පාර්ලිමේන්තු සම්ප්‍රදායන්ට පටහැනිව කටයුතු කළ මන්ත්‍රී රාමනාදන් අර්ච්චුනා මහතා සඳහා තාවකාලික වාරණයක් පැනවීමට කටයුතු කරන බව කථානායක වෛද්‍ය ජගත් වික්‍රමරත්න මහතා අද (19) පාර්ලිමේන්තුවේදී සඳහන් කළේය.

රාමනාදන් අර්ච්චුනා මහතා‍ සමබන්ධව කථානායකයවරයා විසින් සිදුකරන ලද සම්පූර්ණ නියෝගයන් මෙසේය,

පාර්ලිමේන්තු මන්ත්‍රී ගරු (වෛද්‍ය) රාමනාදන් අර්ච්චුනා මහතා විසින් පාර්ලිමේන්තු සභා ගර්භය තුළදී හා ඉන් පිටත දී විශේෂයෙන්ම සමාජ මාධ්‍ය භාවිතා කරමින් පුද්ගලයින්, පුද්ගල කණ්ඩායම් හා විවිධ සංවිධාන වලට එරෙහිව ඉතා පහත් පෙලේ වචන භාවිතා කරමින් සිදුකරනු ලැබ ඇති හා සිදුකරමින් පවතින විවිධ මතභේදාත්මක සහ අවමන් සහගත ප්‍රකාශ හේතුවෙන් පෞද්ගලිකව විවිධ පුද්ගලයින්ට සහ විවිධ සමාජ හා ජන කණ්ඩායම්වලට ඇති වී තිබෙන අසහනකාරී තත්ත්වයන් පිළිබඳ තමා වෙත විවිධාකාරයෙන් කරන ලද පැමිණිලි කිරීම් පිළිබඳ කථානායකවරයා අද පාර්ලිමේන්තුවට පැහැදිලි කළේය.

ඒ අනුව, ගරු (වෛද්‍ය) රාමනාදන් අර්ච්චුනා මන්ත්‍රීවරයා විසින් පෞද්ගලිකව කාන්තාවන් ඇතුළුව විවිධ පුද්ගලයින්, විවිධ සමාජ කණ්ඩායම් සහ ආගමික කණ්ඩායම් ඉලක්ක කරමින් එල්ල කරන ලද විවිධ අවමන් සහගත අශෝභන හා දැඩි මතභේදාත්මක ප්‍රකාශ සම්බන්ධව විවිධ පුද්ගලයින්, විවිධ සමාජ සංවිධාන, එසේම මෙම උත්තරීතර සභාව නියෝජනය කරන ආණ්ඩුව හා විරුද්ධ පාර්ශ්වයේ මහජන නියෝජිතයින් ඇතුළු විවිධ පාර්ශ්වයන් තමා වෙත පෞද්ගලිකව පැමිණිලි කොට එකී ප්‍රකාශ සම්බන්ධයෙන් ඔවුන්ගේ දැඩි අප්‍රසාදය, කනස්සල්ල හා කණගාටුව පළ කර තිබෙන අතර, එවැනි ක්‍රියා සම්බන්ධව මෙම උත්තරීතර සභාවේ ප්‍රධානියා වශයෙන් නිසි පියවර ගන්නා ලෙස තමා වෙත මේවන විටත් ඉල්ලීම් රාශියක් ඉදිරිපත් කර ඇති බවද කථානායකවරයා සභාවට දැනුම් දුන්නේය.

විශේෂයෙන්ම පාර්ලිමේන්තුව නැමැති උත්තරීතර සභාව නියෝජනය කරන මහජන නියෝජිතයෙකු ලෙස හිමිව තිබෙන වරප්‍රසාද භාවිතා කරමින්, එම සභාවට පැමිණ පිළිතුරු ලබාදිය නොහැකි පිරිස් සම්බන්ධ‍ව මෙන්ම එම සභාව නියෝජනය කරනු ලබන වෙනත් මහජන නියෝජිතයන් සම්බන්ධයෙන් මෙන්ම වෙනත් විවිධ බාහිර සමාජීය හා ආගමික සංවිධාන ඇතුළු විවිධ ජන කණ්ඩායම් හා ජන කොට්ඨාස ඉලක්ක කර ඉතාමත් පහත් මට්ටමේ වචන භාවිත කරමින් ඔවුන්ගේ පෞද්ගලික ජීවිතවලට අතිශයින් බලපානු ලබන මෙවැනි අවමන් සහගත ප්‍රකාශ සම්බන්ධව කථානායකවරයා වශයෙන් තමාගේ බලවත් අප්‍රසාදය පළ කරන බවද කථානායකවරයා සඳහන් කළේය.

