දියතලාව, නරියාකන්ද රක්ෂිතයේ හටගත් ගින්නක් හේතුවෙන් එහි අක්කර 12ක පමණ භූමි ප්‍රමාණයක් විනාශ වී තිබේ.

එම රක්ෂිතයේ ඊයේ රාත්‍රියේ ගින්න හටගත් බව පොලිසිය පවසයි.

ගින්න මැඩ පැවැත්වීම සඳහා පොලිසිය, යුද හමුදාව හපුතලේ අඩවි වන නිලධාරින්, බදුල්ල ආපදා කළමනාකරණ මධ්‍යස්ථානයේ නිලධාරින් මෙන්ම ප්‍රදේශවාසින් ද එක්ව තිබේ.

ගින්නට හේතුව මෙතෙක් අනාවරණ වී නොමැති අතර දියතලාව පොලිසිය විසින් වැඩිදුර විමර්ශන සිදුකරනු ලබයි. 

උතුරු මැද පළාත් සභාවට අයත් වාහන 19 ක් සහ යතුරුපැදි 10 ක් අස්ථානගතව ඇතැයි ජාතික විගණන කාර්යාලය විසින් මෙම වසරේ නිකුත් කළ විගණන වාර්තාවකින් හෙළිදරව් කර තිබෙන බව ‘ලංකාදීප’ වාර්තා කර තිබේ.

ප්‍රධාන අමාත්‍යාංශය, අධ්‍යාපන අමාත්‍යාංශය, සෙඛ්‍ය අමාත්‍යාංශය, අධ්‍යාපන අමාත්‍යාංශය ඇතුළු කාර්යාල කිහිපයක තිබු වාහන හා යතුරුපැදි මෙසේ අස්ථානගතව තිබෙන බව වාර්තා කර ඇත.

අස්ථානගතව ඇති මෙම වාහන 19ට හිටපු අමාත්‍යවරුන් ඇතුළු විධායක නිලධාරින් විසින් භාවිතා කළ මෝටර් රථ,කැබ් රථ හා ජිප් රථද ඇතුළත් බවද එහි සඳහන්ය.

අතුරුදන්ව ඇති යතුරු පැදි ක්ෂෙත්‍ර නිලධාරින්ට ලබාදුන් ඒවා වන අතර, මෝටර් රථ ප්‍රවාහන දෙපාර්තමේන්තුවේ ලියාපදිංචි සහතික අනුව උතුරු මැද පළාත් සභාව අයත් මෙම වාහන පළාත් සභාව තුල භෞතිකව දක්නට නොලැබුණ බවද විගණන වාර්තාවේ සදහන් වන බව ‘ලංකාදීප’ වාර්තා කර තිබේ.

වසර 11ක් පල්ලේකැලේ එළිමහන් සිර කඳවුරේ රදවා සිටි රැදවියකු අත්අඩංගුවෙන් මිදී පලාගොස් ඇති බව පල්ලේකැලේ පොලිසිය පවසයි.

පොලිසිය පවසන්නේ, මෙසේ පලාගොස් ඇත්තේ අවුරුදු 54 ක් වන බොරැල්ල – බේස්ලයින් පාර ප්‍රදේශයේ පදිංචි රැදිවියකු බවය.

පලාගිය රැදවියා පල්ලේකැලේ එළිමහන් සිරකඳවුරේ වගා අංශයේ සේවයේ යොදවා සිටියදී මෙලෙස පලාගොස් ඇති බව පොලිසිය පවසයි.

පොලිසිය සඳහන් කළේ, මෙම රැදවියා මත්ද්‍රව්‍යවලට තදින්ම ඇබ්බැහිවීම සම්බන්ධයෙන් වසර 11 ක් සහ මාසයක් එම සිරකඳවුරේ රදවා සිටි අයකු බවය.