ඕපාත පොලිස් ස්ථානාධිපති ප්‍රධාන පොලිස් පරික්ෂක චන්දිමාල් ද සිල්වා ප්‍රමුඛ පොලිස් නිලධාරීන් පිරිසක් විසින් ඊයේ (01) දහවල් සිදුකරන ලද සෝදිසි මෙහෙයුමකදී පලාගොස් තිබේ.
පසුව පොලීසිය විසින් ඔවුන් ලුහුබැද ගොස් වීරපාන, ඕපාත කදු සහිත කැලෑබද ප්‍රදේශයකදී අත් අඩංගුවට ගෙන තිබේ.
මෙහි පළමු සැකකරු 2021 අගෝස්තු 31 දින පොලිස් මත් දව්‍ය නාශක කාර්යාංශය මගින් බේරුවල වෙරළ තීරයේදී අත් අඩංගුවට ගන්නා ලද හෙරොයින් කිලෝ ග්‍රෑම් 228 ග්‍රෑම් 644 ක් ප්‍රවාහනය කරන ලද බහුදින යාත්‍රාවේ ස්පීකර් වශයෙන් කටයුතු කර තිබෙන බවද පොලිස් පරීක්ෂණ වලදි තහවුරු වී තිබුණි.
ඒ සම්බන්ධයෙන් වූ නඩුව කොළඔ, ප්‍රධාන මහේස්ත්‍රාත් අධිකරණයේ බී – 55635/1 යටතේ විභාග වෙමින් තිබෙන බවද ඕපාත පොලීසියේ ප්‍රකාශකයෙක් සදහන් කළේය.
කෙසේවුවද, බොබ්මාලි අත්අඩංගුවට පත්වූ අවස්ථාවේදී හෙරෙයින් ග්‍රෑම් 100 ක් ද ඔහු ළඟ තිබී පොලිසිය සොයාගෙන ඇත.
මෙම සැකකරුවන් මෑතකදි නාවික හමුදාව විසින් අත් අඩංගුවට ගන්නා ලද මහා පරිමාන හෙරෙයින් ජාවාරමට අදාලව කටයුතු කර තිබේද යන්න සම්බන්ධයෙන් පරීක්ෂණ පවත්වන බවද පොලීසිය කියයි.
