යුද්ධ හමුදා සේවා වනිතා ඒකකයේ හිටපු සභාපතිනී, ආරක්ෂක මාණ්ඩලික ප්‍රධානී, හිටපු හමුදාපති ශවේන්ද්‍ර සිල්වා මහතාගේ බිරිඳ සුජීවා නෙල්සන් මහත්මිය සිදුකරනු ලැබූ ප්‍රශංසනීය සේවය ඇගයීමට සහ පැසසුමට ලක්කිරීමේ චාම් උත්සවයක් පසුගියදා සංවිධාන කර තිබුණි.
ඒ යුද්ධ හමුදා සේවා වනිතා ඒකකයේ වත්මන් සභාපතිනී ජානකී ලියනගේ මහත්මියගේ ප්‍රධානත්වයෙනි.
මෙම උත්සව අවස්ථාව සඳහා ප්‍රධාන ආරාධිත අමුත්තා ලෙස සපැමිණි සුජීවා නෙල්සන් මහත්මිය, යුද්ධ හමුදා සේවා වනිතා ඒකකයේ වත්මන් සභාපතිනී ජානකී ලියනගේ මහත්මිය ප්‍රමුඛ එම ඒකකයේ විධායක කමිටුවේ සාමාජිකයින් පිරිසක් විසින් ඉතා උණුසුම් අයුරින් පිළිගනු ලැබූහ.
අනතුරුව, යුද්ධ හමුදා සේවා වනිතා ඒකකයේ ලේකම් ධනූෂා වීරසූරිය මහත්මිය විසින් උත්සවයේ ප්‍රධාන දේශනය පැවැත්වීමෙන් පසුව සුජීවා නෙල්සන් මහත්මිය යුද්ධ හමුදා සේවා වනිතා ඒකකයේ සභාපතිනිය වශයෙන් සිදුකරනු ලැබූ සුබසාධන ව්‍යාපෘති අළලා සැකසුනු වීඩියෝ දර්ශණයක් ද ප්‍රදර්ශණය කෙරුණි.
පසුව ජානකී ලියනගේ මහත්මිය දේශනයක් සිදුකරමින් සුජීවා නෙල්සන් මහත්මියගේ ප්‍රශංසනීය සේවය පැසසුමට ලක්කිරීමෙන් පසුව ඇය වෙත සුහදත්වය හා කෘතවේදීත්වය දක්වමින් සමරු තිළිණයක් ප්‍රදානය කළාය.
මෙම උත්සව අවස්ථාව සඳහා යුද්ධ හමුදාවේ සියලුම රෙජිමේන්තුවල සේවා වනිතා ශාඛාවන්හී සභාපතිනියන්, ව්‍යාපෘති භාර නිලධාරිනියන් සහ යුද්ධ හමුදා සේවා වනිතා ඒකකයේ තවත් සාමාජික/ සාමාජිකාවන් පිරිසක් ද එක්වූහ.
මූලාශ්‍රය – දිනමිණ
