මේ මස අගදී උතුරේ සංචාරයක නිරතවීමට නියමිත ජනපති අනුර කුමාර දිසානායක මහතාට එරෙහිව විරෝධතා පවත්වනු ඇතැයි සැක කෙරෙන පාර්ලිමේන්තු මන්ත්‍රී වෛද්‍ය රාමනාදන් අර්ච්චුනා මහතා ඇතුළු දෙමළ ක්‍රියාධාරීන් පිරිසකට අද (30) යාපනය මහේස්ත්‍රාත් අධිකරණය හමුවේ පෙනී සිටින ලෙස නියෝග කර තිබේ.

මේ නියෝගය නිකුත් කර ඇත්තේ යාපනය පොලීසිය මහේස්ත්‍රාත් අධිකරණයෙන් කළ ඉල්ලීමට අනුවය.

යාපනය මහේස්ත්‍රාත් අධිකරණයේ රෙජිස්ට්‍රාර් විසින් අත්සන් තබා ඇති නියෝගයේ සදහන්ව ඇත්තේ ජනාධිපති අනුර කුමාර දිසානායක මහතා යාපනය දිස්ත්‍රික් ලේකම් කාර්යාලයේ පැවැත්වීමට නියමිත රැස්වීමට සහභාගි වන මොහොතේ යාපනය දිස්ත්‍රික් පාර්ලිමේන්තු මන්ත්‍රී වෛද්‍ය රාමනාදන්  අර්ච්චුනා, උතුරු පළාතේ රැකියා විරහිත උපාධිධාරීන්ගේ සංගමයේ නායක සර්වානන්ද ශිවම් සශිකරන්, විරෝධතා කණ්ඩායමේ යාපනය දිස්ත්‍රික් නායක පෝන්රාජ් ප්‍රේම් ඩග්ලස් ප්‍රභාකරන්, අනියම් සෞඛ්‍ය නිලධාරී සංගමයේ නායිකා එස්. ජස්මින්, `හඬක් නැතිවුන්ගේ හඬ`සංවිධානයේ නායක මුරුගයියා කෝමගන් යන අය විසින් විරෝධතා දියත් කිරීමට නියමිත බවට තොරතුරු වාර්තා වී ඇතැයි යාපනය පොලිසියේ මුලස්ථාන පොලිස් ස්ථානාධිපතිවරයා විසින් ජනවාරි 29 දා අධිකරණයට කරුණු වාර්තා කර ඇති බවයි.

අධිකරණ නියෝගයේ සදහන් වන පරිදි 1979 අංක 15 දරණ අපරාධ නඩු විධාන සංග්‍රහයේ 106 (1) (2)  (3) වගන්ති යටතේ  මුලස්ථාන පොලිස් ස්ථානාධිපතිවරයා අධිකරණයෙන් ඉල්ලා ඇත්තේ එම විරෝධතා තහනම් කරමින් අධිකරණ නියෝගයක් නිකුත් කරන ලෙස යි.

අධිකරණය නියෝග කර ඇත්තේ පොලිසිය විසින් නම් කර ඇති ඉහත නම් සදහන්  පස් දෙනාට ඔවුන්ගේ කරුණු දැක්වීම සදහා නීතිඥයන් මාර්ගයෙන් හෝ සෘජුව ජනවාරි 30 වැනි බ්‍රහස්පතින්දා උදේ 9.30 ට යාපනය මහේස්ත්‍රාත් අධිකරණය හමුවේ පෙනී සිටින ලෙසයි.

ජනාධිපති අනුර කුමාර දිසානායක යාපනයේ දිස්ත්‍රික් ලේකම් කාර්යාලයේ පැවැත්වෙන දිස්ත්‍රික් සම්බන්ධිකරණ කමිටු රැස්වීමට ජනවාරි 31 දා සහභාගී විමට නියමිතව ඇත.

කෙසේවුවද, යාපනය දිස්ත්‍රික් පාර්ලිමේන්තු මන්ත්‍රී වෛද්‍ය රාමනාදන් අර්ච්චුනා ඊයේ (29) විශේෂ පොලිස් කණ්ඩායමක් විසින් අත්අඩංගුවට ගනු ලැබූ අතර පසුව අනුරාධපුර මහෙස්ත්‍රාත් අධිකරණයට ඉදිරිපත් කෙරුණි.

පසුව ඔහුව රුපියල් ලක්ෂ 2 බැගින් වූ ශරීර ඇප දෙකක් මත මුදාහැර ඇති අතර මෙම නඩුව පෙබරවාරි මස 3වනදා යළි කැඳවීමට ද මහේස්ත්‍රාත්වරයා නියම කර තිබේ.

මන්ත්‍රී අර්ච්චුනා රාමනාදන් මහතා මෙම මස ඉකුත් 20 වනදා රාත්‍රී කාලයේ අනුරාධපුර තලාව ප්‍රදේශයේදී රථවාහන රාජකාරිවල නිරතව සිටි පොලිස් නිලධාරීන්ට සාපරාධී බලහත්කාරය පා රාජකාරියට බාධා කිරීමේ චෝදනාව යටතේ මෙම අත්අඩංගුවට ගැනීම සිදුළ බවට තොරතුරු වාර්තා විය.

සබැඳි පුවත්