Connect with us

පුවත්

වසන්තගේ ඝාතනයට KPI සම්බන්ධ බවට පොලිසියට සැකයක්!

Published

on

අතුරුගිරියේ ටැටූ මධ්‍යස්ථානයක් විවෘත කිරීමේ උත්සවයක් අතරතුර පිරිසක් අද (08) සිදුකළ වෙඩිතැබීමේ සිද්ධියට සංවිධානාත්මක අපරාධකරුවෙකු වන කංජිපානි ඉම්රාන් නොහොත් මොහොමඩ් නජීම් මොහොමඩ් ඉම්රාන්‍ගේ සම්බන්ධයක් ඇති බවට පොලීසිය සැක පලකර තිබේ.

ඒ අපරාධය වූ ස්ථානයේ තිබී සොයාගත් පතොරම් කොපු කිහිපයක ”KPI” ලෙස යෙදුමක් සඳහන්ව තිබූ නිසාය.

අතුරුගිරිය නගර මංසන්ධියේ ඔරලෝසු කණුවේ සිට ඔරුවල පාරෙහි මීටර් 50ක පමණ දුරකින් පිහිටි එම ගොඩනැගිල්ලේ උඩුමහලේ, සමෙහි පච්ච කෙටීම සිදුකරන, එනම් ටැටූ ආයතනයක් විවෘත කෙරුණේ අද පෙරවරුවේය.

ඒ ටැටූ නිර්මාණකරුවෙකු බව කියන දුලාන් සංජුල නමැත්තෙකු විසිනි.

ඊට ප්‍රධාන ආරාධිතයින් ලෙස, ප්‍රසිද්ධ ව්‍යාපාරිකයෙකු වන සුරේන්ද්‍ර වසන්ත පෙරේරා නොහොත් ක්ලබ් වසන්ත සහ ඔහුගේ බිරිඳ මෙන්ම ජනප්‍රිය ගායන ශිල්පිණී කේ. සුජීවා යන මහත්ම මහත්මීන් ආරාධනා ලැබ තිබුණි.

වෙඩිතැබීම සිදුව තිබුණේ එම උත්සවය අතරතුරය.

වෙඩි තැබීම සිදුවන අයුරු CCTV කැමරාවලද සටහන්ව තිබුණි.

ඔරුවල පාර ඔස්සේ පෙරවරු 10.15ට පමණ පැමිණි සුදු පැහැති මෝටර් රථයක් ඔරලෝසු කණුව වටරවුමෙන් නැවත ඔරුවල පාරටම හරවා එම ගොඩනැගිල්ල අසල මාර්ගයේ නතර කරන අයුරු එහි සඳහන්ය.

පසුව ගිනිඅවි අතැති දෙදෙනෙකු උඩු මහලේ ටැටූ මධ්‍යස්ථානයට ඇතුළු වී වෙඩිතබන ආකාරය CCTV කැමරාවලද සටහන්ව තිබුණි.

මුව ආවරණ පැළඳ ටැටූ මධ්‍යස්ථානයට ඇතුළු වූ වෙඩික්කරුවන් එහි සිටි පිරිසට නොනවත්වා වෙඩි ප්‍රහාර එල්ල කරයි.

වෙඩි ප්‍රහාරය අතරතුර ඉන් බේරීම සඳහා පුද්ගලයෙක් සැඟවෙන අයුරු දැකගත හැකි අතර ඔහු ක්ලබ් වසන්තගේ පෞද්ගලික ආරක්ෂකයා බව වාර්තා වෙයි.

ප්‍රහාරයෙන් 6 දෙනෙකු තුවාල ලැබූ අතර ඔවුන් යුහුසුලුව රෝහල්ගත කරනු ලැබීය.

ටැටූ නිර්මාණකරණයේදී සේවාදායකයා අසුන් ගන්නා එම අසුනට පිටුපසින් පිහිටි බිත්තියට වෙඩි ප්‍රහාර කිහිපයක් එල්ල වී ඇති අයුරු එම ඡායාරූපයෙන් දැකගත හැකිය.

එහි යම් අයෙකු අසුන්ගෙන සිටියේ, නම් එම තැනැත්තාගේ හිස සීමාවෙන්ද බිත්තියට උණ්ඩ වැදී ඇති අයුරු දිස්වෙයි.

