රේගුවේ හා වරායේ රාජසන්තක කර වෙන්දේසි කරන භාණ්ඩ කන්ටේනර් රජයට කෝටි ගණනක් පාඩුකරමින් අඩු මිලට පාතාල කල්ලිවලට ලබාදීමේ ජාවාරමක් සම්බන්ධයෙන් හෙළිදරව් වී තිබේ.
රේගුවේ හා වරායේ දූෂිත නිලධාරින් සහ ව්‍යාපාරිකයන් කිහිප දෙනකු හා පාතාල සාමාජිකයන් පිරිසක් එක්ව මෙම වංචාව සිදුකරනු ලබන බව පැවසේ.
මෙවැනි වෙන්දේසියක් පෙරේදා (14) දිනයේදීත් කොළඹ වරායේදී
පනත්වා ඇතැයි පැවසේ.
කොළඹ වරායේ වෙන්දේසිවල බලය අල්ලා ඇති වරායට සම්බන්ධ ව්‍යාපාරිකයකු ඇතුළු කල්ලියක් මෙම වෙන්දේසියේදීත් අනෙක් ව්‍යාපාරිකයන් බියවද්දා ටෙන්ඩර් ගැනීමට සැලසුම් කර තිබේ.
කෙසෙල්වත්ත පාතාලය, මාලිගාවත්ත පාතාලය හා ඛෙත්තාරාම ප්‍රදේශය කේන්ද්‍ර කරගත් පාතාල කල්ලි තුනක ප්‍රබල චරිතද මෙම වෙන්දේසියට එක් වූ බව බුද්ධි අංශ තොරතුරු අනාවරණ කරගෙන ඇත.
මෙම ජාවාරමට සම්බන්ධ ප්‍රධානම ව්‍යාපාරිකයා වෙන්දේසිය සඳහා පැමිණෙන ව්‍යාපාරිකයන්ගේ ටෙන්ඩර් පත්‍රිකා තමාගේ ටෙන්ඩර් පත්‍රිකා පෙට්ටියට දමන ලෙස බලපෑම් කර ඇති බව අනාවරණ විය.
මෙදින ටයිල්, වාහන අමතර කොටස්, රෙදිපිළි ඇතුළු රාජසන්තක කළ කන්ටේනර් 52 ක් වෙන්දේසියට ඉදිරිපත් කර ඇත.
මෙරට මහා පරිමාණ සුදුලූනු වංචාවක් හා කුණු මාලු වරායෙන් පන්නා විකුණූ ජාවාරමකටද සම්බන්ධ ව්‍යාපාරිකයකු පාතාලය සමග එක්වී සියලු ටෙන්ඩර් තමා අතට ගැනීමට උත්සාහ කර ඇත.
මෙයාලා ටෙන්ඩර් එකට එන අයව බය කරලා ටෙන්ඩර් ෆෝම් ටික ඔක්කොම එයාලගේ පෙට්ටියට දා ගන්නවා. ඊට පස්සේ කස්ටම් එකේ ටෙන්ඩර් බොක්ස් එකට එයාලගේ පුරවපු ටෙන්ඩර් ෆෝම් විතරයි දාන්නේ. එතකොට කෝටියකට විකුණන්න පුළුවන් කන්ටේනරයකට මෙයාලා ලක්ෂ හතළිහක් විතර දාලා ගන්නවා. අරගෙන එයාලගේ බොක්ස් එකට ෆෝම් එක පුරවලා දාපු මුදලාලිලාට එතැනම විකුණනවා.
මෙයාලා සෙකන්ඩ් සේල් කියලා මේ මාෆියාව කරගෙන යන්නේ. එතකොට අර ව්‍යාපාරිකයා කෝටියකට කන්ටේනරය ගන්න දැම්ම නම් මෙයාලා ලක්ෂ හතළිහට අරන් ලක්ෂ හැටක්ම එතැනම ලාභ තියන් විකුණනවා.
වැට්, ටැක්ස් සියල්ල අඩු කරලා හැමෝටම ලාභ වෙන විදියට කරලා නිලධාරින්ටයි, පාතාලයටයි සියලු සල්ලි බෙදා ගන්නවා.’’ යැයි ටෙන්ඩරයට මුල් වූ අයකු මාධ්‍යට අනාවරණය කර තිබේ.
මෙහිදී එක් එක් ව්‍යාපාරිකයන්ට ටෙන්ඩර් පත්‍රිකා සමග ගෙවූ අත්තිකාරම් මුදල සමග ලක්ෂ පහ, දහය දීලා එයාලා ලාභ බෙදා ගන්නවා. සමහරු ණයට ලක්ෂ දහය, පහළව අරන් ඇවිත් ටෙන්ඩර් ෆෝම් දාලා එදාට බිස්නස් එක කරගෙන යනවා යැයි තවත් ව්‍යාපාරිකයකු පැවසීය.
විවිධ බලපෑම් කර මෙම ටෙන්ඩරයට එක් වූ ව්‍යාපාරිකයකු බිය වද්දා තිබුණද ඔහු තනිවම සටන් කිරීම නිසා ටයිල් කන්ටේනර් වෙන්දේසියේදී ජාවාරමුන්ට එය අඩු මිලට ගැනීමට නොහැකි වූ බව හෙළි විය.
එතැන ලක්ෂ 80 කට ටයිල් කන්ටේනරය උස්සන්න බායිලා සෙට් වුණා. එක්කෙනෙක් ෆයිට් කරලා සටන අත්හැරපු නැති නිසා ඒ කන්ටේනරය ලක්ෂ 380 කට ගියා. එහෙම නැති වුණා නම් එතැන කෝටි තුනම උන්ගේ සාක්කුවට වැටෙන්නේ. අනිත් කන්ටේනර් උන්ට ඕන විදියට බෙදාගත්තා යැයි වෙන්දේසියට එක්ව සිටි නිලධාරියකු මාධ්‍යට පවසා ඇත.
මෙහිදී වෙන්දේසියට මුවාව රජයට කරන කෝටි ගණනක වංචාව ඉහළ පෙළේ නිලධාරින් දැනුවත් කිරීමට පෙරේදා (14 වැනිදා) දිනයේම පියවර ගත් බව හෙතෙම පවසා තිබේ.
මේ සම්බන්ධව අපරාධ පරීක්ෂණ දෙපාර්තමේන්තුවට හා ආරක්ෂක අමාත්‍යාංශය වෙතද පැමිණිලි කිරීමට ඊයේ (15 වැනිදා) වන විට කටයුතු යොදා ඇත.
මෙම ජාවාරම කලක සිට රහසිගතව කරගෙන ගොස් ඇති අතර මාසිකව ටෙන්ඩර් කර ඇති බවද හෙළිව තිබේ.
මූලාශ්‍රය – අරුණ
