Connect with us

පුවත්

මධ්‍යම පරිසර අධිකාරියේ සභාපති, මන්ත්‍රී අනුරුද්ධ ඇතුළු තිදෙනා රිමාන්ඩ්

Published

on

රුපිය​ල් කෝටියක අල්ලසක් ලබාගැනීමේ සිද්ධියක් සම්බන්ධයෙන් අත්අඩංගුවට ගත් මධ්‍යම පරිසර අධිකාරියේ සභාපති සුපුන් එස්. පතිරගේ හා හිටපු පාර්ලිමේන්තු මන්ත්‍රී අනුරුද්ධ පොල්ගම්පල ඇතුළු තිදෙනා එළඹෙන 13 වනදා දක්වා රක්ෂිත බන්ධනාගාරගත කර තිබේ.

ඒ කොළඹ අතිරේක මහෙස්ත්‍රාත් පසන් අමරසේන මහතා හමුවට අද (11) ඉදිරිපත් කිරීමෙන් අනතුරුවය.

නෞකාවලින් ඉවත් කරන දැවිතෙල් පිරිපහදු කිරීම සඳහා පරිසර ආරක්ෂක බලපත්‍රයක් ලබාගැනීමට මධ්‍යම පරිසර අධිකාරියේ සභාපති  සුපුන් එස්. පතිරගේ විසින් රුපියල් කෝටියක මුදලක අල්ලසක් ඉල්ලූ බව පවසමින් ප්‍රසිද්ධ ව්‍යාපාරිකයෙකු විසින් පසුගියදා අල්ලස් හෝ දූෂණ විමර්ශන කොමිසමට පැමිණිල්ලක් ගොනුකර තිබුණි.

ඔහු එමගින් සඳහන් කර තිබුණේ පසුගිය වසරේ තම බලපත්‍රය ලබාගැනීමට මධ්‍යම පරිසර අධිකාරියට ගිය අවස්ථාවේදී ද එහි සභාපතිවරයා විසින් රුපියල් කෝටි දෙකක මුදලක් ඉල්ලූ අතර එම මුදල ලබාදීමට අපහසු බැවින් එය රුපියල් ලක්ෂ 70ක් දක්වා අඩුකර ගැනීමට හැකි වූ බවය.

පසුව මුදල් ලබාදීමකින් තොරවම අනතුරුව අදාළ බලපත්‍රය ලබාදුන් බවත් අදාළ ව්‍යාපාරිකයා පවසා තිබේ.

කෙසේවෙතත් මේ වසරට අදාළ පරිසර ආරක්ෂක බලපත්‍රය ලබාගැනීමට අදාළ ව්‍යාපාරිකයා ගිය අවස්ථාවේදී නැවත වතාවක් මධ්‍යම පරිසර අධිකාරියේ සභාපතිවරයා විසින් රුපියල් කෝටියක මුදලක් ඉල්ලා ඇත්තේ ඒ සඳහා අනුමැතිය ලබාදීම සඳහාය.

ඒ අදාළ ව්‍යාපාරිකයාට ඊට අදාළ කොන්දේසි සපුරාලීම සඳහා නොහැකිවීම හේතුවෙනි.

අනතුරුව ඔහු විසින් තවත් පුද්ගලයන් දෙදෙනෙකු අදාළ ව්‍යාපාරිකයාට හඳුන්වාදෙමින් පවසා ඇත්තේ, රුපියල් කෝටියක මුදල ඔවුන් දෙදෙනා වෙත ලබාදෙන ලෙසය.

ඒ අනුව ඔවුන් අදාළ ව්‍යාපාරිකයාට පවසා ඇත්තේ රාජගිරියේ පිහිටි සුපිරි වෙළෙඳසැලකට එම මුදල ඊයේ (10) පස්වරුවේ රැගෙන එන ලෙසය.

