සුඛෝපභෝගී මෝටර් රථ හා ජීප් රථ 430ක් පමණ ව්‍යාජ ලෙස පැරණි හා අබිලි වාහන අංකවලට ලියාපදිංචි කරමින් සිදුකළ සංවිධානාත්මක ජාවාරමක් සම්බන්ධයෙන් මධ්‍යම දූෂණ මර්ධන ප්‍රහාරක බලකාය මගින් විමර්ශනය කර තිබේ.

මෝටර් රථ ලියාපදිංචි කිරීමේ දෙපාර්තමේන්තුවේ සේවයේ නිරත දූෂිත නිලධාරීන්ගේ ද සහාය ඇතිව සිදුකෙරුනු මෙම ජාවරම මගින් මෙරටට බදු මුදල් විශාල වශයෙන් අහිමි වී ඇති බවද පැවසේ.

මෙම ජාවාරම සම්බන්ධයෙන් සිදුවූ මෙම පරීක්ෂණය පොලිස්පතිගේ නියමයෙන් අපරාධ පරීක්ෂණ දෙපාර්තමේන්තුවේ නීති විරෝධී දේපොළ හා වත්කම් විමර්ශන කොට්ඨාසයේ නිලධාරීන් විසින් ඊයේ (22) භාරගනු ලැබීය.

ඊට හේතුවන වන්නේ මධ්‍යම දූෂණ මර්ධන ප්‍රහාරක බලකායට දෛනිකව සිදු කිරීමට ඇති විමර්ශන ප්‍රමාණය අධික වීම හේතුවෙන් හා  වාහන සම්බන්ධයෙන් වූ විමර්ශනය වෙනුවෙන් පමණක් වෙන් කිරීමට ප්‍රමාණවත් නිලධාරීන් මණ්ඩලයක් නොමැති බැවිනි.

පොලිස් මූලස්ථානයේ උසස් නිලධාරියෙකු මෙසේද පැවසීය : “අපරාධ පරීක්ෂණ දෙපාර්තමේන්තුවට මෙවැනි විමර්ශන පැවැත්වීමට පහසුකම් ඕනෑ තරම් තිබෙනවා. ඒ වගේම තමයි එම විමර්ශන කටයුත්තට වෙනම නිලධාරීන් කණ්ඩායමක් වෙන් කරන්නත් පුළුවන්. පොලිස්පතිවරයා මේ ගැනත් කල්පනා කරලයි විමර්ශන අපරාධ පරීක්ෂණ දෙපාර්තමේන්තුවට භාර දීල තියෙන්නේ. අනික මෙම අපරාධය සුළුවෙන් තැකිය හැකි එකක්ද නෙමෙයි.“

මෝටර් රථ ලියාපදිංචි කිරීමේ දෙපාර්තමේන්තුවේ නිලධාරීන් 05 දෙනකු සම්බන්ධයෙන් තොරතුරුද මෙතෙක් සිදුකර තිබු විමර්ශන වලින් අනාවරණය වී ඇත. එසේම එම දෙපාර්තමේන්තු ලේඛණාගාරයේ සේවයේ නිරත ලිපිකරුවකු පරිහරණය කරමින් තිබු ව්‍යාජ ලෙස ලියාපදිංචි කල සුඛෝපභෝගී ජීප් රථයක් ද මධ්‍යම දූෂණ මර්ධන ප්‍රහාරක බළකාය සිය භාරයට ගෙන තිබුණු අතර, ඔහුට එරෙහිව නිසි පියවර ගන්නා බවද ඇතැයිද පැවසේ.

තවද, ව්‍යාජ ලේඛණ යොදා ගනිමින් ලියාපදිංචි කළ වාහන 430ක් ඇතුළත් ලැයිස්තුවද මධ්‍යම දූෂණ මර්ධන ප්‍රහාරක බළකාය මඟින් සොයාගෙන තිබිණි. 

එම වාහන පරිහරණය කරන අය අතර රජයේ ඉහළ නිලධාරීන්, පොලිස් නිලධාරීන් මෙන්ම ව්‍යාපාරිකයන් ද සිටින බවද පැවසේ.

එම වාහන 430 පිළිබඳව සොයා ඒ ගැන ඉදිරි විමර්ශන කටයුතු පැවැත්වීමේ වගකීම අපරාධ පරීක්ෂණ දෙපාර්තමේන්තුව සතු බව තවදුරටත් පොලිස්පතිවරයා ප්‍රකාශ කර ඇත.