ශ්‍රී ලංකා රජය සහ ජාත්‍යන්තර ස්වෛරී බැඳුම්කර හිමියන් අමෙරිකානු ඩොලර් බිලියන 12‍.5 ක ස්වෛරී බැඳුම්කර ණය ප්‍රතිව්‍යුගතකරණය සඳහා ප්‍රතිපත්තිමය එකඟතාවකට පැමිණි බව ලන්ඩන් කොටස් වෙළෙඳපොළ  අද (19) පස්වරුවේ නිවේදනය කර ඇත.

ශ්‍රී ලංකාව 2022 අප්‍රේල් මාසයේදී ස්වෛරී  බැඳුම්කර මගින් ලබාගත් ණය ආපසු ගෙවීම තාවකාලිකව අත්හිටවූ අතර අනතුරුව එම ණය ප්‍රතිව්‍යුහගතකරණය සඳහා සාකච්ඡා ආරම්භ කළේ ය.

ක්ලිෆර්ඩ් චාන්ස් සහ ලසාර්ඩ් යන උපදේශන සමාගම් ශ්‍රී ලංකාව වෙනුවෙන් සාකච්ඡාවලට මැදිහත්වූ අතර බැඳුම්කර හිමියන් වෙනුවෙන් ඊට මැදිහත්වූයේ වයිට් ඇන්ඩ් කේස් සහ රොස්චයිල්ඩ් යන සමාගම් වේ.

ස්වෛරී බැඳුම්කර ප්‍රතිව්‍යුහගතකරණයට අදාළ තීරණාත්මක සාකච්ඡා වටයක් ඊයේ (18) පැවති අතර ප්‍රතිපත්තිමය එකඟතාවට එළැඹ ඇත්තේ එම සාකච්ඡා වටයෙන් පසුවයි.

මෙම ප්‍රතිපත්තිමය එකඟතාවට ශ්‍රී ලංකාවේ කැබිනට් මණ්ඩලයද අද උදෑසන අනුමැතිය ලබාදී ඇතැයි, ලන්ඩන් කොටස් වෙළෙඳපොළ නිකුත් කළ නිවේදනයේ සඳහන් වේ.

මෙම ස්වෛරී බැඳුම්කර සම්බන්ධයෙන් ඇතිකරගත් එකඟතාව පිළිබඳව ද්වීපාර්ශ්වික ණය හිමිකරුවන් ඇතුළත් නිල ණය හිමි කමිටුව හා ජාත්‍යන්තර මූල්‍ය අරමුදල දැනුවත් කළ යුතුයි.

එහිදී ජාත්‍යන්තර මූල්‍ය අරමුදලේ ණය වැඩ සටහනේ මූලික රාමුවට මෙම තීරණ ඇතුළත්දැයි සලකා බැලෙනු ඇති.

නිල ණය හිමි කමිටුව හා ජාත්‍යන්තර මූල්‍ය අරමුදල එකඟතාව පලකිරීමෙන් පසුව යෝජිත ක්‍රමවේදය ක්‍රියාත්මක කිරීමට අවස්ථාව හිමි වේ.

මේ අතර ජනාධිපති මාධ්‍ය අංශය අද පස්වරුවේ නිවේදනය කළේ, ද්වීපාර්ශ්වින ණය හිමියන්ගේ නිල කමිටුව, ස්වෛරී බැඳුම්කර හිමිකරුවන්, චීන එක්සිම් හා සංවර්ධන බැංකු සමග ඇතිකරගත් ප්‍රතිපත්ති එකඟතා අනුව ශ්‍රී ලංකාවට අමෙරිකානු ඩොලර් බිලියන 17 ක ණය සහනයක් ලැබෙන බවයි.

අපේක්ෂකයන් ප්‍රවර්ධනය කිරීමට කටයුතු කළ හම්බන්තොට රාජ්‍ය නිළධාරින් 19 දෙනෙක් පිළිබඳව පරීක්ෂණ පැවැත්වෙන බව හම්බන්තොට දිස්ත්‍රික් තේරීන් භාර නිලධාරී එච්. පී. සුමනසිරි මහතා පවසයි.

ඔහු වැඩිදුරටත් සඳහන් කළේ ඉන් රාජ්‍ය නිලධාරීන් 09 දෙනෙක්ගේ මැතිවරණ රාජකාරි අත්හිටවූ බවයි.

