ඩුබායි රාජ්යයේ සැඟවී සිටිමින් මෙරට දරුණු ගණයේ අපරාධ මෙහෙයවන බව කියන මන්නා රමේෂ් අත්අඩංගුවට ගැනීම සඳහා ජාත්යන්තර පොලීසිය හරහා රතු වරෙත්තු ලබාගැනීමට පොලිස් දෙපාර්තමේන්තුව කටයුතු කර තිබේ.
මන්නා රමේෂ් මේ වනවිට සිදුකර ඇති මිනිස් ඝාතන, කප්පම්ගැනීම්, මත්ද්රව්ය ජාවාරම් ඇතුළු අපරාධ ගණනාවකට අදාළ සියලු තොරතුරු සහ සාක්ෂි පොලීසිය විසින් ලබාගෙන ඇති අතර ඒ සියල්ල අපරාධ පරීක්ෂණ දෙපාර්තමේන්තුව හරහා ජාත්යන්තර පොලීසිය වෙත යැවීමට කටයුතු කරමින් ඇති බවද වාර්තා වේ.
ඒ අනුව ඔහුව අත්අඩංගුවට ගැනීම සඳහා අවශ්ය සියලු කටයුතු පොලීසිය විසින් මේ වනවිටත් ක්රියාත්මක කර ඇත.
මන්නා රමේෂ් නමැති පාතාල නායකයා අවිස්සාවේල්ල ප්රදේශයේ උසස් පොලිස් නිලධාරීන්ට මරණීය තර්ජන එල්ලකරමින් මිනීමැරුම්, කප්පම්ගැනීම්, මත්ද්රව්ය ජාවාරම් ඇතුළු දරුණු ගණයේ අපරාධවල නිරතවෙමින් සිටින බවද පැවසේ.
අවිස්සාවේල්ල තල්දුව නගරයේදී ත්රිරෝද රථයක යමින් සිටි තරුණයන් දෙදෙනකු වෙඩි තබා ඝාතනය කර තවත් දෙදෙනකුට බරපතළ තුවාල සිදු කිරීම මන්නා රමේෂ්ගේ නියෝග මත සිදු කර තිබූ බව මේ වනවිට අනාවරණය වී ඇති බවද වාර්තා වේ.
මේ අතර අවිස්සාවේල්ල රත්නපුර ඇතුළු ප්රදේශ ගණනාවක ධනවත් මැණික් ව්යාපාරිකයන්ට මරණීය තර්ජන එල්ලකරමින් රුපියල් ලක්ෂ ගණනින් කප්පම් මුදල් ලබාගැනීම මන්නා රමේෂ් විසින් ජයටම කරගෙන ගොස් ඇති බවට පොලීසිය වෙත තොරතුරු ලැබී තිබේ.
මන්නා රමේෂ්ගේ කල්ලියේ ප්රධානම ගෝලයාවූ තල්දුවේ මහේෂ් නමැත්තා පොලිස් වෙඩිපහරින් මියයෑමෙන් පසු ඔහු එම මෙහෙයුමට සම්බන්ධවූ පොලිස් නිලධාරීන් සියලු දෙනාට මරණ තර්ජන එල්ලකර ඇති අතර අවිස්සාවේල්ල මූලස්ථාන ප්රධාන පොලිස් පරීක්ෂකවරයාගේ ජංගම දුරකථනයට ඇමතුමක් ගෙන ඔහු සහ පුත්රයා මරාදමන බවට තර්ජනය කර තිබූ බවද වාර්තා විය.
පොලිස් වෙඩි පහරින් මන්නා රමේෂ්ගේ සමීපතමයා වන තල්දුවේ මහේෂ් මරුමුවට පත්වීමෙන් පසු ඔහුගේ මෘතදේහය පිළිබඳ අවසන් කටයුතු පෙරේදා (18) සිදු කෙරිණි.
ඒ අවස්ථාවේ තල්දුව, අවිස්සාවේල්ල ඇතුළු ප්රදේශ ගණනාවක ජනතාව මහේෂ්ගේ මරණයෙන් පසු තමන්ට නිදහස ලැබුණු බව කියමින් රතිඤ්ඤා පත්තු කර ඇති බවද පැවසේ.