පාර්ලිමේන්තුව නැමැති උත්තරීතර සභාව නියෝජනය කරනු ලබන මහජන නියෝජිතයෙකු ලෙස කරනු ලබන මෙම අවමන් සහගත සහ අශෝභන ප්‍රකාශ මඟින් ආයතනයේ උත්තරීතරභාවයට බලවත් කැළලක් හා අවමානයක් සිදුවන බවද කථානායකවරයා අවධාරණය කළේය. තවද, ඒ තුළින් ජාතික සමඟියට හා සංහිඳියාවට බලවත් හානියක් සිදුවන බවද ඔහු තවදුරටත් සඳහන් කළේය.

මෙවැනි ප්‍රකාශ කිරීමෙන් වළකින ලෙස අවස්ථා කිහිපයකදීම අදාළ මන්ත්‍රීවරයාට තමා විසින් විවිධාකාරයෙන් අවවාද කර ඇතත්, එකී උපදෙස් පිළිගෙන කටයුතු කරන ආකාරයක් පෙන්නුම් කිරීමට අදාළ මන්ත්‍රීවරයා විසින් මුළුමනින්ම අපොහොසත් වී ඇති බව තමා නිරීක්ෂණය කළ බවද
කථානායකවරයා පැවසීය.

මන්ත්‍රීවරයා විසින් සිදුකරනු ලබන මෙම ක්‍රියා පාර්ලිමේන්තුවේ ස්ථාවර නියෝගවල විධිවිධානයන්, පාර්ලිමේන්තු (බලතල හා වරප්‍රසාද) පනතේ විධිවිධානයන් සහ පාර්ලිමේන්තු මන්ත්‍රීවරුන්ගේ චර්යාධර්ම සංග්‍රහයේ ඇතුළත් විධිවිධාන වලට මෙන්ම, චිරාත් කාලයක සිට පැවත එන පැරණි පාර්ලිමේන්තු සම්ප්‍රදායන්ට මුළුමනින්ම පටහැනි හා අනනුකූල බවද කථානායකවරයා විශේෂයෙන් අවධාරණය කළේය.

දිගින් දිගටම ගරු (වෛද්‍ය) රාමනාදන් අර්ච්චුනා මන්ත්‍රීවරයා විසින් සිදුකරනු ලබන මෙම ප්‍රකාශ පිළිබඳව ඉතා ගැඹුරින් අධ්‍යයනය කිරීමෙන් හා සලකා බැලීමෙන් අනතුරුව ඒ තුළින් ජාතික සමඟියට හා සංහිඳියාවට එල්ලවන තර්ජන ද සැලකිල්ලට ගෙන කථානායකවරයා ලෙස තමා වෙත ස්ථාවර නියෝගවල විධිවිධාන ප්‍රකාරව පැවරී ඇති බලතල වලට අනුකූලව 2025 මාර්තු 20 සහ 21, 2025 අප්‍රේල් 08, 09 සහ 10 හා 2025 මැයි 06, 07 සහ 08 යන පාර්ලිමේන්තු රැස්වීම් පැවැත්වෙන දින අට (08) තුළදී ගරු පාර්ලිමේන්තු මන්ත්‍රී (වෛද්‍ය) රාමනාදන් අර්ච්චුනා මහතා විසින් පාර්ලිමේන්තුව තුළදී සිදුකරනු ලබන කිසිදු ප්‍රකාශයක් ශ්‍රව්‍ය, දෘශ්‍ය හා සමාජ මාධ්‍යයන්වල සජීවී විකාශය කිරීම අත්හිටුවීමට කටයුතු කරන ලෙස කථානායකවරයා නියෝග කළේය.

තවද, අවස්ථානුකූලව මන්ත්‍රීවරයා විසින් සිදුකරනු ලබන එවැනි අවමන් සහගත, අ‍ශෝභන සහ පහත්පෙළේ වචන යොදා ගනිමින් කරනු ලබන ප්‍රකාශ සියල්ල හැන්සාඩ් වාර්තා වලින් ඉවත් කිරීමට පියවර ගනු ලබන බවද කථානායකවරයා සභාවට දැනුම් දුන්නේය.

තවද, මෙලෙස සජීවී විකාශය අත්හිටුවීමට කටයුතු කරන කාලය තුළදී මන්ත්‍රීවරයා විසින් පවත්වනු ලබන කථාවල අන්තර්ගතය සහ සිදුකරනු ලබන ප්‍රකාශ පිළිබඳව සැලකිල්ලට ගෙන මෙම තාවකාලික අත්හිටුවීම ඉවත් කිරීම පිළිබඳව සලකා බලනු ලබන බවද ගරු කථානායක වෛද්‍ය ජගත් වික්‍රමරත්න මහතා වැඩිදුරටත් සඳහන් කළේය.