කොළඹ සුගතදාස ගෘහස්ථ ක්‍රීඩාංගණයේ පෙරේදා (26) පැවති ‘එක්සත් ප්‍රජාතන්ත්‍රවාදී හඬ’ පක්ෂයේ මංගල මහා සමුළුවෙන් පසුව ඇති වූ උණුසුම් තත්ත්වය පිළිබද ඊයේ (27) එම පක්ෂය විසින් පැහැදිලි කිරීමක් සිදුකර තිබේ.

ඒ ඊයේ (27) ‘එක්සත් ප්‍රජාතන්ත්‍රවාදී හඬ’ පක්ෂ මූලස්ථානයේ පැවති විශේෂ මාධ්‍යය හමුවකදීයි.

වැඩිදුරටත් ඒ සම්බන්ධයෙන් පැහැදිලි කරමින් එක්සත් ප්‍රජාතන්ත්‍රවාදී හඬ පක්ෂයේ මාධ්‍ය ප්‍රකාශක රවී කුමුදේශ් මහතා කියා සිටියේ අදාළ පිරිස විශ්ව විද්‍යාලය ශිෂ්‍යයින් බව පැවසුවද, ඔවුන්ගේ හැසිරීමේ හෝ ඔවුන් සිසුන් බවට නොපෙණුනු බවයි.

ඒ අනුව කුමුදේශ් මහතා එහිදී ඉල්ලා සිටියේ “අපිට මඩ ගැහුවත් කමක් නෑ.., විශ්වවිද්‍යාල ශිෂ්‍යයින්ට මඩ ගහන්න එපා..” යන්නැයි.

හරි හෝ වැරදි හෝ විශ්වවිද්‍යාල ශිෂ්‍යයින් සෑමදාම සිය දේශපාලන මතය දිවි හිමියෙන් රැකගත් බවද ඒ මහතා පෙන්වා දුන්නා.

එමෙන්ම පවතින ප්‍රජාතන්ත්‍රවාදී ඉඩකඩෙහි මෙරට දේශපාලනය තුළ ‘එක්සත් ප්‍රජාතන්ත්‍රවාදී හඬ’ පක්ෂයට වැඩ කිරීමට ඉඩ දෙන්නැයි ද ඔහු එහිදී ඉල්ලීමක් කළා.

මේ ඒ සම්බන්ධයෙන් වැඩිදුරටත් අදහස් පළකල රවී කුමුදේශ් මහතා,

“මේක අපේ මංගල මහා සමුළුවෙන් එළියේ තිබ්බ වැඩක්.. ඒක සංවිධානය කරලත් තිබ්බේ අපි නෙවෙයි.. ඒ වැඩසටහන අපේ පක්ෂයට තියෙන බය වැඩි වෙච්ච අය සංවිධානාත්මකව කරපු දෙයක් කියලා තමයි පේන්න තියෙන්නේ.. සමුළුව ආවරණය කරන්න ආපු කිසිදු මාධ්‍යවේදියෙක් එතන ඉන්න විදිහක් නෑ.. ඔය චෝදනා කරන අය අපේ සමුළුවට ආවෙත් නෑ.. මේ සිදුවීම අපේ පරිශ්‍රය තුළ සිදු වුණෙත් නෑ.. කවුරුහරි මේක සැළසුම් කරලා, පිටපතකට අනුව රඟපාන පිරිසක් දාලා, ඔවුන් විසින්ම මාධ්‍යයට නිරාවරණය කරපු වැඩක්.. අපි දන්නෑ එහෙම සැලසුම් සහගත විදිහට අපිට මඩ ගහන්න තරම් ඇයි සමහර අය බයවෙලා ඉන්නේ කියලා.. එතන හිටියේ විශ්ව විද්‍යාලය ශිෂ්‍යයෝ කිව්වට, ඒ අයගේ හැසිරීමේ පවා එහෙම එකක් තිබුණේ නෑ.. විශේෂයෙන්ම විශ්වවිද්‍යාල ශිෂ්‍යයෙක් රුපියල් 1000කට 2000කට මිලදී ගන්න පුළුවන් කියලා අපි විශ්වාස කරන්නෙත් නෑ.. මේ කවුරු සල්ලිවලට ගත්තත්, විශ්ව විද්‍යාල ශිෂ්‍යයන්ගේ දේශපාලන මතය එහෙම මිලදීගන්න පුළුවන් එකක් නෙවෙයි කියලා අපි හැමෝම දන්නවා.. ඒ නිසා මේ නිගරුව කරන්නේ අපිට වඩා ඔවුන්ට.. අපිට ප්‍රජාතන්ත්‍රවාදී ඉඩකඩ ඇතුලේ මේ රටේ දේශපාලන පක්ෂයක් විදියට වැඩ කරන්න ඉඩ දෙන්න කියලා ඉල්ලීමක් කරනවා.. මේ ඡන්ද ව්‍යාපාරයත් එක්ක මාධ්‍ය අතර සීතල යුද්ධයක් තියෙනවා.. ඒකෙ කොටස්කාරයෙක් වෙන්න දේශපාලන පක්ෂයක් විදිහට අපි බලාපොරොත්තු වෙන්නෙ නෑ..”

පාර්ට් ටයිම් ජොබ් එකකට කියල අපිව ගෙනාවේ – සරසවි සිසුන්

මේ අතර, අදාළ සිද්ධිය වූ අවස්ථාවේ එහි සිටි සරසවි සිසුන් කියා සිටියේ 5000 ක පමණ සරසවි සිදුන් පිරිසක් ‘එක්සත් ප්‍රජාතන්ත්‍රවාදී හඬ’ පක්ෂයේ මංගල රැලියට පැමිණි බවත්, ඔවුන්ගෙන් 200 වැඩි පිරිසකට එම පක්ෂය පොරොන්දු වූ රුපියල් 2000 දීමනාව නොදීම නිසා මේ උණුසුම්කාරී තත්ත්වය ඇතිවුණ බවයි.

ඔවුන් එහිදී වැඩිදුරටත් කියා සිටියේ අදාළ සමුළුව හා සම්බන්ධීකරණය කළ පුද්ගලයා ඔවුන්ව එහි ගෙන්නුවේ පාර්ට් ටයිම් ජොබ් එකක් ලබාදෙන බව පවසමින් යැයිද හෙළි කළේය.

මූලාශ්‍ර – මොණරා, නිවුස්ෆස්ට්