පුවත්
වතුකරයේ පාසල් නවීකරණ ව්‍යාපෘතියට ලබාදෙන ඉන්දීය ප්‍රදානය දෙගුණ කරයි
ශ්‍රී ලංකාවේ ඉන්දීය මහ කොමසාරිස් සන්තෝෂ් ජා මහතා සහ අධ්‍යාපන සහ විද්‍යා සහ තාක්ෂණ අමාත්‍යාංශයේ ලේකම් ජේ. එම්. තිලකා ජයසුන්දර මහත්මිය විසින් 2024 ඔක්තෝබර් 18 වන දින ශ්‍රී ලංකාවේ වතුකරයේ පාසල් 9ක් නවීකරණය කිරීම සඳහා ඉන්දීය රජය විසින් ලබාදෙන ප්‍රදාන දෙගුණ කිරීම සම්බන්ධයෙන් නිල රාජ්‍ය තාන්ත්‍රික ලේඛන අත්සන් තබා හුවමාරු කර ගන්නා ලදී.
ශ්‍රී ලංකා රජයේ ඉල්ලීමකට අනුව ලබා දෙන අමතර අරමුදල් සමඟ ව්‍යාපෘතිය සඳහා ඉන්දීය රජයේ සමස්ත කැපවීම ශ්‍රී ලංකා රුපියල් මිලියන 600ක් වේ.
මෙම ව්‍යාපෘතියේ අරමුණ ශ්‍රී ලංකා රජය විසින් හඳුාගන්නා ලද වතුකරයේ පාසල් 9ක යටිතල පහසුකම් ඉහළ නැංවීමයි. මධ්‍යම පළාතේ පාසල් 6ක් සහ ඌව, සබරගමුව සහ දකුණු පළාතේ පාසල් එක බැගින් පාසල් තුනක් මෙම ව්‍යාපෘතියට ඇතුළත් වේ.
මෙම ව්‍යාපෘතිය අධ්‍යාපනය යන වැදගත් ක්ෂේත්‍රය තුළ ඉන්දියාව විසින් ශ්‍රී ලංකාවේ ක්‍රියාත්මක කරන ලද සහ දැනට ක්‍රියත්මක කරන සංවර්ධනසහයෝගීතා මුලපිරීම් රැස අතරින් එකකි. යටිතල පහසුකම් සංවර්ධනය සහ උපකරණ සැපයීමට අමතරව පුහුණුව ලබා දීම සහ ධාරිතා සංවර්ධනය ශ්‍රී ලංකාවේ අධ්‍යාපන ක්ෂේත්‍රය තුළ ඉන්දියාවේ සංවර්ධන සහයෝගිතා ව්‍යාපෘතීන් සඳහා විශේෂ අවධානයක් යොමු වන ක්ෂේත්‍රයක් වේ. උතුරු පළාතේ පාසල් 100කට අධික සංඛ්‍යාවක් ප්‍රතිසංස්කරණය කිරීම;දකුණු සහ නැගෙනහිර පළාතේ ඉ-පුස්තකාල 40ක් ස්ථාපනය කිරීම;දිවයින පුරා අධ්‍යාපන ආයතනවලට බස් රථ 110ක් සැපයීම;දිවයිනේ සෑම පළාතකම ඉංග්‍රීසි භාෂා රසායනාගාර පිහිටුවීම;රුහුණ විශ්ව විද්‍යාලයේ රවින්ද්‍රනාත් තාගෝර් අනුස්මරණ ශ්‍රවණාගාරය ඇතුළුදිවයින පුරා විවිධ ආයතනයන්හි ශ්‍රවණාගාර ඉදිකිරීම සහ නවීකරණය කිරීම;උතුරු මැද පළාතේ බහු ජාතික ත්‍රෛ භාෂා පාසලක් ඉදිකිරීම;මධ්‍යම පළාතේ හැටන්හි තොණ්ඩමන් වෘත්තීය පුහුණු මධ්‍යස්ථානය සහ නැගෙනහිර පළාතේ වන්තරමුල්ලෙයි සහ ඔන්තච්චිමඩම් මධ්‍යස්ථාන වැනි වෘත්තීය පුහුණු මධ්‍යස්ථාන සඳහා සහයෝගය ලබා දීම; දකුණු පළාතේ ගාල්ලේ පාසල් 200ක සුහුරු පන්ති කාමර සහ පරිඝනක විද්‍යාගාර ස්ථාපනය කිරීම වැනි පියවර අධ්‍යාපන ක්ෂේත්‍රය තුළ ක්‍රියාවට නංවා ඇති වැඩසටහන් කිහිපයක් පමණි. ඉන්දීය සම්භවයක් සහිත දමිළ ප්‍රජාව ශ්‍රී ලංකාවට පැමිණ වසර 200ක් ගතවීම සනිටුහන් කරමින් පසුගිය වසරේදී ප්‍රකාශයට පත් කරන ලද ඉන්දියනු රුපියල් මිලියන 750ක බහු ආංශික ප්‍රදාන පැකේජය යටතේ වතුකරයේ පාසල්වල විද්‍යාව, තාක්ෂණය, ඉංජිනේරු විද්‍යාව සහ ගණිතය (STEM) යන විෂයන් සඳහා ත්‍රෛමාසික ගුරු පුහුණු වැඩසටහනක් ද මෑතකදී පැවත්වීය.
