යාල, ගල්ආර ප්‍රේරණ කලාපයේ කැළය කපා දැමීමේ සිද්ධිය සම්බන්ධයෙන් විමර්ශනය කිරීමට නිලධාරින් පිරිසක් අද (28) කොළඹන් පිටත්ව ඇතැයි වාර්තා වේ.

එම ප්‍රදේශයේ තිබූ වසර දෙසීයක් තුන් සියයක් පැරණි පලු, වීර ආදී ගස් ගලවා පෙරළා දමා තිබෙන අතර අක්කර 40ක පමණ භූමි ප්‍රමාණයක් වට කොට අඩි හතළිහක් පමණ පළලට මාර්ගයක්ද සලකුණු කර ඇතැයි පැවසේ.

දින 5ක් තිස්සේ දෙබරවැව ප්‍රදේශයේ ලී වෙළෙඳ ව්‍යාපාරිකයකු විසින් මෙම විනාශය සිදුකරගෙන යන බව ප්‍රදේශවාසීහු චෝදනා කරති.

මෙම අක්කර 40න් අක්කර 30ක් මෙම ව්‍යාපාරිකයාටත් සෙසු අක්කර 10 ලුණුගම්වෙහෙර වන සංරක්ෂණ නිලධාරින් කිහිපදෙනකුටත් ලැබෙන ආකාරයෙන් මේ හෙළිකිරීම් සිදුකර ඇතැයි පැවසේ.

මේ පිළිබඳව ලුණුගම්වෙහෙර අඩවි වන නිලධාරි කුමුදු රෝහණ මහතා මාධ්‍යට පවසා ඇත්තේ පවසා මෙවැනි වීමක් තමන් වෙත වාර්තා වී නොමැති බවත්, එලෙස හෙළි පෙහෙළි කිරීමක් සිදු කරන්නේ නම් පරිසර වාර්තාවක් ලබා ගැනීමටත් අවශ්‍ය බවයි.

මෙම වනාන්තරය තුළ දිවුල් පලු වීර වැනි වන සතුන් ආහාරයට ගන්නා පැළ වර්ග බහුලව දැකිය හැකි අතර මෙම ශාක විනාශ කිරීම තුළින් වන අලි ගම්වැදීම වැළැක්විය නොහැකි බවත් පරිසරවේදීන් පෙන්වා දෙයි.

වියළි කාලයට වන සතුන්ට ජලය ලබා ගැනීම සඳහා කුඩා වැව් මෙම ප්‍රදේශය ස්ථාපනය කොට ඇති අතර එම කුඩා වැව් සඳහා ජලය ලැබෙන්නේ ගල් ආර මගින් බවත් එම ජලය ලැබෙන ආරවල් සියල්ල හරස්කොට මෙම මහා පරිමාණ ඉඩම් ජාවාරම සිදුකරන බව පරිසරවේදී ප්‍රින්ස් සුරේන්ද්‍ර දහනායක මාධ්‍ය වෙත අනාවරණයක් කර ඇත.

මේ පිළිබඳව තිස්සමහාරාම ප්‍රාදේශීය ලේකම් චන්දිමා මනම්පේරි මහත්මිය පවසා ඇත්තේ වන සංරක්ෂණ ඉඩම් හෙළි පෙහෙළි කරන බවට නිතර වාර්තා වන බැවින් ඒ පිළිබඳව නිසි ක්‍රියාමාර්ග ගැනීමට ලුණුගම්වෙහෙර වන සංරක්ෂණ නිලධාරීන්ට උපදෙස් ලබාදී ඇති බවයි.