Connect with us

පුවත්

රාජ්‍ය නිලධාරින්ගේ වාහන බලපත්‍ර අහෝසි කර නෑ

Published

on

රාජ්‍ය සේවයේ උසස් නිලධාරින්ට ලබා දෙන වාහන බලපත්‍රය අහෝසි කිරීමට රජය කිසිදු ප්‍රතිපත්තිමය තීරණයක් ගෙන නැතැයි කම්කරු අමාත්‍ය, ආර්ථික සංවර්ධන නියෝජ්‍ය අමාත්‍ය මහාචාර්ය අනිල් ජයන්ත ප්‍රනාන්දු මහතා පාර්ලිමේන්තුවේදී ඊයේ (23) ප්‍රකාශ කළේය.

රාජ්‍ය සේවයේ උසස් නිලධාරීන්ට මේ වන විට වාහන බලපත්‍ර 15,000ත් 20,000ත් අතර සංඛාවක් නිකුත්ව ඇති බවත් වාහන බලපත්‍ර සඳහා මේ මොහොතේ අවස්ථාව ලබාදුනහොත් අපේක්ෂිත ආර්ථික ඉලක්කවලට ළඟාවීම අපහසු වන බවත් ඇමැතිවරයා අවධාරණය කළේය.

ඒ අනුව මේ මොහොතේ පවතින්නේ ප්‍රමුඛතාව පිළිබඳ ගැටලුවක් මිස රාජ්‍ය නිලධාරීන්ට ලබාදෙන වාහන බලපත්‍ර අහෝසි කිරීම ගැන ගැටලුවක් නොවන බව ද කීවේය.

අමාත්‍ය අනිල් ජයන්ත ප්‍රනාන්දු මහතා මේ බව සඳහන් කළේ පාර්ලිමේන්තු මන්ත්‍රී නජිත් ඉන්දික මහතා මතු කරන ලද ප්‍රශ්නයකට පිළිතුරු දෙමිනි.

වාහන ආනයනය කිරීම සඳහා රජය තීරණය කළේ කරුණු ගණනාවක් කෙරෙහි දැඩි අවධානය යොමු කිරීමෙන් පසුව බව ද ඇමැතිවරයා පැවසීය. එවන් පසුබිමක් යටතේ තීන්දු තීරණ ගත යුත්තේ සමස්ත ආර්ථිකය කෙරෙහි අවධානය යොමු කරමින් බව ද ඇමැතිවරයා පැවසීය.

එහිදි වැඩිදුරටත් අදහස් දැක්වූ අමාත්‍යවරයා,

“වාහන ආනයනය නිදහස් කිරීමට පදනම් වුණේ සමස්ත ආර්ථිකය සැලකිල්ලට අරන්. 2025 වසර ක්‍රියාත්මක වන්නේ සාමාන්‍ය තලයක නෙවෙයි. ජාත්‍යන්තර මූල්‍ය අරමුදලේ පරාමිතීන් අනුව කටයුතු කිරීමට අපට සිදු වෙනවා. ඒ වගේම සංචිත ගැන අවධානය යොමු කරන්න වෙනවා

රාජ්‍ය ආදායම, බදු ක්‍රමය මේ සියල්ල ගැනම අවධානය යොමු කරන්නට වෙනවා. රජයට යම් ආදායමක් ලබා දෙන්නත් වෙනවා. වාහන පර්මිට්වලදී, රජයේ උසස් නිලධාරීන්ට ලබාදෙන ප්‍රතිලාභය අහිමි කරන්නට කිසිම අදහසක් නැහැ. මෙම ප්‍රතිලාභය ලබාදීමේදී අතීතයේදී ගත්ත ක්‍රියාමාර්ගවල වැරදි තිබිය හැකියි. නමුත් ඔවුන්ට සාධාරණ වැටුපක් හෝ වෙනත් කරුණු නිසා මේ වරප්‍රසාදය නොලැබුණා විය හැකියි. කෙසේ වෙතත් ඒවා වෙනම අධ්‍යයනය කළ හැකියි. ජාතික ජන බලවේගයේ ආණ්ඩුව විසින් කිසිම තීන්දුවක් අරගෙන නැහැ වාහන බලපත්‍ර අහෝසි කිරීමට. නමුත් මේ වසරට සාපේක්ෂව එන සීමාවන්ගේ පෙළගැස්වීම ප්‍රමුඛතාව අනුව දැනට නිකුත් වී ඇති බලපත්‍ර ප්‍රමාණය ගත්තම විශාල ප්‍රමාණයක්. එය 15,000ක් – 20,000ක් පමණ වෙනවා. විදේශීය සංචිත පිළිබඳව අවධානය යොමුකර පර්මිට්වලට ඉඩ ඇරියොත් අපගේ ඉලක්කවලට ළඟාවීමට බැරිව යනවා. ඒ නිසා ප්‍රමුඛතාව පිළිබඳ ප්‍රශ්නයක් මිස අහෝසි කිරීමට කිසිදු ප්‍රතිපත්තිමය තීරණයක් අරගෙන නැහැ”.