ටැටූ මධ්‍යස්ථානය විවෘත කරන අවස්ථාවේ ලබාගත් ඡායාරූපයක දැක්වෙන්නේ ගායන ශිල්පිනී කේ. සුජීවා, ක්ලබ් වසන්ත සහ ඔහුගේ බිරිඳ ටැටූ මධ්‍යස්ථානයේ අසුන්ගෙන සිටි ආකාරයයි.

ඊට අමතරව එම මධ්‍යස්ථානයේ පිහිටි අසුන් අසල රුපියල් පන්දහසේ මුදල් නෝට්ටු කිහිපයක්ද දැකගත හැකිවුණි. 

උත්සවයේ ආරාධිත අමුත්තෙකු ලෙස සහභාගී වූ ජනප්‍රිය ගායන ශිල්පී කේ. සුජීවා මහත්මිය ද වෙඩි ප්‍රහාරයෙන් තුවාල ලැබීය.

තුවාල ලැබූ 55 හැවිරිදි ප්‍රසිද්ධ ව්‍යාපාරික සුරේන්ද්‍ර වසන්ත පෙරේරා නොහොත් ක්ලබ් වසන්ත, ඔහුගේ බිරිඳ වන 42 හැවිරිදි මැණික් විජේවර්ධන සහ තවත් පුද්ගලයෙක් හා කාන්තාවක් ඇතුළත් කෙරුණේ හෝමාගම මූලික රෝහලටය. 

රෝහල්ගත කිරීමෙන් පසු සුරේන්ද්‍ර වසන්ත පෙරේරා නොහොත් ක්ලබ් වසන්ත සහ අතුරුගිරිය – රතුවිලවත්ත ප්‍රදේශයේ පදිංචි 38 හැවිරිදි නයන වාසුල විජේසූරිය යන දෙදෙනා ජීවිතක්ෂයට පත්ව තිබේ.

හෝමාගම මූලික රෝහලේ ප්‍රතිකාර ලබන කාන්තාවන් දෙදෙනාගේ තත්ත්වය තරමක් බරපතළ අතර ඒ අතරින් ක්ලබ් වසන්තගේ බිරිඳට සැත්කමක් සිදුකළ බව රෝහල් ආරංචි මාර්ග පැවසීය.

වෙඩි ප්‍රහාරයෙන් තුවාල ලැබූ ගායන ශිල්පිණී කේ. සුජීවා සහ තවත් අයෙක් ඇතුළත් කෙරුණේ කොළඹ ජාතික රෝහලටයි.

කේ. සුජීවාගේ පාදවලට බරපතළ තුවාල සිදුව ඇති අතර ඇය අද දහවල් සැත්කමකට ලක්කර තිබේ.

අනෙක් පුද්ගලයාගේ පිට ප්‍රදේශයට වෙඩි වැදී තුවාල සිදුව ඇති අතර ඔහුද සැත්කමකට ලක්කළ බව රෝහල් ආරංචි මාර්ග පැවසීය.

මෙම වෙඩි ප්‍රහාරයේ ප්‍රධාන ඉලක්කය ක්ලබ් වසන්ත නමැත්තා වී ඇති බව පොලීසිය පවසයි.

ඝාතකයන් පැමිණි මෝටර් රථයේ රියදුරාද ඇතුළුව සිව් දෙනෙකු සිට ඇති බවත් ඉන් දෙදෙනකු ගිනිඅවි අතැතිව උඩු මහලට යද්දී තවත් අයෙක් ටී 56 ගිනිඅවියක් සමඟ මෝටර් රථයේ රැඳී සිට ඇති බව වාර්තාවෙයි.

වෙඩි තබා පළාගිය ඝාතකයන් සිය මෝටර් රථය කොරතොට ප්‍රදේශයේදී නවත්වා වෙනත් වෑන් රථයකට මාරු වී ඇති බව පොලීසිය පවසයි.

වෑන් රථයෙන් තවත් ප්‍රදේශයකට ගිය සැකකරුවන් එහිදී තවත් මෝටර් රථයකට නැග පළාගොස් ඇතැයි පොලීසිය මෙතෙක් සිදුකළ පරීක්ෂණයේදී හෙළි වී තිබේ.

