කටුනායක බණ්ඩාරනායක ජාත්‍යන්තර ගුවන් තොටුපළ වෙත පැමිණෙන විදේශීය සංචාරකයන්ගේ පහසුව සඳහා ආගමන සහ විගමන දෙපාර්තමේන්තුව විසින් විවෘත කෙරුණු විශේෂ කවුන්ටරය මේ වන විට වසාදමා ඇති බව වාර්තා වේ.
අප්‍රේල් 24 වැනිදා ජනාධිපති රනිල් වික්‍රමසිංහ මහතා විසින් පත් කරන ලද සංචාරක සංවර්ධන කමිටුවේ නිර්දේශ මත මෙම විශේෂ කවුන්ටර විවෘත කෙරුණු නමුත් එසේ විවෘත කර මාසයක් ගතවනවාත් සමග මෙම කවුන්ටර වසා දැමීමට තීරණය කිරීම පසුපස ඇත්තේ අදෘශ්‍ය හස්තයක් ඇති බවට ද සැක මතුව තිබේ.
ආගමන හා විගමන පාලක ජනරාල්වරයා විසින්ම ප්‍රසිද්ධියට පත් කර විවෘත කෙරුනු මෙම කවුන්ටර පූර්ව දැනුම්දීමකින් තොරව වසා දැමීම හමුවේ, විදෙස් සංචාරකයන්ට මෙරට කෙරෙහි ඇති විශ්වාසය ද පලුදු වී ඇති බව සංචාරක කර්මාන්තයේ නිරත පිරිස් කියති.
වසර කිහිපයකට පසුව යළි හිස ඔසවමින් ඇති සංචාරක ක්ෂේත්‍රයේ ප්‍රවර්ධනයක් වෙනුවෙන් ගනු ලැබූ තීන්දු මේ ආකාරයෙන් සිදුවන විට තමන්ද බලවත් දුෂ්කරතාවකට පත්වන බව ඔවුන් පෙන්වා දෙයි.
එබැවින් ජනාධිපතිවරයාගේ නියමයෙන් පත්කළ කමිටුවක් හරහා සිදුකළ නිර්දේශ අත්තනෝමතික ආකාරයට නැවත හකුළුවන නිලධාරීන් කවුද යන්න සම්බන්ධව සොයා බලා සුදුසු ක්‍රියාමාර්ග ගත යුතු බවත් රටේ ආර්ථිකයට ඉමහත් දායකත්වයක් සපයන ක්ෂේත්‍ර සම්බන්ධව ගනු ලබන ප්‍රතිපත්තිමය තීන්දු මේ ආකාරයට හකුළා දැමීමට ඉඩහැරීම නරක පූර්වාදර්ශයක් බවටද සංචාරක කර්මාන්තයේ නිරත පිරිස් අනතුරු අඟවා සිටිති.