එමෙන්ම පාර්ලිමේන්තු මන්ත්‍රීනි ලක්මාලි හේමචන්ද්‍ර මෙණෙවිය මතු කරන ලද ප්‍රශ්නයක් සඳහා ඇමැතිවරයා මෙසේ ද පැවසීය.

“ජාත්‍යන්තර මූල්‍ය අරමුදලේ විවිධ එකඟතා අනුව අපට කටයුතු කිරීමට සිදු වෙනවා. ඒ වගේම පැවැති තත්ත්වය අනුව වසර ගණනාවක් වාහන ආනයනය නතර කර තිබුණා. වාහන ආනයනය කිරීමට යම් ඉඩක් ලබාදිය යුතුයි කියන මතයේ අපි ඉන්නවා. ඒ වගේම ආර්ථිකය ප්‍රසාරණය වීමේදී නිෂ්පාදනය වැඩි වෙන කොට වාහන අවශ්‍ය වෙනවා. ඒ නිසා පියවර කිහිපයක් යටතේ, අදියර කිහිපයක් යටතේ කටයුතු කිරීමට අපට සිදු වෙනවා. එහිදි ආර්ථිකයට සම්බන්ධ වන කොටසට තමයි මූලික අවස්ථාව ලබා දුන්නේ. ඒ වගේම භාණ්ඩ ප්‍රවාහනය සඳහා දෙවනුවත් තෙවනුව පෞද්ගලික වාහන සඳහාත් අවස්ථාව ලබාදීමට තීරණය කර තිබෙනවා.

අපි තේරුම්ගත යුතුයි සිරවෙලා, වට්ටලා තිබුණු තැනකදී වාහන ආනයනයේදී විදෙස් සංචිත මෙතෙන්ට බලපානවා. දේශීය සංචිතවල යම් වර්ධනයක් තිබෙනවා, ඩොලර් බිලියන 6 ඉක්ම වන පරිදි. වාහන ආනයනය සඳහා ඒ සියල්ල භාවිත කරන්නත් බැහැ. ඉල්ලුමට සරිලන පරිදි වෙළෙඳපොළ විවෘත කළොත් මේ සංචිත සියල්ල අවසාන වෙන්න පුළුවන්. මෙතනදී සැලකිය යුතු මට්ටමක් කෙරෙහි තමයි අපට අවධානය යොමු කරන්න පුළුවන් වෙන්නේ. ඒ අනුව මුදල් අමාත්‍යාංශය හා මහ බැංකුව දෙන උපදෙස්, විශ්ලේෂණ සැලකිල්ලට ගෙන ඉදිරියට ගෙන යනවා. ලීසිං සමාගම් ආරක්ෂා කර ගැනීම වෙනුවෙන් විවිධ උත්සාහයන් දරනවා කියලා සමාජ මාධ්‍ය තුළත් විවිධ මත පළ වෙනවා. නමුත් ජාතික ජන බලවේගයේ ආණ්ඩුව කිසිම පුද්ගලයෙක්, කණ්ඩායමක් ආරක්ෂා කර ගැනීම වෙනුවෙන්, එක් පිරිසකට පහර දීම වෙනුවෙන් කටයුතු කරන්නේ නැහැ. සමස්තය ආරක්ෂා කර ගැනීම වෙනුවෙන් කටයුතු කරනවා.

ඒ වාහන ආනයනය කිරීමට කලින් මිල වැඩි වීම වුණොත් උද්ධමනයට සාපේක්ෂව මිල ගණන් ගැළපීමක් සිදු කළ යුතුයි. ඒ උද්ධමන අනුපාතය අනුවයි මිල ගණන් වැඩි වීම සිදුව ඇත්තේ. තෝරා ගත්ත කණ්ඩායමක් ආරක්ෂා කිරීමටවත්, තෝරා ගත්ත කණ්ඩායමකට අසාධාරණයක් සිදු කිරීමටවත් ජාතික ජන බලවේගය කටයුතු කරන්නේ නැහැ. එසේ තීන්දු තීරණ ගන්නෙත් නැහැ.”

පුවත්

කිළිනොච්චි රෝහල් එක්ස් කිරණ කාමරේ ගිනිගනියි, ගිනිනිවන බඩු කල් පැනලා ගින්න නිවන්න කල් යයි!

Published

on

By

කිළිනොච්චිය රෝහලේ එක්ස් කිරණ කාමරය තුළ ඊයේ (15) හදිසියේම ගිනි ගැනීම නිසා එහි තිබූ උපකරණ රැසක් ගින්නට හසු වී විනාශ වී ගොස් තිබේ.

මේ අවස්ථාවේදී රෝහලේ සවිකොට තිබූ ගිනි නිවන උපකරණ සියල්ලම භාවිත කිරීමට රෝහල් සේවකයින් පියවර ගෙන ඇති නමුත් ඒවා යල්පැන ගිය ගිනි නිවන උපකරණ නිසා ඒවා නිසි ලෙස ක්‍රියාත්මක වී නොමැති බව පැවසේ.

