බිංගිරිය ප්‍රදේශයේ “බෙන්ජි” නම් ඇඟලුම් කම්හලක් නිරීක්‍ෂණයට ගිය ජාතික ජන බලවේගයේ පාර්ලිමේන්තු මන්ත්‍රීවරුන් දෙදෙනෙකුට ඒ අවට රැස්ව සිටි පිරිසක් පහරදී කලාකාරී ලෙස හැසිරීම හේතුවෙන් එම ප්‍රදේශයේ දැඩි නොසන්සුන් තත්වයක් අද (30) දහවල් ඇතිව විය.

මේ සිද්ධියට මුහුණ දුන්නේ ජාතික ජන බලවේගය කුරුණෑගල දිස්ත්‍රික් පාර්ලිමේන්තු මන්ත්‍රී විජේසිරි බස්නායක සහ පුත්තලම දිස්ත්‍රික් පාර්ලිමේන්තු මන්ත්‍රී අජිත් ගිහාන් යන මහත්වරු වෙති.

මන්ත්‍රීවරුන් දෙදෙනා එම ඇඟලුම් කම්හලේ නිලධාරීන් සමග සාකච්ඡා කර පිටව යෑමට සූදානම් වූ අවස්ථාවේදී මෙම සිද්ධියට මුහුණ දී ඇති බව   පොලිස් ආරංචි මාර්ග සඳහන් කරයි.

මන්ත්‍රීවරුන් රැගත් වාහන දෙක වට කරගත් පිරිස ඒවාටද පහර දී ඇති බව පොලිසිය පවසයි.

ඇඟලුම් කර්මාන්තශාලාවේ නිලධාරීන් කණ්ඩායමක් හමුවී කිසියම් සාකච්ඡාවක් පවත්වා දෙදෙනා පිටත්ව යෑමට උත්සාහ දැරූ අවස්ථාවේදී රියදුරන් යයි කියන පිරිසක් දෙදෙනා පැය භාගයකට ආසන්න කාලයක් වට කරගෙන ඔවුන්ට දැඩි ලෙස විරෝධය පළ කරමින් ආවේගශීලී වචන කියමින් කලහකාරී ලෙස හැසිරීමට පටන් ගෙන ඇතැයි කියති.

මාලිමාවට අපි ඡන්දය දුන්නා ඇයි අපිට මෙහෙම කරන්නෙ යැයි පවසමින් ඔවුන් එසේ බැන වැදී ඇතැයි දැනගන්නට ඇත

මෙම සිද්ධිය සැලවීමෙන් පසු බිංගිරිය පොලිසියේ නිලධාරින් කණ්ඩායමක් එහි ගොස් මන්ත්‍රීවරුන් දෙදෙනා ආරක්ෂිතව පිටත් කර යැවීමට පියවර ගෙන ඇති බව උසස් පොලිස් නිලධාරියෙක් පැවසීය.

පිරිස කලහකාරීන් මන්ත්‍රීවරුන්ගේ රියදුරන්ටද දෝෂාරෝපණය කර ඇති බව වාර්තාවේ

මන්ත්‍රී විජේසිරි මහතා මේ පිළිබඳව කුලියාපිටිය කොට්ඨාස භාර ජේෂ්ඨ පොලිස අධිකාරි වරයාට පැමිණිලි කර ඇත.

එම පැමිණිල්ල අනුව පොලිසිය මේ සම්බන්ධයෙන් විමර්ශනයක් කර ගෙන යයි.

සිද්ධිය සම්බන්ධයෙන් ජාතික ජන බලවේගයේ කුරුණෑගල දිස්ත්‍රික් පාර්ලිමේන්තු මන්ත්‍රී විජේසිරි බස්නායක මහතා මහතා කියා සිටියේ ඇඟලුම් කම්හලේ ප්‍රධානීන් සමඟ සාකච්ඡා පවත්වා පැමිණෙමින් සිටියදී ආවේගීශීලී වුණු පිරිසක් තමාගේ ෂර්ට් කොළරයෙන් ඇද පහර දුන් බවයි.

තමා සමග එහි ගිය පුත්තලම දිස්ත්‍රික් පාර්ලිමේන්තු මන්ත්‍රී අජිත් ගිහාන් මහතාටද එමපිරිස හිරිහැර කළ බව ඔහු වැඩිදුරටත් පැවසීය.

එම සමාගමට අයත් ප්‍රවාහන සේවයේ කලින් සිටි දේශපාලකයින්ගේ කප්පම් ඉල්ලමක් බවට පත්ව ඇති තත්වය පිළිබඳ ගැටලුව විසදීමට මාලිමාවේ මන්ත්‍රීවරුන් මැදිහත්වීම මෙම ගැටුමට මුල බවද ඔහු කීය. 

මෙය එම ප්‍රශ්නය විසඳනවාට කප්පම් ගන්නා දේශපාලකයින් අකමැති නිසා තමන්ගේ හෙන්චයියන් යොදා මාලිමාවේ මන්ත්‍රීවරයා එලවා දැමීමට කළ උත්සයක් බවද ඔහු කියා සිටී.