රාත්‍රී කාලයේ දී විවිධ ප්‍රදේශවල සුපිරි වෙළඳ ප්‍රදර්ශනාගාර බිඳ රුපියල් කෝටියකට ආසන්න වටිනා ජංගම දුරකථන ඇතුළු විදුලි උපකරණ සොරාගත් මාලිගාවත්ත “ඩිමෙල් වත්තේ කළු” නැමැත්තා හා සොර බඩු මිලදී ගත් කියන මාලිගාවත්ත ආර් බි වත්තේ “උක්ඔයිල් ” නැමැති සංවිධානාත්මක අපරාධකරුද අත්අඩංගුවට ගත් බව බස්නාහිර පළාත් දකුණු දිසාව අපරාධ කොට්ඨාසය කියයි
එම සැකකරුවන් සමග ඉතා වටිනා ස්මාර්ට් ෆ‌ෝන් 42 ක් ලැප්ටොප් පරිගණක 4 ක් ටැබ් යන්ත්‍ර තුනක්, මෙන්ම නිවසකින් සොරා ගෙන තිබූ පවුම් 3කට ආසන්න උණු කරන ලද රන් කැබලි පොලිස් භාරයට ගෙන ඇත
ඉකුත් මාස 2ක පමණ කාලයක් තුළදී අවිස්සාවේල්ල හංවැල්ල මිරිහාන සහ කිරිබත්ගොඩ පොලිස් වසම් වල සිදු වූ නොවිසඳුණු අපරාධ සොරකම් 13 කට අදාළව සිදු කළ දීර්ඝ විමර්ශනයකින් අනතුරුව සොරකමේ යෙදුණු ප්‍රධාන සැකකරු සීසීටීවී දර්ශන ඔස්සේ සිදුකළ විමර්ශනවලදී හඳුනා ගැනීමෙන් අනතුරුව මාලිගාවත්ත ප්‍රදේශයේ දී අත්අඩංගුවට ගැනීමට හැකි වූ බව පොලිසිය කියයි
සැකකරු මීට පෙර සිදු කළ සොරකම් නඩු කිහිපයක් සම්බන්ධයෙන් වසර 2කට ආසන්න කාලයක් රිමාන්ඩ් බන්ධනාගාර ගතව සිට මීට මාස දෙකකට පමණ ඉහතදී ඇප මත නිදහස්ව පැමිණි පුද්ගලයෙක් බවත් පොලිස් විමර්ශනවලදී වැඩිදුරටත් අනාවරණය වී ඇත
එම සැකකරුගෙන් සිදුකළ ප්‍රශ්න කිරීමේදී රාත්‍රී කාලයේ දී එම ප්‍රදේශ හරහා ගමන් ගන්නා බස් රථ වලින් ගොස් ප්‍රදර්ශනාගාර බිද දේපල සොරා ගැනීමෙන් අනතුරුව ඒ සියලුම දේපල මාලිගාවත්ත ආර් බි වත්තේ උක්ඔයිල් නැමැත්තා වෙත ලබාදී මුදල් ලබාගත් බවට අනාවරණ වූ බව පොලිසිය කියයි
ඒ අයුරින් එම මුදල් වලින් දිනකට රුපියල් 20,000 ට ආසන්න මත් කුඩු මිලදී ගෙන පානය කළ බවත් සැකකරු වැඩිදුරටත් අනාවරණ කර ඇත
සැකකරුගෙන් අනාවරණය වූ තොරතුරු අනුව සොර බඩු මිලදී ගත් පුද්ගලයා සන්තකයේ තිබී සොරාගත් දේපළ වලින් සියයට අනූවක් පමණ සොයාගත් බවත් සමහර ස්මාර්ට් වර්ගයේ ජංගම දුරකථන වල මුරපදය වෙනස් කර වෙනත් මුර පද යොදා සැකකරු විවිධ පුද්ගලයන් වෙත අලෙවි කර තිබූ බවත් පොලිස් විමර්ශනවලදී අනාවරණ වී ඇත
සොයාගත් ජංගම දුරකථන මිලදී ගත් පුද්ගලයාට ඉහල තාක්ෂණික දැනුමක් ඇත්තෙකු බවත් පොලිසිය සඳහන් කරයි.
සැකකරුවන් දෙදෙනා නුගේගොඩ මහේස්ත්‍රාත් අධිකරණය වෙත ඉදිරිපත් කිරීමට නියමිතය