කිළිනොච්චිය රෝහල තුළම වෙනත් ව්‍යාපෘතියක් යටතේ ඉදි කොට තිබූ ගොඩනැගිල්ලක සවි කොට තිබූ ගිනි නිවන උපකරණ කීපයක් ගලවා ගෙන පැමිණි සේවකයින් විසින් දැඩි වෙහෙසක් දරා ගින්න පාලනය කර ගැනීම නිසා ඉතා වටිනා භාණ්ඩ හා උපකරණ අසුරා තිබූ එක්ස්‍ කිරණ කාමරයට ගින්න පැතිර යාම වළක්වා ගැනීමට හැකි වී තිබේ.

කෙසේවෙතත් මෙම ගින්න හේතුවෙන් විනාශ වී ගිය බොහෝ උපකරණ යළි භාවිතයට ගැනීමට නොහැකි වීම නිසා රුපියල් ලක්ෂ 25 ක පමණ අලාභයක් කිළිනොච්චිය රෝහලට සිදුව ඇත.

මෙම ගින්න හට ගැනීමට හේතුව මෙතෙක් අනාවරණය වී නොමැත.

කිළිනොච්චිය පොලීසිය මේ සම්බන්ධයෙන් පරීක්ෂණ පවත්වා ගෙන යන අතරතුර කිළිනොච්චිය රෝහල මගින්ද මෙම ගින්න සම්බන්ධයෙන් අභ්‍යන්තර මට්ටමේ පරීක්ෂණයක් ආරම්භ කොට තිබේ.

කෙසේවෙතත් කිළිනොච්චිය රෝහලේ සවිකොට ඇති සියලුම ගිනි නිවන උපකරණ කල් ඉකුත් වී වසර කීපයක්ම ගත වී ඇති බව රෝහල කළ පරීක්ෂණ වලින් දැනට හෙළි වී තිබේ.

Continue Reading

පුවත්

ගොවීන්ගෙන් ආණ්ඩුවට වී කිලෝ 700යි 

Published

on

By

වී අලෙවි මණ්ඩලයේ ගබඩාවලට ඉකුත් සතියේ දී ගොවීන් අලෙවි කර ඇත්තේ කිලොග්‍රෑම් 700 ක වී තොගයක් පමණක් බව වාර්තා වේ. 

අම්පාර දිස්ත්‍රික්කයේ වී ගබඩාවකට මෙම වී තොගය ලැබී තිබේ.

රජය වී මිලදී ගැනීමේ වැඩපිළිවෙළ ආරම්භ කරනු ලැබුවේ ඉකුත් 06 වැනිදා සිටය. 

කෙසේවුවද, පෞද්ගලික අංශය වේලන ලද නාඩු, සම්බා වී කිලෝවක් රුපියල් 120 ත් 130 ත් අතර මිලකට මිලදී ගන්නා බව ගොවීන් කියා සිටිති. 

වී තොග රැස්කරන්නන් රැසක් කුඹුරටම ගොස් වී මිලදී ගෙන මහා පරිමාණ සහල් ව්‍යාපාරිකයන්ට අලෙවි කරන බවද පැවසේ.

මේ අතර, ශ්‍රී ලංකා මහ බැංකුව සහ හෙක්ටර් කොබ්බෑකඩුව ගොවි කටයුතු පර්‌යේෂණ ආයතනයේ වාර්තාවලට අනුව තවමත් වෙළෙඳ පොළේ සහල් අලෙවි කෙරෙන්නේ රජයේ පාලන මිල ඉක්මවා බවද පැවසේ. 

ඇතැම් ගොවීන් වී තොග අලෙවි නොකර, වී මිල තවත් වැඩිවනතුරු සිය නිවෙස්වල ගබඩා කරගෙන සිටින බව ද වාර්තා වේ.

මූලාශ්‍රය – අරුණ

Continue Reading

පුවත්

නවදිල්ලි දුම්රියපලේ තෙරපී 18ක් මරු දකියි!

Published

on

By

ඉන්දියාවේ නවදිල්ලි දුම්රිය ස්ථානයේ ඇති වූ තෙරපුමකින් පුද්ගලයින් 18 දෙනෙකු මියගොස් තිබේ.

සිද්ධියෙන් තවත් පුද්ගලයින් රැසක් තුවාල ලබා ඇතැයිද ඉන්දීය මාධ්‍ය වාර්තා කර ඇත.

ප්‍රයාග්‍රාජ් හී මහා කුම්භමේලා උත්සවය සඳහා දුම්රියවලට නැගීමට උත්සාහ කළ මගීන්ගේ හදිසි තදබදය මීට හේතුව බවද එම මාධ්‍ය වාර්තාවල සඳහන් වේ.

Continue Reading
Advertisement

Trending

Copyright © 2023 Sri Lanka Mirror. All Rights Reserved