පවතින වැසි තත්වයත් සමඟ දිවයිනේ ප්‍රධාන ජලාශ 29ක් සහ මධ්‍යම ජලාශ 10ක් මේ වන විට වාන් දැමීමට පටන්ගෙන ඇතැයි වාරිමාර්ග දෙපාර්තමේන්තුවේ (ජල කළමනාකරණ) අධ්‍යක්ෂ ඉංජිනේරු එච්.එම්.පී.එස්. හේරත් මහතා ප්‍රකාශ කරයි.
ජලාශ 73ක සමස්ත ජලධාරිතාව 84.3%ක් ඊයේ (14) සවස් වන පිරී තිබූ බවද අධ්‍යක්ෂවරයා සඳහන් කරයි.
සොරබොර ජලාශය සහ උස්ගල සියඹලන්ගමුව ජලාශය අවදානම් මට්ටම දක්වා ජලයෙන් පිරී ගොස් ඇති බවද අධ්‍යක්ෂවරයා පවසයි.
දිස්ත්‍රික්ක 11ක ජලාශ 29ක් වාන්මට්ටම දක්වා ජලයෙන් පිරී ගිය බව කී ඉංජිනේරු හේරත් මහතා, මාතලේ, ත්‍රිකුණාමලය සහ මොනරාගල දිස්ත්‍රික්කවලින් ජලාශය බැගින්ද අනුරාධපුර දිස්ත්‍රික්කයේ ජලාශ 06ක්ද, බදුල්ල සහ පොලොන්නරුව දිස්ත්‍රික්කවල ජලාශ 03ක් බැගින් ද වාන්මට්ටම දක්වා ජලයෙන් පිරී ඇතැයි ද පැවසීය.
මඩකලපුව, හම්බන්තොට හා ගාල්ල දිස්ත්‍රික්කවල ජලාශ දෙක බැගින් වාන්මට්ටම දක්වා ජලයෙන් පිරී ඇති බවද,
ලුණුගම්වෙහෙර හා වෙහෙරගල ජලාශවල වාන්දොරටු මේ වන විට විවෘත කර ඇති බව සඳහන්ය.
මේ වන විටත් ජලාශ දෙකටම ඉහළ ජලාධාරා ප්‍රදේශවලින් ජලය ලැබෙමින් පවතින හෙයින් වෙහෙරගල ජලාශයේ වාන්දොරටු රාත්‍රී කාලයේ දී වැඩි කිරිමට සිදුවන හෙයින් කතරගම මැණික් ගඟ පරිහරණය කිරීමේදී විශේෂයෙන්ම සැලකිලිමත් විය යුතු බව තිස්සමහාරාම ප්‍රාදේශීය වාරිමාර්ග ඉංජිනේරු කේ.ටී. ඩී.ඩී.පී. වික්‍රමසූරිය මහතා පවසයි.
කිරිඳිඔය දෙපස ජනතාවටද විමසිලිමත් ලෙස ජලය පරිහරණය කරන ලෙසට මේ වන විට දන්වා ඇති බවද ඉංජිනේරුවරයා කිය.
පොලොන්නරුව පරාක්‍රම සමුද්‍රයේ වාන්දොරටු දහයෙන් දොරටු හතරක් ඊයේ (14) සවස අඩියක් බැගින් විවෘත කළ බවද, එම දොරටු හතරෙන් තප්පරයට ඝන අඩි 606ක ජල කඳක් මහවැලි ගඟට මුදා හැරෙන බව ද සඳහන්ය.