ඉන්පසුව ව්‍යාපාරිකයා අල්ලස් කොමිසමේ නිලධාරීන් සමග අදාළ ස්ථානයට ගොස් ඇති අතර එහිදී සභාපතිවරයා හඳුන්වාදුන් පුද්ගලයන් පවසා ඇත්තේ රුපියල් කෝටියක මුදල ඔහු සතුව වූ කූඩයට දමන ලෙසය.

එම අවස්ථාවේදී ක්‍රියාත්මක වූ අල්ලස් කොමිසමේ නිලධාරීන් විසින් ඔවුන් දෙදෙනාව අත්අඩංගුවට ගනු ලැබීය.

එහිදී සිදුකළ ප්‍රශ්න කිරීම්වලදී අනාවරණය වී ඇත්තේ, ඒ අතර සිටි අයෙක් හිටපු පාර්ලිමේන්තු මන්ත්‍රීවරයෙකු වූ අනුරුද්ධ පොල්ගම්පල හා ඔහුගේ සමීපතමයෙක් වන ටෙනිසන් ෆොන්සේකා නැමැත්තෙක් බවය.

ඔවුන්ගෙන් සිදුකළ ප්‍රශ්න කිරීම්වලින් අනතුරුව මධ්‍යම පරිසර අධිකාරියේ සභාපතිවරයා වන සුපුන් එස්. පතිරගේ අත්අඩංගුවට ගනු ලැබුවේ ඔහුට අයත් කාර්යාලය තුළදීය.

අත්අඩංගුවට ගෙන සිදුකළ ප්‍රශ්න කිරීම් අතරතුරදී සභාපතිවරයාට අද උදෑසන අධි රුධිර පීඩනය ඇතිවීම හේතුවෙන් කොළඹ ජාතික රෝහලෙන් ඖෂධ ලබාදීමද සිදුකර තිබුණි.

අනතුරුව සැකකරුවන් තිදෙනා අද දහවල් කොළඹ අතිරේක මහෙස්ත්‍රාත් පසන් අමරසේන මහතා හමුවට ඉදිරිපත් කළේය.

එහිදී විමර්ශන නිලධාරීන් විසින් සැකකරුවන් ලබාගත් රුපියල් කෝටියක මුදලද අධිකරණයට ඉදිරිපත් කරනු ලැබීය.

එම අවස්ථාවේදී පළමු සැකකරු වන මධ්‍යම පරිසර අධිකාරියේ සභාපතිවරයා වෙනුවෙන් පෙනී සිටි නීතීඥවරයා අධිකරණය හමුවේ සඳහන් කළේ තම සේවාදායකයා මුදල් ලබාගැනීම කිසිඳු අවස්ථාවකදී සිදුනොකළ බවය.

එමෙන්ම ඔහුගේ බිරිඳ ගුරුවරියක් වන අතර එළඹෙන 15වනදා නිවුන් දරු උපතක් සිදුකිරීමට ඇය රෝහල්ගත කිරීමට සූදානමින් සිටින බවද අදාළ නීතීඥවරයා අධිකරණය හමුවේ සඳහන් කළේය.

තම සේවාදායකයා රක්ෂිත බන්ධනාගාරගත කළහොත් ඇයගේ සෞඛ්‍යට තර්ජනයක් විය හැකි බැවින් ඔහුට ඕනෑම ඇප කොන්දේසියක් මත ඇප ලබාදෙන මෙන් විත්තිකාර පාර්ශ්වයේ නීතීඥවරයා අධිකරණයෙන් ඉල්ලා සිටියේය.

අනතුරුව දෙවැනි සැකකරු වන හිටපු පාර්ලිමේන්තු මන්ත්‍රී අනුරුද්ධ පොල්ගම්පොල හා තෙවැනි සැකකරු වෙනුවෙන් පෙනී සිටි නීතීඥවරයා අධිකරණය හමුවේ සඳහන් කළේ අල්ලස් කොමිසමේ උපාය දූතයා පැමිණ සිය සේවාදායකයාගේ කූඩයට මුදල් දැමීමෙන් පසුව විමර්ශන නිලධාරීන් විසින් ඔවුන් දෙදෙනා අත්අඩංගුගවට ගත් බවය.

