බත්තරමුල්ල පැලවත්ත ඉසුරුපාය අධ්‍යාපන අමාත්‍යාංශයට ඊයේ (23) දින බලහත්කාරයෙන් ඇතුළු වී එහි පොදු දේපලවලට හානි කිරීම ඇතුලු චෝදනා අටක් යටතේ අත් අඩංගුවට ගත් අන්තර් විශ්ව විද්‍යාල ශිෂ්‍ය බල මණ්ඩලයේ සභාපති වසන්ත මුදලිගේ ඇතුළු භික්ෂු සහ ගිහි සිසුන් 54 දෙදෙනා ලබන 27 වැනිදා දක්වා රක්ෂිත බන්ධනාගාර ගත කරන ලෙස කඩුවෙල වැඩබලන මහේස්ත්‍රාත් සුජීව ගුණතිලක මහතා අද (24) නියෝග කළේය.

අන්තර් විශ්ව විද්‍යාල ශිෂ්‍ය බල මණ්ඩලයේ සභාපති වසන්ත මුදලිගේ ඇතුලු ව බෞද්ධ හා පාලි විශ්ව විද්‍යාලයේ භික්ෂු සිසුන් 54 ක් සහ ගිහි සිසුන් 08 දෙනෙකු මෙම පිරිසට අයත් විය.

තලංගම පොලිසිය මගින් මෙම පිරිස අත්අඩංගුවට ගත් මෙම සැකකරුවන් නීතිපති දෙපාර්තුමේන්තුව හා පොලිසිය එක්ව අධිකරණය වෙත ඉදිරිපත් කර තිබිණි.

මේ අතර, අධිකරණ භූමියේ ආරක්ෂාව වෙනුවෙන් දෙසීයකට අධික පොලිස් නිළධාරීන් පිරිසක් යොදවා සිටීම ද විශේෂිතය.

අධ්‍යාපන අමාත්‍යාංශයේ පොදු දේපලවලට හානි සිදු කිරීම, අයුතු ලෙස අමාත්‍යාංශය තුලට ඇතුළු වීම, එහි රාජකාරි සිදුකල නිළධාරීන්ට බාධා සිදු කිරීම සහ අඩත්තේට්ටම් සිදු කිරීම , අයුතු ජන රාශිය සාපරාධී බිය ගැන්වීම, කුමන්ත්‍රණය යන චෝදනා යටතේ මෙම සැකකරුවන් අධිකරණය වෙත ඉදිරිපත් කිරීමට පොලිසිය කටයුතු කර තිබුණි.

එසේම අධ්‍යාපන අමාත්‍යාංශයේ දේපලවලට රුපියල් එක්ලක්ෂ අනූ එක් දහසක අලාභයක් සිදුව ඇති බවද මෙහිදී පොලිසිය අධිකරණය වෙත කරුණු දක්වන ලදී.

මෙහිදී පොලිසිය අධිකරණය වෙත දන්වා සිටියේ අත්අඩංගුවට ගත් සැකකරුවන් මෙම වැරදිවලට අමතරව රටේ සාමාන්‍ය කටයුතු පවත්වාගෙන යා නොහැකි ලෙස නිරන්තරයෙන් කටයුතු කරන බැවින් සැකකරුවන් බන්ධනාගාර ගත කිරීමට කටයුතු කරන ලෙසයි.

සැකකරුවන් වෙනුවෙන් නීතිඥවරුන් වන කමල් විජේසිරි, නුවන් බෝපගේ, නුවන් ජයවර්ධන, ජයනනන්ද සමරකෝන් ඇතුලු 40 දෙනෙකුගෙන් යුත් නීතිඥ මණ්ඩලයක් පෙනී සිටියහ.