අතුරුගිරියේ වෙඩිතැබීමට පැමිණි බවට සැක කෙරෙන මෝටර් රථය කඩුවෙල, කොරතොට ප්‍රදේශයේ දමා ගොස් තිබිය දී සොයා ගෙන තිබේ.

අද (08) උදැසන 10ට පමණ, අතුරුගිරිය නගරයේ ඔරලෝසු කනුව ආසන්නයේ රූපලාවන්‍ය ආයතනයක් විවෘත කිරීමේ උත්සවයක් අතරතුර මෙම වෙඩි තැබීම සිදු කර තිබුණි.

පොලිස් විමර්ශනවලදී අනාවරණය වී ඇත්තේ, මෝටර් රථයකින් පැමිණ වෙඩික්කරුවන් ටී 56 ගිනිඅවි දෙකක් යොදා ගනිමින් මෙම වෙඩි තැබීම සිදු කර ඇති බවය.

වෙඩිතැබීමෙන් ප්‍රසිද්ධ ව්‍යාපාරිකයෙකු වන 55 හැවිරිදි සුරේන්ද්‍ර වසන්ත පෙරේරා නොහොත් ක්ලබ් වසන්ත සහ 38 හැවිරිදි පුද්ගලයෙක් ජීවිතක්ෂයට පත් විය.

වෙඩිතැබීමෙන් ප්‍රසිද්ධ ගායන ශිල්පිනියක් වන කේ සූජීවා ද තුවාල ලැබූ අතර තවත් කාන්තාවන් දෙදෙනෙකු සහ පිරිමි පුද්ගලයෙකු තුවාල ලබා තිබේ.

තුවාල ලැබූ කාන්තාවක් සහ පිරිමි පුද්ගලයෙකු කොළඹ ජාතික රෝහලේ ප්‍රතිකාර ලබන අතර අනෙක් කාන්තාවන් දෙදෙනා හෝමාගම රෝහලේ ප්‍රතිකාර ලබයි.

——————

(මුල් පුවත ප.ව. 12:31, 8 ජූලි 2024)

අතුරුගිරිය වෙඩි තැබීමෙන් මියගිය ගණන ඉහළට

අතුරුගිරිය වෙඩි තැබීමෙන් මියගිය පුද්ගලයින් ගණන දෙදෙනෙකු දක්වා ඉහළ ගොස් තිබෙනවා.

මේ අතර වාර්තා වෙන්නේ, ගායිකා කේ. සුජීවා මහත්මියගේ තත්වය බරපතළ නොවන බවයි.

ජාතික රෝහලේ අධ්‍යක්ෂ වෛද්‍ය රුක්ශාන් බෙල්ලන මහතා පවසා ඇත්තේ වෙඩි තැබීමෙන් කේ.සුජීවා මහත්මියගේ පාදවලට හානි සිදුව ඇති බවය.

————————-

(මුල් පුවත ප.ව. 12:06, 8 ජූලි 2024)

අතුරුගිරියේ වෙඩිතැබීමකින් ක්ලබ් වසන්ත මරුට: කේ. සුජීවා ජාතික රෝහලට

අද (08) දින අතුරුගිරිය ප්‍රදේශයේ ව්‍යාපාරික ස්ථානයක් විවෘත කිරීමේ උත්සවයකට සහභාගී වීම සඳහා සුරේන්ද්‍ර වසන්ත නොහොත් ක්ලබ් වසන්ත සහ කේ. සුජීවා මෙම ස්ථානයට පැමිණ තිබේ.

එම අවස්ථාවේ මෙම වෙඩි තැබීම සිදුව ඇතැයි පොලිසිය සඳහන් කරයි.

රෝහල්ගත කර සිටි ගායන ශිල්පිණී කේ. සුජීවා මේවන විට කොළඹ ජාතික රෝහල වෙත හදිසි ප්‍රථිකාර සඳහා මාරුකර යවා ඇත.

——————————

(මුල් පුවත පෙ.ව. 11:38, 8 ජූලි 2024)

අතුරුගිරියේ වෙඩිතැබීමකින් ක්ලබ් වසන්ත මරුට

අතුරුගිරිය නගරයේ මීට මොහොතකට පෙර වෙඩි තැබීමක් සිදුව තිබේ.

මෙම වෙඩි තැබීමෙන් ප්‍රසිද්ධ ව්‍යාපාරිකයෙකු වන සුරේන්ද්‍ර වසන්ත නොහොත් “ක්ලබ් වසන්ත” මියගොස් තිබෙන අතර ගායන ශිල්පිණී කේ. සුජීවා තුවල ලබා ඇත.

එම වෙඩි තැබීමෙන් තුවාල ලැබූ 06 දෙ.නෙකු අතුරුගිරිය සහ හෝමගම රෝහලට ඇතුලත් කර තිබේ.