පසුව සියලු කරණු සලකාබැලූ කොළඹ අතිරේක මහෙස්ත්‍රාත් පසන් අමරසේන මහතා සැකකරුවන් තිදෙනා එළඹෙන 13 වනදා දක්වා රක්ෂිත බන්ධනාගාරගත කළේය.

පුවත්

රුසියාවට සෙබළු යැවූ අයෙක් දෙහිවලදී අත්අඩංගුවට

Published

on

By

විශ්‍රාමලත් ත්‍රිවිධ හමුදා සෙබළු සංචාරක වීසා මත රුසියාව සහ යුක්රේනය වෙත රැගෙන ගොස් කුලී හේවායන් ලෙස යෙදවීමේ මිනිස් ජාවාරමට සම්බන්ධ තවත් පුද්ගලයකු දෙහිවල ප්‍රදේශයේදී ඊයේ (මැයි 20) අත්අඩංගුවට ගත් බව පොලිසිය නිවේදනය කළේ ය.

මේ සම්බන්ධයෙන් සැකපිට අත්අඩංගුවට ගත් පුද්ගලයා සංචාරක වීසා මත රුසියාවට පුද්ගලයන් 120 දෙනෙකු පමණ යැවූ බවට තොරතුරු අනාවරණය වී ඇති බවත් ඒ අනුව ඊට සැකපිට අදාළ පුද්ගලයා මෙලෙස අත්අඩංගුවට ගෙන ඇති බවත් පොලිස් මාධ්‍ය කොට්ඨාසය සඳහන් කළේය.

සැකකාර පුද්ගලයා රුසියානු තානාපති කාර්යාලය ඉදිරිපිට සිට සංචාරක වීසා මත රුසියාව සඳහා යාමට පුද්ගලයන්ට ආධාර අනුබල දී ඇති බව විමර්ශනවලදී අනාවරණය වී ඇති අතර අපරාධ පරීක්ෂණ දෙපාර්තමේන්තුවේ “තැනැත්තන් වෙළෙඳාම සහ සමුද්‍රීය අපරාධ විමර්ශන අංශය” විසින් එම සැකකරු අත්අඩංගුවට ගන්නා ලදී.

අත්අඩංගුවට ගත් සැකකරුගෙන් වැඩිදුර ප්‍රශ්න කිරීමෙන් අනතුරුව අද දිනයේ (21) අධිකරණය වෙත ඉදිරිපත් කිරීමට නියමිත බව අපරාධ පරීක්ෂණ දෙපාර්තමේන්තුවේ ආරංචි මාර්ග සඳහන් කරයි.

අපරාධ පරීක්ෂණ දෙපාර්තමේන්තුවේ ජ්‍යෙෂ්ඨ නියෝජ්‍ය පොලිස්පති රොහාන් ප්‍රේමරත්න මහතාගේ උපදෙස් මත “තැනැත්තන් වෙළෙඳාම සහ සමුද්‍රීය අපරාධ විමර්ශන අංශයේ” අධ්‍යක්ෂ ජ්‍යෙෂ්ඨ පොලිස් අධිකාරි සමරකෝන් බණ්ඩා මහතාගේ අධීක්ෂණය යටතේ වැඩිදුර පරීක්ෂණ පවත්වන බව පොලිසිය පැවසීය.

Continue Reading

පුවත්

කළුතර වෙඩි තැබිමක්

Published

on

By

කළුතර, කටුකුරුන්ද ප්‍රදේශයේ ඊයේ (20) රාත්‍රීයේ සිදුවූ වෙඩිතැබීමකින් පුද්ගලයෙකු මියගොස් ඔහුගේ 08 හැවිරිදි දියණිය තුවා ලබා තිබේ.

