සිය ජීවිතයට බරපතළ තර්ජනයක් එල්ල වන ආකාරයට ජනතා විමුක්ති පෙරමුණේ මධ්‍යම කාරක සභික වසන්ත සමරසිංහ මහතා සිදු කර ඇති ප්‍රකාශයක් සම්බන්ධයෙන් විමර්ශනයක් පවත්වන ලෙස ශ්‍රී ලංකා ගුවන් විදුලි සංස්ථාවේ සභාපති හඩ්සන් සමරසිංහ මහතා අපරාධ පරීක්ෂණ දෙපාර්තමේන්තුවට පැමිණිල්ලක් ඉදිරිපත් කර ඇනැයි “දිනමිණ” පුවත්පත වාර්තා කර ඇත. 

එම පැමිණිල්ලට අනුව අපරාධ පරීක්ෂණ දෙපාර්තමේන්තුවේ පරිගණක අපරාධ විමර්ශන ඒකකය මඟින් මේ වන විටත් විමර්ශනයක් ආරම්භ කර ඇති බවද එහි වැඩිදුරටත් දැක්වේ.

හඩ්සන්ට මෙසේ තර්ජනය කළ බවට වන ප්‍රවෘත්තියක් පසුගිය 14 වැනිදා සිළුමිණ පුවත්පත ද වාර්තා කර තිබිණි.

ඊට අමතරව, ඊයේ (23) උදෑසන ගුවන් විදුලියේ ස්වදේශීය සේවයේ පැයක වැඩ සටහනක් ඉදිරිපත් කරන අතර හඩ්සන් මහතා ද කියා සිටියේය.

මේ අතර, අමාත්‍ය බන්දුල ගුණවර්ධන මහතා ද මේ සිද්ධිය සම්බන්ධයෙන් පාර්ලිමේන්තුවේදී ප්‍රකාශයක් කරමින් ශ්‍රී ලංකා ගුවන් විදුලි සංස්ථාවේ සභාපති හඩ්සන් සමරසිංහ මහතාට ජාතික ජන බලවේගයේ ජාතික විධායක සභික වසන්ත සමරසිංහ මහතා විසින් මරණීය තර්ජන එල්ල කිරීම තරයේ හෙළා දුටුවේය.

ඡන්දයෙන් ගනුදෙනුව බේරාගන්නා බවත්, රට පනින්න ඉඩ නොදෙන අතර  හැංගෙන්නට ඉඩක් නොලැබෙන්නේ යැයි ද, හඩ්ඩලාට නවතින්න වන්නේ හඳේ තමයි යනුවෙන්ද වසන්ත සමරසිංහ මහතා කළ තර්ජනය සමාජ මාධ්‍යයෙහි සැරිසරන බවද එහිදී ගුණවර්ධන මහතා කීය.

ඡන්දයෙන් පසුව රට පැන්නොත් එම රටවල වැඩිපුර සිටින්නේ මාලිමාවේ නියෝජිතයෙන් බැවින් ඔවුන් ඒ ගැන බලාගනු ඇතැයිද වසන්ත සමරසිංහ මහතා කියා ඇතැයි ජනමාධ්‍ය අමාත්‍යවරයා සඳහන් කළේය.

සාධාරණ හා නිදහස් මැතිවරණයක් පැවැත්වීම සඳහා මෙවැනි තර්ජන නතර කරන ලෙස ජනමාධ්‍ය අමාත්‍යවරයා ලෙස ජනතා විමුක්ති පෙරමුණෙන් ඉල්ලා සිටින බවත් මාධ්‍යකරුවකුට තර්ජනයක් තිබේ නම් අපරාධ පරීක්‍ෂණ දෙපාර්තමේන්තුවට ගොස් පැමිණිල්ලක් කළ විට ඔවුන්ට අවශ්‍ය ආරක්ෂාව ලබාදෙන බවත් බන්දුල ගුණවර්ධන මහතා පැවසීය.

ප්‍රචණ්ඩත්වයෙන් තොර ජනාධිපතිවරණ ව්‍යාපාරයක් සඳහා කටයුතු කරමු යැයි යෝජනා කරන බව ද අමාත්‍යවරයා එහිදී කීය.

මේ අතර, ශ්‍රී ලංකා ගුවන් විදුලි සංස්ථාවේ සභාපති හඩ්සන් සමරසිංහ මහතාට ජාතික ජන බලවේගයේ ජාතික විධායක සභික වසන්ත සමරසිංහ මහතා විසින් මරණීය තර්ජන එල්ල කර ඇති බවට මාධ්‍ය වාර්තා පලව තිබුණ ද ඒ සම්බන්ධයෙන් මෙතෙක් හඩ්සන් මහතා පොලිසියට පැමිණිල්ලක් සිදුකර නැතැයි “ලංකා ටෲත්” වාර්තා කර ඇත.