රතු මුහුදට නැව් යැවීමට පෙර ශ්‍රී ලංකාවේ මුහුද ආරක්ෂා කර ගැනීමට පියවර ගත යුතු බව උතුරු පළාත් ධීවර එකමුතුව පවසයි.
මන්නාරමේ දී ඊයේ (18) පැවැත්වූ මාධ්‍ය හමුවකදී එම සංගමයේ – ප්‍රකාශක මොහොමඩ් ආලම් මහතා මේ බව අවධාරණය කර සිටියේය.
ඉන්දීය ධීවරයින් දිගින් දිගටම මෙරට මුහුදු සීමාව‌ට ඇතුළු වී සිදු කරන අනවසර ක්‍රියාවන් හේතුවෙන් ශ්‍රී ලාංකික ධීවරයින්‌ට සිදුවන අසාධාරණයන් ගැන ආණ්ඩුව දැනුවත් වූවද ඒ පිළිබඳව කිසිවක් නෑසූනු සේ ඔවුන් සිටින බව එම මහතා චෝදනා කළේය.
වැඩි දුරටත් අදහස් දැක්වූ මොහොමඩ් ආලම් මහතා මෙසේද පැවසීය :
“දකුණු අප්‍රිකාව, ගාසා ඇතුළු ප්‍රදේශ වලට තමන්ට හැකි පමණින් උදව් කරනව කියලා ජනාධිපතිතුමා පොරොන්දු වෙනවා. බඩගින්නෙ ඉන්න එකා මෙහේ ඉන්න කොට කොහේදෝ ඉන්න කෙනෙකුට ආහාර ලබා දීම පිළිගන්න බෑ. එහෙට යවනව කියන නැව වහාම පෝක් සමුද්‍ර සන්ධියට යවල අපේ මුහුදු සීමාව හා ස්වෛරීභාවය ආරක්ෂා කරන්න ජනපතිතුමා කටයුතු කරන්න ඕනෙ.”
“ඩෙල්ෆ්ට් වල අත්අඩංගුවට ගත්ත ධිවර යාත්‍රා 02ක කොටි 02ක් වටින මාළු තිබුණා කියල ධීවර දෙපාර්තමේන්තුව ඇස්තමේන්තු කරල තියෙනව. අවුරුදු 15ක් තිස්සෙ දහස් ගණනින් බෝට්ටු වලින් ඇවිල්ල කෝටි ගණනින් දහස් ගණනින් ඔවුන් අරන් ගිහින් තියෙනව. රතු මුහුදට යවන්න තියෙන නැව නවත්තල අපේ මුහුදු සිමාවේ නිලධාරින් සියදෙනෙකුගෙන් සමන්විත කණ්ඩායමක් ස්ථාපිත කරලා, ඩෝරා යාත්‍රා දාල නිරීක්ෂණය කලොත් ඇති. ඉන්දීය ධීවරයන්ගේ පැමිණීම අපිට පාලනය කරන්න පුළුවන්.”
(වීඩියෝ : News1st)