කටුකුරුන්ද දුම්රිය පොළ පාර ප්‍රදේශයේ දී යතුරුපැදියකින් පැමිණි නාඳුනන පුද්ගලයින් දෙදෙනකු විසින් නිවසකට ඇතුළු වී එම වෙඩිතැබීම සිදුකර පළාගොස් ඇති බව පොලීසිය පවසයි.

මියගොස් ඇත්තේ 39 හැවිරිදි තස්මින් මදුවන්ත සිල්වා නමැති කටුකුරුන්ද ප්‍රදේශයේ පදිංචිව සිටි තිදරු පියෙකි.

පොලීසිය සඳහන් කලේ අදාළ පුද්ගලයා සිය නිවසේ දරු තිදෙනා සමඟ රාත්‍රි ආහාරය ලබා ගනිමින් සිටියදී යතුරුපැදියකින් පැමිණි පුද්ගලයින් දෙදෙනෙකු වෙඩිතබා පළාගොස් තිබෙන බවය.

ටී – 56 වර්ගයේ ගිනිඅවියකින් වෙඩිතැබීම සිදුකර ඇති බවට මෙතෙක් සිදුකළ මූලික පරීක්ෂණවලදී අනාවරණය වී ඇති අතර වෙඩිතැබීමට හේතුව මෙතෙක් තහවුරු වී නොමැත.

Continue Reading

පුවත්

වෙසක් සතිය ඇරැඹෙයි

Published

on

By

මෙවර වෙසක් මහෝත්සවය වෙනුවෙන් ප්‍රකාශයට පත් කර ඇති ජාතික වෙසක් සතිය අද (21) ආරම්භ වේ.

අද (21) සිට 27 වැනිදා දක්වා කාලය වෙසක් සතිය ලෙස ප්‍රකාශිත අතර මෙවර රාජ්‍ය වෙසක් උත්සවය මාතලේ ධර්මරාජ පිරිවෙන් විහාරස්ථානයේදී අති උත්කර්ෂවත් අන්දමින් පැවැත්වීමට සැලසුම් කර තිබේ.

ජාතික වෙසක් සතිය නිමිත්තෙන් සමාරම්ක උත්සවය අද (21) අගමැති දිනේෂ් ගුණවර්ධන මහතාගේ ප්‍රධානත්වයෙන් පැවැත්වීමට නියමිතය.

23 වැනි දින ජනාධිපති රනිල් වික්‍රමසිංහ මහතා ද වෙසක් සතිය නිමිත්තෙන් මාතලේ ධර්මරාජ පිරිවෙන් විහාරස්ථානයේ පැවැත්වෙන ජාතික මහෝත්සවයට එක්වීමට නියමිතය.

‘අත්තනො ව අවෙක්ඛෙය්‍ය කතානි අකතානි ච” (අනුන් කළ දේ නොව තමන් කළ දේ ගැන විමසිලිමත් වෙමු) යන තේමාවෙන් යුතුව මාතලේ දිස්ත්‍රික්කය කේන්ද්‍ර කර ගනිමින් රාජ්‍ය වෙසක් උත්සවය මෙවර පැවැත්වේ.

23 වැනි දින රාජ්‍ය උත්සවය පෙරවරු 9.30ට මාතලේ ධර්මරාජ පිරිවෙන් විහාරස්ථානයේදී ත්‍රෛනිකායික මහ නාහිමිවරුන් ප්‍රමුඛ, ජනාධිපති රනිල් වික්‍රමසිංහ මහතාගේ ප්‍රධානත්වයෙන් පැවැත්වෙන අතර මෙම වැඩසටහනේදී පූජා භූමි සන්නස් පත්‍ර ප්‍රදානය ද සිදුවේ. විදේශ දූත පිරිස් විසින් තිළිණ ප්‍රදානයක් ද මෙහිදී සිදු කෙරේ.