එමෙන්ම, සැකකරුවන් පැමිණි සහ පළාගිය සියලු වාහනවල සවිකර ඇත්තේ ව්‍යාජ අංක තහඩු බව පොලීසිය පවසයි.

එම මොටර් රථය එකලස් කළ එකක් බවද පොලීසිය පැවසීය.

පළාගිය සැකකරුවන් සොයා ගැනීමට බස්නාහිර පළාත දකුණ භාර නියෝජ්‍ය පොලිස්පති ගයන්ග මාරපන මහතාගේ අධීක්ෂණය යටතේ පොලිස් කණ්ඩායම් 6ක් මේ වනවිට යොදා තිබේ.

මේ අතර, වෙඩි තැබීම සිදුකළ ස්ථානය  කඩුවෙල වැඩ බලන මහෙස්ත්‍රාත් ඩී.පී.ජී.කරුණාරත්න මහතාගේ පරීක්ෂාවට අද පස්වරුවේ ලක් කෙරුණි.

ඝාතනයට ලක්වූ ක්ලබ් වසන්තට අයත් බව කියන ගිනිඅවියක් ද එම ස්ථානයේ තිබී සොයා ගැණුනි.

කෙසේ වෙතත් එම මධ්‍යස්ථානය ආරම්භ කළ ටැටූ නිර්මාණකරු දුලාන් සංජුල නමැත්තාට වෙඩි තැබීමෙන් හානි සිදුව නොමැත.

මෙම ටැටූ මධ්‍යස්ථානය විවෘත කිරීම සඳහා ප්‍රධාන ආරාධිතයා ලෙස සුරේන්ද්‍ර වසන්ත පෙරේරා නොහොත් ක්ලබ් වසන්ත එම ස්ථානයට සම්බන්ධ කරගත්තේ සැලැස්මක් අනුව දැයි පොලීසිය සැක පළ කරයි.

කෙසේවෙතත් අද පස්වරුවේ පැවති පොලිස් මාධ්‍ය හමුවට එක්වෙමින් පොලිස් මාධ්‍ය ප්‍රකාශක, නියෝජ්‍ය පොලිස්පති නීතිඥ නිහාල් තල්දූව මහතා පැවසුවේ මෙම වෙඩිතැබීම විදෙස් රටක සිට සංවිධානය කර ඇති බවට තොරතුරු ලැබී ඇති බවය.

මෙය සැලසුම් සහගත වෙඩිතැබීමක් බවත්, කලක සිට පැවති මතභේදයක් වෙඩිතැබීමට හේතුවිය හැකි බවට පොලීසිය සැකපළ කරන බවත් ඒ මහතා පැවසීය.

වෙඩික්කරුවන් අත්අඩංගුවට ගැනීමට පරීක්ෂණ ක්‍රියාත්මක බවත් රටින් පැන ගොස් ඇතැයි කිසිදු සාක්ෂියක් නොමැති බවත් ඒ මහතා කියා සිටියේය.

මේ අතර ක්ලබ් වසන්තගේ බිරිඳගේ ගමන් මල්ලේ තිබී රිවෝලර්වරයක් සොයාගත් බවත් එය ලියාපදිංචිකර ඇති ද යන්න සොයා පරීක්ෂණ ක්‍රියාත්මක බව ද නීතිඥ නිහාල් තල්දූව මහතා පැවසීය.

මීට පෙර ද 2017 වසරේ එම ස්ථානයේ සැලුන් එකක් පවත්වාගෙන ගොස් ඇති බවත් එහිදී ද මෙවැනිම වෙඩිතැබීමක් සිදුවූ බවත් නීතිඥ නිහාල් තල්දූව මහතා වැඩිදුරටත් කියා සිටියේය.

සබැඳි පුවත්:

ක්ලබ් වසන්ත ඝාතනයට පැමිණි වාහනය සොයා ගනී

ඉන්දියාවට පැනගිය කංජිපානි ප්‍රංශයෙන් දේශපාලන රැකවරණ අරගෙන

කංජිපානිට රටින් පනින්න විදෙස් ඔත්තුකරුවන් සහයදීලා!

පුවත්

බැසිල්ගේ හොඳම ගෝලයා ජනපති අපේක්ෂකත්වයා ලෙස රනිල්ව යෝජනා කරයි!

