තලවකැලේ ප්‍රදේශයේ ග්‍රාමීය බැංකු 11 ක් විසින්, සේවක අර්ථසාධක අරමුදලින් ලබාදෙන, 30% පූර්ව ප්‍රතිලාභ ලබා ගැනීම සඳහා ව්‍යාජ ලියකියවිලි ඉදිරිපත් කර, වතු කම්කරුවන් 5000 කට වැඩි පිරිසකගෙන්, රුපියල් කෝටි 100 කට අධික මුදලක්, වංචා කර ඇති බව, වතු කම්කරු මධ්‍යස්ථානයේ සංවිධායක ලේකම්, මාක්ස් ප්‍රභාකර් පවසයි.

ඒ බව ඔවුන් අපරාධ පරික්ෂණ දෙපාර්තමේන්තුවට, අල්ලස් හා දූෂණ විමර්ශන කොමිෂන් සභාවට සහ විගණකාධිපති දෙපාර්තමේන්තුවට පැමිණිලි කර තිබේ.

ඔහු වැඩිදුරටත් කියා සිටින්නේ, තලවකැලේ සමුපකාර බල ප්‍රදේශයේ හා ඊට පරිබාහිර වතු කම්කරුවන්, තැරැව්කරුවන් මගින් ගෙන්වා ගන්නා, ග්‍රාමීය බැංකු නිලධාරින්, ඔවුන්ට බැංකු ගිණුමක් ආරම්භ කර, සුළු ණය මුදලක් නිකුත් කර ඇති බවය.

පසුව සේවක අර්ථසාධක අරමුදලේ 30% පූර්ව ප්‍රතිලාභ මුදල ලබාගැනීම සඳහා, පෙර දිනයක් යොදා, සමුපකාර සමිතිය විසින් සේවක අර්ථසාධක අරමුදලට ව්‍යාජව සකස් කළ ලිපියක් මඟින්, අදාළ පුද්ගලයා 30% ප්‍රතිලාභයට සමාන ණය මුදලක් ලබාගෙන ඇති බැවින්, එය පියවීම සඳහා අදාළ ප්‍රතිලාභය තම ගිණුමට බැර කරන ලෙස දන්වා යවා ඇති බවයි.

සේවක අර්ථසාධක අරමුදල විසින් එම මුදල බැංකුවට චෙක්පතකින් එවීමෙන් අනතුරුව, සම්පූර්ණ ප්‍රතිලාභයටම අදාළව විශාල පොලියක් අයකර, ඔහුට ලබාදී ඇති සුළු ණය මුදලට අදාළ පොලිය පමණක් බැංකු ගිණුමට බැර කර, ඉතිරි පොලී මුදල් බැංකු බලධාරීන් බෙදා ගෙන ඇති බව, වතු කම්කරුවන් විසින් වතු කම්කරු මධ්‍යස්ථානය වෙත පැමිණිලි කර ඇති බවත් ඔහු පවසයි.

එසේම මෙම ගණුදෙනුවට අදාළ ගිණුම් විස්තර, අයකරගත් පොලී මුදල සඳහන් බැංකු පාස් පොතක්, වෙනත් කුවිතාන්සියක් හෝ ලිපිලේඛණ කිසිවක් වතු කම්කරුවන්ට ලබාදී නොමැති බවත්, මෙම වංචාව සිදුකොට ඇත්තේ තලවකැලේ නව සමුපකාර සමිතියේ සභාපති සහ අධ්‍යක්ෂ මණ්ඩලයේ පූර්ණ එකඟතාවය හා මඟපෙන්වීම මත බව පෙනියන බැවින්, රාජ්‍ය මුදල් විශාල ලෙස වංචා කිරීම සම්බන්ධයෙන් කඩිනම් පරික්ෂණයක් සිදුකරන ලෙසට, ඉකුත් 07 දා තම සංවිධානය අපරාධ පරික්ෂණ දෙපාර්තමේන්තුවට, අල්ලස් හා දූෂණ විමර්ශන කොමිෂන් සභාවට සහ විගණකාධිපති දෙපාර්තමේන්තුවට පැමිණිලි කළ බවත් ඔහු වැඩිදුරටත් කියා සිටියි.