ශ්‍රී ලංකාව තුළ සිදුව තිබෙන දේශපාලනික පරිවර්තනය පිළිබඳ පණිවිඩය ජාත්‍යන්තරයට ගෙන යාම හා ජාත්‍යන්තරය හමුවේ ශ්‍රී ලංකාවේ ප්‍රතිරූපය ඔසවා තැබීම තානාපතිවරුන් සතු වගකීමක් බව ජනාධිපති අනුර කුමාර දිසානායක මහතා ප්‍රකාශ කළේය.
ජනාධිපති අනුර කුමාර දිසානායක මහතා මෙම අදහස් පළ කළේ විදෙස් රටවල් කිහිපයක් සඳහා ශ්‍රී ලංකා තානාපතිවරුන් ලෙස පත්ව යන නව දූත මණ්ඩල ප්‍රධානීන් සමඟ ජනාධිපති කාර්යාලයේ අද (15) පැවති සාකච්ඡාවේදීය.
විදේශගත ශ්‍රී ලාංකිකයින්ට සේවා සැපයීමේදී ඒ සඳහා මූලිකත්වය දෙමින් විශේෂ අවධානයකින් කටයුතු කරන ලෙසත්, කිසිදු භේදයකින් තොරව සාධාරණව කටයුතු කරන ලෙසත් ජනාධිපතිවරයා නව රාජ්‍යතාන්ත්‍රිකයන්ට උපදෙස් ලබා දුන්නේය.
ශ්‍රී ලංකා තානාපති කාර්යාලය ශ්‍රී ලාංකිකයන්ගේ තැනක් ලෙස ඔවුන්ට හැඟෙන පරිදි කටයුතු කළ යුතු බව පෙන්වා දුන් ජනාධිපතිවරයා, රට වෙනුවෙන් තම සේවය කාර්යක්ෂමව සිදු කිරීමට කටයුතු කරන ලෙසද කියා සිටියේය.
ඍජු විදේශ ආයෝජන ආකර්ෂණය කර ගැනීම සඳහා මෙන්ම ශ්‍රී ලංකාවේ සිටින ව්‍යවසායකයින්ට විදේශ වෙළෙඳපොළ අවස්ථා සොයා ගැනීමට අවශ්‍ය සම්බන්ධීකරණය රාජතාන්ත්‍රික සේවාවේ කොටසක් බවද ජනාධිපති අනුර කුමාර දිසානායක මහතා ප්‍රකාශ කළේය.
ඒ අනුව, මෙරට ආර්ථිකය නඟාසිටුවීම සඳහා සෘජු විදේශ ආයෝජන හා සංචාරකයින් කැඳවා ගෙන ඒම තානාපතිවරයාට පැවරෙන ප්‍රධාන වගකීමක් බවත් ඒ සඳහා අවශ්‍ය සහයෝගය ලබා දීමට රජය සූදානම් බවත් ජනාධිපති අනුර කුමාර දිසානායක මහතා සඳහන් කළේය.
ශ්‍රී ලංකාවේ සිදු වූ ඇතැම් සිදුවීම් නිසා පසුගිය කාලයේ තානාපතිවරුන් අපහසුතාවට පත්ව ඇති බවත් වත්මන් ආණ්ඩුව තානාපතිවරුන්ගේ ගෞරවයට හානි වන දෑ නොකරන බවත් කී ජනාධිපතිවරයා තානාපතිවරුන් වෙනුවෙන් ආණ්ඩුව ඕනෑම අවස්ථාවක පෙනී සිටින බවද සඳහන් කළේය.
නව දූත මණ්ඩල ප්‍රධානීන් ලෙස ඉන්දියාවේ ශ්‍රී ලංකා මහකොමසාරිස් ලෙස පී.එම්. කොලොන්නෙ, පකිස්ථානයේ ශ්‍රී ලංකා මහකොමසාරිස් ලෙස රියර් අද්මිරල් ෆ්‍රෙඩ් සෙනෙවිරත්න, එක්සත් රාජධානියේ ශ්‍රී ලංකා මහකොමසාරිස් ලෙස එස්.ඩී.එන්.යු. සේනාධීර, අමෙරිකානු නිව්යෝක් එක්සත් ජාතීන්ගේ නිත්‍ය නියෝජිත ලෙස ජයන්ත ජයසූරිය, කියුබාවේ ශ්‍රී ලංකා තානාපති ලෙස ආර්.එම්. මහින්ද රත්නායක, ජපානයේ ශ්‍රී ලංකා තානාපති ලෙස මහාචාර්ය පී. ජනක් කුමාරසිංහ, එක්සත් අරාබි එමීර් රාජ්‍යයේ ශ්‍රී ලංකා තානාපති ලෙස මහාචාර්ය අරූෂා කුරේ යන මහත්ම මහත්මීහු මෙලෙස පත්වීම් ලැබ සිටිති.
විදේශ කටයුතු අමාත්‍යාංශයේ ලේකම් අරුණි රණරාජා, ජනාධිපති ජ්‍යෙෂ්ඨ අතිරේක ලේකම් රෝෂන් ගමගේ යන මහත්ම මහත්මීහුද මෙම අවස්ථාවට එක් වූහ.
ලුණු ආනයනයට කැබිනට් අනුමැතිය
සැප වාහන වෙන්දේසියෙන් මිලියන 200 ඉක්මවූ මුදලක් (Update)
