හිටපු ජනාධිපති රනිල් වික්‍රමසිංහ මහතාගේ නිවසට ගිනි තැබීමෙන් අනතුරුව රටින් පලා ගිය බව කියන සැකකරුවකු වන හිටපු නියෝජ්‍ය ඇමැති නියෝමාල් පෙරේරා මහතාගේ පුත්‍රයාට මෙරටට පැමිණීමට අවසර දෙන්නැයි කොටුව මහෙස්ත්‍රාත් අධිකරණය වෙත ඉල්ලීමක් ඊයේ (02) ඉදිරිපත් කර තිබේ.

අරගලය පැවැති සමයේ දී 2022 ජූලි 09 වැනිදා හිටපු ජනාධිපති රනිල් වික්‍රමසිංහ මහතාගේ නිවසට ගිනි තැබීමෙන් පසු දින මෙරටින් පලාගොස් කැනඩාවේ රැඳී සිටි බව කියන ඇන්ඩෲ ඉවෝන් පෙරේරා නමැති සැකකරුට නැවත ලංකාවට පැමිණීමට අවසර දෙන්නැයි කරුණු ඉදිරිපත් කරමින් ජනාධිපති නීතිඥ මෛත්‍රි ගුණරත්න මහතා එම ඉල්ලීම කොටුව මසේත්‍රාත් තනූජා ලක්මාලි මහත්මිය වෙත ඉදිරිපත් කළේ ය.

හිටපු ජනාධිපතිවරයාගේ නිවසට ගිනි තැබීමේ සිද්ධියේ 05 වන සැකකරු වන ඇන්ඩෲ ඉවෝන් පෙරේරා නමැත්තාට එරෙහිව විදෙස් ගමන් තහනමක් ද අධිකරණය මගින් මීට ඉහත දී පනවා තිබිණි.

සැකකරු වෙනුවෙන් පෙනී සිටි ජනාධිපති නීතිඥ මෛත්‍රි ගුණරත්න මහතා මෙසේ ද පැවැසීය.

මෙම සිද්ධියට අදාළ විමර්ශනවලදී වූ බලපෑම් හා නොමග යෑමක් මත මොහු සැකකරුවෙක් බවට පත්වෙලා තිබෙනවා. මෙම සැකකරු රටින් පැනලා ගිය බවට අපරාධ පරීක්ෂණ දෙපාර්තමේන්තුව අධිකරණයට කරුණු වාර්තා කළා. ඒ අනුව ඔහුට විදෙස් ගමන් තහනමක් පැනවූ නිසා සැකකරුට නැවත රට තුළට එන්න බැහැ.

සැකකරු නඩුව සඳහා පැමිණීමට බලාපොරොත්තුවෙන් සිටියත් ඔහු ගුවන්තොටුපොළේ දී අත්අඩංගුවට ගන්නා ලෙස නියෝග කර තිබෙනවා. ඔහු ලංකාවට ඒමට අවසර දුන්නොත් පැමිණි දිනට පසුදිනම අධිකරණය වෙත ඉදිරිපත් විය හැකියි. මෙම සැකකරු ඉදිරි මහ මැතිවරණයට තරග කිරීමට බලාපොරොත්තුවෙන් සිටින නිසා ඔහුට මෙරටට එන්න අවසර දෙන ලෙස ඉල්ලා සිටිනවා.

සැකකරු වෙනුවෙන් කරන ලද එම ඉල්ලීමට විරෝධතාව පළකරන ලෙස නීතිපතිවරයා දැනුම් දී ඇතැයි අපරාධ පරීක්ෂණ දෙපාර්තමේන්තුව දන්වා සිටියේය. සැකකරු වෙනුවෙන් කරන ලද ඉල්ලීම පිළිබඳ නීතිපතිවරයා වෙනුවෙන් පෙනී සිටින රජයේ නීතිඥවරයාට කරුණු දැක්වීම සඳහා අදාළ නඩුව මෙම මස 07 වැනිදා කැඳවන ලෙස මහෙස්ත්‍රාත්වරිය නියම කළාය.