මෙවර (2024) ඡන්ද හිමි නාමලේඛනයට අනුව ජනාධිපතිවරණයේදී ජන්දය ප්‍රකාශ කිරීම සඳහා ලියාපදිංචි ඡන්දහිමියන් එක්කෝටි හැත්තෑඑක්ලක්ෂ හතළිස්දහස් තුන්සිය පනස්හතරදෙනකු (17,140,354) සුදුසුකම් ලබා සිටින බව මැතිවරණ කොමසාරිස් ජනරාල් සමන් ශ්‍රී රත්නායක මහතා කියයි.

2024 ඡන්ද හිමි නාමලේඛනයට අනුව වැඩිම ලියාපදිංචි ඡන්ද හිමියන් සංඛ්‍යාවක් සිටින්නේ ගම්පහ මැතිවරණ කොට්ඨාසයෙනි.

එම සංඛ්‍යාව දහඅටලක්ෂ අසූඑක් දහස් එකසිය විසිනවයකි (1,881,129) කි.

අඩුම ඡන්ද හිමියන් සංඛ්‍යාවක් වාර්තා වන්නේ වව්නියාව, මන්නාරම සහ මුලතිව් දිස්ත්‍රික්ක අයත් වන්නි මැතිවරණ කොට්ඨාසයෙනි.

එම සංඛ්‍යාව තුන්ලක්ෂ හයදහස් අසූ එකකි (306,081)කි.

මැතිවරණ කොට්ඨාස අනුව ලියාපදිංචි ඡන්ද හිමියන් සංඛ්‍යාව මෙසේය.

• කොළඹ දාහත්ලක්ෂ හැටපන්දහස් තුන්සියපනස් එකයි (1,765,351) 
• කළුතර දසලක්ෂ විසිහතර දහස් දෙසිය හතළිස් හතරයි (1,024,244) 
• මහනුවර එකොළොස් ලක්ෂ අනූඑක් දහස් තුන්සිය අනූනවයයි (1,191,399) 
• මාතලේ හාරලක්ෂ විසිනවදහස් නවසිය අනූඑකයි (429,991)
• නුවරඑළිය හයලක්ෂ පන්දහස් දෙසිය අනූ දෙකයි (605,292)
• ගාල්ල නවලක්ෂ තුන්දහස් එකසිය හැටතුනයි (903,163) 
• මාතර හයලක්ෂ අසූහයදහස් එකසිය හැත්තෑපහයි (686,175) 
• හම්බන්තොට පන්ලක්ෂ විසිදහස් නවසිය හතළිහයි (520,940) 
• යාපනය (යාපනය හා කිලිනොච්චි දිස්ත්‍රික්ක) පන්ලක්ෂ අනූතුන්දහස් එකසිය අසූහතයි (593,187) 
• මඩකලපුව හාරලක්ෂ හතළිස් නවදහස් හයසියඅසූහයයි (449,686) 
• දිගාමඬුල්ල පන්ලක්ෂ පනස්පන්දහස් හාරසියතිස්දෙකයි (555,432) 
• ත්‍රිකුණාමලය තුන්ලක්ෂ පහළොස් දහස් නවසිය විසිපහයි (315,925) 
• කුරුණෑගල දාහතර ලක්ෂ දාහත්දහස් දෙසිය විසිහයයි (1,417,226) 
• පුත්තලම හයලක්ෂ හැටතුන්දහස් හයසිය හැත්තෑතුනයි (663,673), අනුරාධපුර හත්ලක්ෂ හතළිස්එක්දහස් අටසිය හැටදෙකයි (741,862) 
• පොළොන්නරුව තුන්ලක්ෂ පනස්එක්දහස් තුන්සියදෙකයි (351,302) 
• බදුල්ල හත්ලක්ෂ පන්දහස් හත්සියහැත්තෑදෙකයි (705,772) 
• මොනරාගල තුන්ලක්ෂ අනූනවදහස් එකසියහැටහයයි (399,166) 
• රත්නපුර නවලක්ෂ විසිතුන්දහස් හත්සියතිස්හයයි (923,736) 
• කෑගල්ල හත්ලක්ෂ නවදහස් හයසියවිසිදෙකයි (709,622).

2019 වසරේ පැවැති ජනාධිපතිවරණයට වඩා මෙවර ජනාධිපතිවරණ ඡන්ද විමසීමේදී ඡන්දය ප්‍රකාශ කිරීමට ඡන්ද හිමියන් එකොළොස් ලක්ෂ හතළිස්අටදහස් දෙසියපනස් අට දෙනකු (1,148,258) වැඩිවී ඇත.

2019 වසරේ ලියාපදිංචි ඡන්ද හිමියන් සංඛ්‍යාව වූයේ එක්කෝටි පනස්නවලක්ෂ අනූදෙදහස් අනූහයකි (15,992,096) කි.

එමෙන්ම, ඉකුත් වසරේ (2023) ඡන්ද හිමි නාමලේඛනයට අනුව ලියාපදිංචි ඡන්දදායකයන් සංඛ්‍යාව එක්කෝටි හැටඅට ලක්ෂ පනස්හතර දහස් දෙසිය අනූඅටක් (16,854,298) කි.

තවද මෙවර ජනාධිපතිවරණ ඡන්ද විමසීම සඳහා වයස අවුරුදු 18 ට වැඩි නව ඡන්දදායකයෝ දෙලක්ෂ අසූහය දහස් පනස් හය දෙනකු (286,056)ක් සුදුසුකම් ලබා සිටිති.