දේශපාලන කටයුතුවල නිරතවීම සම්බන්ධයෙන් එම රාජ්‍ය නිලධාරීන්ට එරෙහිව පැමිණිලි 17ක් ඊයේ (18) වාර්තා වී තිබුණි.

නිලධාරින් හා අනෙකුත් අවශ්‍යතා සම්පූර්ණ වූ පසු ප.ව. 7ට පමණ ඡන්ද ගණන්කිරීමේ මධ්‍යස්ථානවල ගණන්කිරීම් කටයුතු ආරම්භ කරන බව මැතිවරණ කොමිසමේ සභාපති ආර්. එම්. ඒ. එල්. රත්නායක මහතා පවසයි.

ජනාධිපතිවරණ ඡන්ද විමසීම සම්බන්ධයෙන් අද (19) පෙරවරුවේ රජයේ ප්‍රවෘත්ති දෙපාර්තමේන්තුවේ පැවති මාධ්‍ය හමුවේදී රත්නායක මහතා තවදුරටත් කියා සිටියේ, තැපැල් ඡන්ද ගණන්කිරීම ප.ව. 4.15ට පමණ ආරම්භ කිරීමට කටයුතු කර ඇති බවයි.

“21 වනදා ඡන්ද මධ්‍යස්ථානවලින් ඡන්ද පෙට්ටි ලැබීමෙන් අනතුරුව නිලධාරින් හා අනෙකුත් අවශ්‍යතා සම්පූර්ණ වූ පසු ප.ව. 7.ට පමණ දිස්ත්‍රික්කවල ඒ ඒ ගණන්කිරීමේ මධ්‍යස්ථානවල ගණන්කිරීම ආරම්භ වෙනවා. තැපැල් ඡන්දගණන් කිරීම ප.ව. 4.15ට පමණ ආරම්භ කිරීමට දැනට කටයුතු කරලා තිබෙනවා. ඒ වගේම ගණන්කිරීමේ කටයුතු සිදුවන්නේ දිස්ත්‍රික් මට්ටමින් එක් එක් පරිශ්‍ර තුළ. ගණන්කිරීම අවසානයේ අදාළ ප්‍රතිඵල ලැබුණු විගස ඒවා මාධ්‍යට ලබාදීමට සියලු කටයුතු යොදලා තිබෙන්නේ. පළමුව ගණන්කිරීම කරනු ලබන්නේ එක් එක් අපේක්ෂකයාට ලැබී ඇති ඡන්ද ප්‍රමාණය ගණනය කිරීම. එම ගණනය කිරීමෙන් අනතුරුව (දිස්ත්‍රික් මට්මින් ගණන් කිරීම් සිදුවේ) පළමුව ඡන්ද පෙට්ටිවල තිබෙන ඡන්ද ප්‍රමාණය ගණනය කිරීම සිදුවෙනවා. ඉන් පසු එක් එක් අපේක්ෂකයාට ලැබී තිබෙන ඡන්ද ප්‍රමාණය ගණනය කරලා, එය ඡන්ද ප්‍රදේශ මට්ටමින් හා දිස්ත්‍රික් මට්ටමින් සකස් කිරීම සිදුකරනවා. මැතිවරණ මහලේකම් කාර්යාලය තමයි සමස්ත ප්‍රතිඵලය ගණනය කරනු ලබන්නේ. කිසියම් අපේක්ෂකයෙකුට වලංගු ඡන්ද සංඛ්‍යාවෙන් සියයට 50ක් හෝ එකක් ලැබිලා තියෙනවාද කියලා බලනවා. එහෙම ලැබිලා තියෙනවානම් ඒ අවස්ථාවේදී ඡන්ද ගණන් කිරීමේ කටයුතු අවසන් වෙනවා. අපි ජනාධිපතිවරයා ප්‍රකාශයට පත්කරනවා. යම් හෙයකින් කිසිඳු අපේක්ෂකයෙකුට සියයට 50ක් හෝ එකක් ලැබිලා නැතිනම්, මනාප ගණන් කිරීමේ අවස්ථාවට යා යුතු වෙනවා. එහිදී සිදුවන්නේ වැඩිම ඡන්ද සංඛ්‍යාවක් ලබාගත් අපේක්ෂකයන් දෙදෙනා තරගයේ ඉතිරි කරලා, ඉතිරි අපේක්ෂකයන් 36 දෙනා තරගයෙන් ඉවත් කරනවා”.