මාර්තු 21 වනදා පැවැත්වෙන අයවැය අවසාන ඡන්ද විමසීමෙන් පසුව මැතිවරණය කැඳවන්නැයි විපක්ෂ නායක සජිත් ප්‍රේමදාස මහතා මැතිවරණ කොමිසමෙන් ඉල්ලීමක් කර තිබේ.
විපක්ෂය නියෝජනය කරන දේශපාලන පක්ෂ නියෝජිතයින් අද (18) මැතිවරණ කොමිසන් සභාවේ නියෝජිතයින් හමුවීමට පැමිණි අවස්ථාවෙන් පසු මාධ්‍ය වෙත අදහස් දක්වමින් විපක්ෂ නායකවරයා ඒ බව සඳහන් කළේය.
“විශේෂයෙන්ම අවධාරණය කළේ මේ අයවැය ක්‍රියාදාමය තුළ විපක්ෂය නියෝජනය කරන මන්ත්‍රීවරුන් 66ක් සහ පක්ෂ රාශියක් ඇති බවත් ඒ කාලවකවානුව තුළදී ව්‍යවස්ථාදායකයේ කාර්ය භාරය ඉටුකරන්නට පාර්ලිමේන්තු මන්ත්‍රීවරුන් ලෙස අපි බැඳිලා ඉන්නවා. මාර්තු 21න් පසුව මේ මැතිවරණ වැඩසටහනට යොමුවන්න කියන කාරණය මැතිවරණ කොමිසමට ඉදිරිපත් කළේ. මාර්තු 21 වනදාට අයවැය අවසාන ඡන්දය පාර්ලිමේන්තුවේ. ඒක අවසන් වුණ වාහාම මැතිවරණ ක්‍රියාවලිය ආරම්භ කරන්න. ඔන්න ඔය ඉල්ලීම ඉදිරිපත් කරන් අපි කොමිසමට පැමිණියේ.”
මේ අතර පාර්ලිමේන්තුවේ දී ඊයේ සම්මත වූ පළාත් පාලන ආයතන ඡන්ද විමසීම් විශේෂ විධිවිධාන පනත් කෙටුම්පතට කථානායකවරයා සිය සහතිකය ලබාදීමත් සමඟ එය 2025 අංක 1 දරණ පළාත් පාලන ආයතන ඡන්ද විමසීම් විශේෂ විධිවිධාන පනත ලෙස බලාත්මක වු බව පාර්ලිමේන්තු මහලේකම් කාර්යාලය සඳහන් කළේය.
මෙම නව පනත සම්මත වීමත් සමඟ මැතිවරණ කොමිසන් සභාව විසින් නාමයෝජනා කැඳවිමේ දිනය ප්‍රකාශ කළ යුතු අතර එම දිනය අදාළ පනත සම්මත වී මාස 3කට පෙර දිනයක් විය යුතුය.
පළාත් පාලන ආයතන ඡන්ද විමසීම් විශේෂ විධිවිධාන පනත ගැසට් මගින් ප්‍රකාශයට පත්කිරීමෙන් අනතුරුව මැතිවරණය පැවැත්වෙන දිනය පිළිබදව තීරණය කරන බව මැතිවරණ කොමිෂන් සභාව පවසයි.
එහි ප්‍රකාශකයෙකු සදහන් කළේ අදාළ පනත අධ්‍යයනය කිරීමෙන් අනතුරුව පළාත් පාලන ඡන්ද විමසීම පැවැත්වෙන දින වකවානු සම්බන්ධයෙන් ප්‍රකාශයට පත්කිරීමට බලාපොරොත්තු වන බවය.
(පෙර පුවත 2025 පෙබරවාරි 18 පෙ.ව.9.57)
විපක්ෂය අද මැතිවරණ කොමිසමට
පළාත් පාලන ඡන්දය පැවැත්වීම සම්බන්ධයෙන් උද්ගතව ඇති ගැටලු සාකච්ඡා කිරීම සදහා පාර්ලිමේන්තුව නියෝජනය කරන විපක්ෂයේ සියලුම පක්ෂ නායකයින් අද (18) මැතිවරණ කොමිෂන් සභාව වෙත පැමිණීමට නියමිතව තිබේ.
පළාත් පාලන ආයතන ඡන්ද විමසීම් විශේෂ විධිවිධාන පනත් කෙටුම්පත පාර්ලිමේන්තුවේදී ඊයේ විශේෂ බහුතර ඡන්දයෙන් සම්මත විය.
කෙටුම්පත දෙවන වර සහ තුන්වන වර කියවීමේදී විපක්ෂව කිසිදු මන්ත්‍රීවරයකු ඡන්දය ලබා නොදුන් අතර කිසිවකු ඡන්දය ලබාදීමෙන් වැළකී සිටියේද නැත.
ඒ අනුව, මෙම පනත් කෙටුම්පත සංශෝධන රහිතව විශේෂ බහුතර සම්මත වූ බව කතානායකවරයා සභාවට දැනුම් දුන්නේය.
