රේගු දෙපාර්තමේන්තුවට හොර රහසේ මෙරටට ආනයනය කරන ලද රුපියල් කෝටි ගණනක් වටිනා සුඛෝපභෝගී මෝටර් රථ 200ට අධික සංඛ්‍යාවක් ව්‍යාජ දත්ත ඇතුළත් කර ලියාපදිංචි කර ඇති බව කියන සිද්ධියක් සම්බන්ධයෙන් කරුණු දැක්වීම සඳහා මෝටර් රථ ප්‍රවාහන දෙපාර්තමේන්තුවේ නිලධාරීන් 8 දෙනකුට මේ මස 29 වැනිදා අධිකරණය හමුවේ පෙනී සිටින ලෙස නොතීසි නිකුත් කෙරුණි.

ඒ කොළඹ ප්‍රධාන මහේස්ත්‍රාත් තිළිණ ගමගේ විසිනි.

සිද්ධියට කරුණු විමසීම සඳහා එම නිලධාරීන් 8 දෙනා අධිකරණය වෙත කැඳවීමට නියෝගයක් ලබා දෙන ලෙසට එම කොමිෂන් සභාවේ නිලධාරීන් අධිකරණයට කරන ලද කරුණු දැක්වීම සම්බන්ධයෙන් අවධානය යොමු කරමින් මහේස්ත්‍රාත්වරයා මෙම නොතීසිය නිකුත් කලේය.

නියෝජ්‍ය කොමසාරිස්වරයෙකු, සහකාර කොමසාරිස්වරුන් දෙදෙනකු ඇතුළු සිද්ධියට සම්බන්ධ බව කියන පරිගණක දත්ත පද්ධතිය ක්‍රියාකරුවකු, වාහන අංක නිකුත් කළ අයෙකු, වාහන ආනයනය කිරීමට සහාය ලබා දුන් අයෙකු, සංවර්ධන නිලධාරියකු ඇතුළු එම අංශයේ නිලධාරීන් 8 දෙනෙකුට එසේ අධිකරණය හමුවේ පෙනී සිටින ලෙස දන්වා තිබේ.

රුපියල් කෝටි 500කට අධික බදු මුදල් රජයට අහිමි කරමින් සුඛෝපභෝගී මෝටර් රථ දෙසීයක් පමණ මෙරටට ආනයනය කර ඇති බව සිද්ධිය සම්බන්ධයෙන් මෙතෙක් සිදු කළ විමර්ශන වලදී අනාවරණය වී තිබුණි.

ඉන් මෝටර් රථ 16ක් මේ වන විට අත්අඩංගුවට ගෙන ඇති බවටත්, අධිකරණ නියෝග මත එම වාහන රේගුව භාරයේ රඳවා තබා ඇති බවටත්, එම නිලධාරීන් අධිකරණයට කරුණු දක්වා සිටියේය.

එම දෙපාර්තමේන්තුවේ දත්ත පද්ධතිය නිවැරදි ආකාරයෙන් පවත්වා ගෙන යන ලෙසට එම දෙපාර්තමේන්තුවට දැනුම්දී ඇතත් එවැනි නිවැරදි කිරීමක් මෙතෙක් සිදුකර නොමැති බවට කරුණු අනාවරණය වන බව එම නඩුව ඊයේ අධිකරණය හමුවේ නැවත කැඳවූ අවස්ථාවේදී අල්ලස් හෝ දූෂණ විමර්ශන කොමිෂන් සභාවේ නිලධාරීන් අධිකරණයට දැනුම් දුන්හ.

මෝටර් රථ ප්‍රවාහන දෙපාර්තමේන්තුවේ පරිගණක පද්ධතියට ව්‍යාජ තොරතුරු ඇතුළත් කර ලියාපදිංචි කිරීමෙන් අනතුරුව එම මෝටර් රථ 2015 සිට 2022 වසර දක්වා කාලය තුළදී මෙරට ආනනය කර ඇති බවද අල්ලස් කොමිසමේ රහසිගත බුද්ධි ඒකකය සිදු කළ වී මර්ශන වලදී හෙළි කරගෙන ඇති බවද එම නිලධාරීන් ප්‍රකාශ කලහ.