රාජ්‍ය වෙසක් උත්සව වැඩසටහන අද (21) පස්වරු 2.00ට ත්‍රෛනිකායික මහ නාහිමිවරුන්ගේ සහ අගමැති දිනේෂ් ගුණවර්ධන මහතාගේ ප්‍රධානත්වයෙන් පැවැත්වේ.

වෙසක් සමරු මුද්දරයක් නිකුත් කිරීම, විහාරස්ථාන සංවර්ධන ආධාර ප්‍රදානය, බුද්ධශාසන අරමුදලේ ආධාර ප්‍රදානය, දහම් පාසල් ප්‍රතිපාදන ලිපි ප්‍රදානය, සාමණේර ස්වාමීන් වහන්සේලා සඳහා සංකේතාත්මක පොත් කට්ටල ප්‍රදානය, බුදුපුත් මාපිය උපහාර චෙක්පත් ප්‍රදානය මෙහිදී සිදු කෙරේ.

මෙම අවස්ථාවන් සඳහා බුද්ධ ශාසන ආගමික හා සංස්කෘතික කටයුතු ඇමැති විදුර වික්‍රමනායක මහතා, මධ්‍යම පළාත් ආණ්ඩුකාරවරයා සහ මැති ඇමැතිවරු සහභාගි වෙති.

රාජ්‍ය වෙසක් උත්සවයට සමගාමීව මාතලේ දිස්ත්‍රික්කයේ ග්‍රාමීය බෞද්ධ විහාර 22ක් සංවර්ධනය සඳහා රුපියල් මිලියන 22ක් ද රාජ්‍ය වෙසක් උත්සවයට සමගාමීව වැඩසටහන් පැවැත්වෙන විහාරස්ථාන 05ක් සංවර්ධනය සඳහා රුපියල් මිලියන 2.6ක් ද ආපදාවට ලක්වූ විහාරස්ථාන 03ක් ප්‍රතිසංස්කරණය සඳහා රුපියල් මිලියන 0.4ක් ද දහම් පාසල් 12ක් සංවර්ධනය සඳහා රුපියල් මිලියන 5ක් ද බුද්ධශාසන අරමුදල යටතේ දුෂ්කර විහාරස්ථාන 32ක් සඳහා සනීපාරක්ෂක පහසුකම් සැපයීම සඳහා රුපියල් මිලියන 32ක් ද වෙන් කර තිබේ. මෙම සම්පූර්ණ ප්‍රතිපාදන ප්‍රමාණය රුපියල් මිලියන 26.6කි. මීට සමගාමීව දිස්ත්‍රික්කයේ විහාරස්ථාන 25කට වැඩි ප්‍රමාණයක සංවර්ධන කටයුතු ත්‍රිවිධ හමුදාවේ සහ සිවිල් ආරක්ෂක බළකායේ ශ්‍රම දායකත්වයෙන් ආරම්භ කර තිබේ. වෙසක් සතිය නිමිත්තෙන් දිවයින පුරා භක්ති ගීත වැඩසටහන්, වෙසක් කලාප, මත්ද්‍රව්‍ය නිවාරණ වැඩසටහන් ආදී විවිධ වැඩසටහන් ක්‍රියාත්මක වේ.

සමස්ත ලංකා ශාසනාරක්ෂක මණ්ඩලය, බුද්ධශාසන, ආගමික හා සංස්කෘතික කටයුතු අමාත්‍යාංශය, බෞද්ධ කටයුතු දෙපාර්තමේන්තුව, මාතලේ දිස්ත්‍රික් ලේකම් කාර්යාලය මඟින් රාජ්‍ය වෙසක් උත්සව වැඩසටහන සංවිධානය කර තිබේ.

Continue Reading

Trending

Copyright © 2023 Sri Lanka Mirror. All Rights Reserved