Published

on

By

ඉදිරි ජනාධිපතිවරණයට ජනාධිපති රනිල් වික්‍රමසිංහ මහතා ඉදිරිපත් විය යුතු බවට වන යෝජනාව අද (21) පස්වරුවේ පැවති  “එක්ව ජය ගමු – අපි ගම්පහ” ජන හමුවේ දී ඉදිරිපත්කර තිබුණි.

ජනාධිපති මාධ්‍ය අංශය පැවසුවේ ගම්පහ දිස්ත්‍රික් ජනතාව වෙනුවෙන් අමාත්‍ය ප්‍රසන්න රණතුංග මහතා විසින් එම යෝජනාව ඉදිරිපත් කළ බවයි.

එම රැලියේ සිටි සියලුදෙනා දෑත්  ඔසවා එම යෝජනාව ඒකමතිකව සම්මත කර ගනු ලැබූ බව ජනාධිපති මාධ්‍ය අංශය පැවසීය.

එහිදී අදහස් දක්වමින් අමාත්‍ය ප්‍රසන්න රණතුංග මහතා සඳහන් කළේ ජනාධිපති අපේක්ෂකත්වයෙන් දැන් රනිල් වික්‍රමසිංහ මහතාට පැන යාමට නොහැකි වනු ඇති බවයි.
කෙසේවුවද, 

 ජනාධිපති රනිල් වික්‍රමසිංහ මහතා එහිදී කියා සි‍ටියේ ජනාධිපතිවරණයට ඉදිරිපත් වන ලෙසට තමන්ට කළ ආරාධනයට සුදුසු වේලාවේදී පිලිතුරු ලබා දෙන බවයි.

කළකට පෙර ප්‍රසන්න රණතුංග මහතා හිටපු මුදල් අමාත්‍ය බැසිල් රාජපක්ෂ මහතාගේ ඉතා කිට්ටුම සගයෙකු ලෙසයි කටයුතු කරනු ලැබුවේ.

Continue Reading

ක්‍රීඩා

ආසියානු හා ආබාධිත ආසියානු තරගාවලිවල පදක්කම් ලාභීන්ට මුදල් තෑගි පිරිනමයි

Published

on

By

ආසියානු තරගාවලියේ හා ආබාධිත ආසියානු තරගාවලියේ පදක්කම් ලාභීන්ට ක්‍රීඩා අමාත්‍යාංශය මගින් පොරොන්දු ප්‍රකාරව මුදල් පිරිනැමීම පසුගියදා ක්‍රීඩා අමාත්‍යාංශයේ ඩන්කන් වයිට් ශ්‍රවණාගාරයේදී පැවැත්විණ.

මෙහිදී රුපියල් කෝටි 12 කට අධික මුදලක් එම පදක්කම් ලාභීන් හා ඔවුන්ගේ පුහුණුකරුවන් අතර බෙදා දෙන ලදී. 

මෙම ප්‍රදානයන් ක්‍රීඩා, ඉඩම් හා සංචාරක අමාත්‍ය හරීන් ප්‍රනාන්දු මහතාගේ අතින් සිදු කෙරිණ. 

පැරිස් ඔලිම්පික් යන ක්‍රීඩක ක්‍රීඩිකාවන් හය දෙනාටද රුපියල් දස ලක්ෂය බැගින් මෙහිදී පිරිනැමිණ.

මෙම අවස්ථාවට ඔලිම්පික් කමිටු ලේකම් මැක්ස්වෙල් ද සිල්වා මහතාද සහභාගි විය.

ලබන ලද ජයග්‍රහණ අනුව වැඩිම මුදලක් ලැබුණු ක්‍රීඩිකාව වූයේ තරුෂි කරුණාරත්නයි.

Continue Reading

පුවත්

පෞද්ගලික වාහන ආනයනය ලබන වසර තෙක් කල්දාලා!

Published

on

By

පුද්ගලික වාහන ආනයනය කිරීම සඳහා පනවා ඇති තහනම ඉවත් කිරීම ලබන වසර මුල දක්වා ප්‍රමාද කිරීමට රජය තීරණය කර ඇතැයි වාර්තා වේ.

