විදෙස්ගත ශ්‍රමිකයින්ට මෙරටට විද්‍යුත් වාහන ගෙන්වීමට ලබා දී තිබූ බලපත්‍ර 1000කට අධික සංඛ්‍යාවක් අවභාවිත කර ඇතැයි විශේෂ විගණනයකින් හෙළිව තිබේ.

විගණකාධිපති WPC වික්‍රමරත්න මහතා සඳහන් කළේ, විදෙස් රටවල රැකියාවල නිරත සුදුසුකම් ලැබූ පුද්ගලයින් රැසකට එම බලපත්‍ර ලැබී නොමැති බවයි.

පසුගිය රජය විසින් ක්‍රියාත්මක කළ ‍එම වැඩපිළිවෙළ සම්බන්ධයෙන් කළ විශේෂ විගණන වාර්තාව මේ වනවිට පාර්ලිමේන්තුවට භාර දි ඇති බව ඔහු ප්‍රකාශ කළේ ය.

ඉදිරියේදී එය සභාගත කෙරෙනු ඇති.

2023දී මන්ත්‍රීලා 10ක් බදු නැතිව වාහන ගෙනල්ලා

මේ අතර, රටේ ආර්ථික අර්බුදය හේතුවෙන් වාහන ආනයනයට සීමා පනවා පාර්ලිමේන්තු මන්ත්‍රීවරුන්ට තීරු බදු රහිත වාහන බලපත් ලබාදීම අත්හිටවු බව කියනු ලැබු තත්වය උඩ, තීරු බදු රහිත බලපත්‍රය යටතේ 2023 වර්ෂයේදි පාර්ලිමේන්තු මන්ත්‍රිවරුන් 10ක් වාහන ආනයනය කර ඇති බවට තොරතුරු අනාවරණය වේ.

ඒ බව අනාවරණය වන්නේ ශ්‍රි ලංකා රේගුව පාර්ලිමේන්තුවට ඉදිරිපත් කර ඇති 2023 වර්ෂයට අදාළ කාර්යසාධන වාර්තාවේ ඇතුළත් තොරතුරු මඟින්ය.

එම තොරතුරු අනුව හිටපු ජනපති රනිල් වික්‍රමසිංහ මහතාගෙන් තීරු බදු රහිත වාහන බලපත් යටතේ වාහන ගෙන්විම සඳහා පසුගිය පාර්ලිමේන්තුවේ මන්ත්‍රීවරු 10 දෙනෙකුට අවසර හිමිව තිබේ.එම වාර්තාවට අනුව රාජ්‍ය පරිපාලන චක්‍රලේක යටතේ නිකුත් කරන ලද වාහන බලපත්‍ර 5144ක්, සාමාන්‍ය වාහන බලපත්‍ර 194ක්, විදේශ කටයුතු අමාත්‍යංශය යටතේ වාහන බලපත්‍ර 1ක්, පළාත් සභා යටතේ වාහන බලපත්‍ර 1397, බදු නිදහස් කිරිම් යටතේ එම වර්ශයේ දී ශ්‍රි ලංකාවට ආනයනය කර තිබේ.

ඊට අමතරව 2023 වර්ෂයේදි කිරිපිටි සම්බන්ධයෙන් අවස්ථා 613 කදී, උණ ලී සම්බන්ධයෙන් අවස්ථා 18කදී, තිරිඟු පිටි සම්බන්ධයෙන් අවස්ථා 716දී ගෑස් හා තෙල් සම්බන්ධයෙන් අවස්ථා 770කදී බදු නිදහස් කිරිම් ලබා දි තිබෙන බව සඳහන්ය.විදෙස්ගත ශ්‍රමිකයන්ට ලබාදී ඇති වාහන බලපත්‍රවලින් විශාල දූෂණයක් සිදුවන බව එම කාලයේදී එවකට රජයේ මුදල් පිළිබඳ පාර්ලිමේන්තු කාරක සභාවේ සභාපති මන්ත්‍රී ආචාර්ය හර්ෂද සිල්වා මහතා පෙන්වා දුන්නේය.

විදෙස් ශ්‍රමිකයන් සඳහා විද්‍යුත් වාහන එකසිය පනහක් ගෙන්වීමේදී අක්‍රමිකතා රැසක් සිදුවී ඇති බව ඔහු එහිදී සෘජුවම පැවසීය.

ඒ මහතා එසේ කියා සිටියේ 2024 වසරේ අප්‍රේල් 01 වැනිදා රජයේ මුදල් පිළිබඳ පාර්ලිමේන්තු කාරක සභාවේ වාර්තාවක් ඉදිරිපත් කරමිනි.

ඔහු එහිදී මෙසේද කීය.

එසේම, විදෙස්ගත ශ්‍රමිකයන් සදහා වන විද්‍යුත් වාහන ආනයනට පළමු බලය ලත් මෙරට නියෝජිතයා ලෙස පත් කෙරුණු දහම් පෙරේරා මහතාට අයත් ඕවර්ලෑන්ඩ් ඔටෝ මොබයිල් පුද්ගලික සමාගම (Overland Automobiles Pvt Ltd) අදාළ විදෙස්ගත ශ්‍රමිකයන්ගේ බලපත්‍ර මුදල් වලට ලබා ගනිමින් ඒවා ගෙන්වා මෙරට ධනපතියන්ට විකුණා ඇති බවට තොරතුරු හෙළිව තිබේ.

විදෙස්ගත ශ්‍රමිකයන්ට ලැබුණු බලපත්‍රවලින් වැඩි ප්‍රමාණයක් භාවිතා කර ඇත්තේ එම සමාගම බවද මේවන විට කරන ලද පරීක්ෂණවලින් හෙළිව ඇති බව වාර්තා වේ.