මහනුවර නගර මධ්‍යයේ පිහිටි කම්කරු දෙපාර්තමේන්තු කාර්යාල පරිශ්‍රය තුළට මළ අපජලය ගලා විත් බරපතළ සෞඛ්‍ය ගැටලුවක් මතුව ඇති බවට පුවතක් වාර්තා වේ.
මේ දිනවල පවතින වර්ෂාව හේතුවෙන් විධිමත් ලෙස නඩත්තු නොකළ වැසිකිලි ගලිවල වල් උතුරා ගොස් අධික දුර්ගන්ධය හමන අතර කම්කරු දෙපාර්තමේන්තුව වෙත සිය සේවා අවශ්‍යතාවයන් සඳහා පැමිණෙන ජනතාව මෙන්ම එහි සේවය කරන රාජ්‍ය සේවකයින් මේ හේතුවෙන් දැඩි අපහසුතාවට පත්ව තිබේ.
ජනතාව පෙන්වා දෙන්නේ කම්කරු දෙපාර්තමේන්තු පරිශ්‍රය තුළට මළ අප ජලය ගලා ඒම හේතුවෙන් කම්කරු දෙපාර්තමේන්තු සේවකයින්ගේ පමණක් නොව ඒ අසල පිහිටි රාජ්‍ය ආයතන වල සේවකයින් මෙන්ම මහනුවර ශාන්ත සිල්වෙස්තර විදුහලේ දහස් ගණනක් වන සිසුන්ගේ හා ගුරු මණ්ඩලය පවා දැඩි සෞඛ්‍ය තර්ජනයක් මතු වී ඇති බැවින් වහාම මේ සම්බන්ධයෙන් කඩිනම් පියවර ගත යුතු බවය.
මෙම සෞඛ්‍ය ගැටලුවට තමන් දීර්ඝ කාලයක් තිස්සේ මුහුණ දෙන බව මේ පිළිබඳව අදහස් දැක්වූ මහනුවර කම්කරු දෙපාර්තමේන්තු සේවකයින් පවසා තිබේ.
ඔවුන් පවසා ඇත්තේ කම්කරු දෙපාර්තමේන්තුවේ රථ ගාල හා රියදුරන්ගේ විවේකාගාර ගලිවලවල් වලට ඉහළින් පිහිටා තිබීමත් එමගලි වලවල් නිසි ලෙස නඩත්තු නොකිරීමත් නිසා තමන් මෙම පීඩාවට පත්ව සිටින බවය.
මේ සම්බන්ධයෙන් කම්කරු දෙපාර්තමේන්තුවේ උසස් නිළධාරීන් දැනුම්වත් කළද මෙම ගැටලුවට ස්ථිර විසඳුමක් ලබා දීමට ඔවුන් අපොහොසත් වී ඇති බවද එම සේවකයින් පෙන්වා දෙයි