මෙරට ආර්ථිකය තවමත් ස්ථාවර නොවීම සහ ඒ සඳහා පහසුකම් සැලැසීමට ප්‍රමාණවත් විදෙස් සංචිත ප්‍රමාණයක් මහ බැංකුව සතුව නොමැතිවීම යන කරුණු මත පදනම්ව එලෙස තහනම ඉවත් කිරීම ලබන වසර මුල දක්වා ප්‍රමාද කිරීමට රජය තීරණය කර ඇති බව පැවසේ.

පුද්ගලික වාහන ආනයනය කිරීම ආරම්භ කිරීමත් සමඟ ඇමෙරිකානු ඩොලර් බිලියන 1 ක මුදල් ප්‍රමාණයක් සෑම වසරකම මෙරටින් පිටතට ගලා සිදුවන බව වාර්තා වේ.

කෙසේ නමුත් ලොරි, බස් සහ ට්‍රක් රථ මෙන්ම සංචාරය ක්ෂේත්‍රය සඳහා යොදා ගන්නා වෑන් රථ වැනි වාණිජ පදනමකින් යුත් වාහන ආනයනය කිරීම සඳහා පනවා ඇති තහනම ලබන මස සිට ඉවත්වනු ඇති බවද පැවසේ.

එනමුත් රාජ්‍ය අමාත්‍යාංශ සහ අනෙකුත් ආයතන සඳහා අවශ්‍ය වාහන ආනයනය කිරීම ආරම්භ වන්නේ ලබන වසරේ පුද්ගලික වාහන ආනයනය කිරීම සඳහා පනවා ඇති තහනම ඉවත් කිරීමෙන් පසුව බවද වාර්තා වේ.

මීට පෙර විද්‍යුත් වාහන සහ පුද්ගලික මෝටර් රථ ආනයනය කිරීම සඳහා මෙම වසර අවසානයේ සිට අවසර ලබා දීමට රජය සැලැසුම් කර තිබිණි. 

කෙසේවුවද, එයද ලබන වසර දක්වා ප්‍රමාද කිරීමට රජය තීරණය කර ඇති බව පැවසේ.

ආනයනය කරනු ලබන පුද්ගලික වාහන වලින් වැඩිම ප්‍රමාණය ත්‍රී රෝද රථ සහ යතුරු පැදි වේ. 

ඒ හේතුවෙන් පුද්ගලික වාහන ආනයනය ඉවත් කිරීම ලබන වසරේ මැයි හෝ ජූනි දක්වා ප්‍රමාද වනු ඇතැයි ද මාධ්‍ය වාර්තා කර තිබේ.

600 සීසී සිට 800 සීසී දක්වා කාණ්ඩයට අයත් මෝටර් රථ පාලනයක් සහිතව ආනයනය කිරීමට රජය අවසර ලබා දෙනු ඇති බවත් මුල් අදියරේදී බලයලත් නියෝජිතයන්ට සහ මව් සමාගම්වලට ඒ සඳහා අවසර ලැබෙනු ඇති බවත් මේ අතර වාර්තා වේ.

 වාහන ආනයනය ලබන වසරේ ආරම්භ වූ පසු වාහන අමතර කොටස් ආනයනය කර මෙරටදී වාහන එකලස් කරන සමාගම් සඳහා රජය ප්‍රමුඛතාව ලබාදීමේ සැලැසුමක්ද ක්‍රියාත්මක බව වාර්තා වේ.

වාහන ආනයනය කිරීම සඳහා අවසර ලැබී නැති වෛද්‍යවරුන්ගේ සහ රජයේ ඉහළ නිලධාරීන්ගේ වාහන බලපත්‍ර සඳහා අවසර ලබාදීම තීරණය කරනු ලබන්නේද ලබන වසරේදී බව පැවසේ. 

අවසරය ලබා ගැනීම සඳහා පෝලිමේ තිබෙන ආනයන බලපත්‍ර 10,000 සඳහා එකවර අවසර නොලැබෙනු ඇති බවද වාර්තා වන අතර, එසේම අනෙකුත් වාහනද පාලනයක් සහිතව ආනයනය කිරීමට ද අපේෂිතය.

Continue Reading
Advertisement

Trending

Copyright © 2023 Sri Lanka Mirror. All Rights Reserved