දිවයිනේ නිරිතදිග ප්‍රදේශවල පවතින වැසි තත්ත්වය තවදුරටත් බලාපොරොත්තු විය හැකි බව කාලගුණවිද්‍යා දෙපාර්තමේන්තුව පවසයි.

බස්නාහිර, සබරගමුව, දකුණු හා වයඹ පළාත්වලත් මහනුවර හා නුවරඑළිය දිස්ත්‍රික්කවලත් විටින් විට වැසි හෝ ගිගුරුම් සහිත වැසි ඇති විය හැකි අතර බස්නාහිර, සබරගමුව සහ දකුණු පළාත්වල ඇතැම් ප්‍රදේශවල මි.මී. 75ට වැඩි තරමක් තද වැසිද බලාපොරොත්තු විය හැකි බව එම නිවේදනයේ දැක්වේ.

ඌව හා නැගෙනහිර පළාත්වලත් පොළොන්නරුව සහ මුලතිව් දිස්ත්‍රික්කවලත් සවස් කාලයේදී හෝ රාත්‍රී කාලයේදී තැනින් තැන වැසි හෝ ගිගුරුම් සහිත වැසි ඇති වේ.

ගිගුරුම් සහිත වැසි සමඟ ඇතිවිය හැකි තාවකාලික තද සුළංවලින් සහ අකුණු මඟින් සිදුවන අනතුරු අවම කර ගැනීමට අවශ්‍ය පියවර ගන්නා ලෙස කාලගුණවිද්‍යා දෙපාර්තමේන්තුව ජනතාවගෙන් ඉල්ලා සිටී.

තවද මෙම අයහපත් කාලගුණික තත්ත්වය හේතුවෙන් දිස්ත්‍රික්ක 10ක පුද්ගලයන් 25,863ක් පීඩාවට පත්ව සිටින බව ආපදා කළමනාකරණ මධ්‍යස්ථානය සඳහන් කරයි.

රත්නපුර,කෑගල්ල,කළුතර,ගම්පහ,මාතර,ගාල්ල, නුවරඑළිය, පුත්තලම,කුරුණෑගල හා යාපනය යන දිස්ත්‍රික්කවල පදිංචි පවුල් 6,250කට අයත් පුද්ගල පිරිසක් මෙලෙස පීඩාවට පත්ව සිටින අතර වැඩිම පිරිසක් ගම්පහ දිස්ත්‍රික්කයෙන් වාර්තා වේ.

තවද වාරිමාර්ග දෙපාර්තමේන්තුව විසින් තවදුරටත් කළු ගඟේ උප ද්‍රෝණියක් වන කුඩා ගඟ ආශ්‍රිත ප්‍රදේශ වලටත් නිල්වලා ගඟ පහළ නිම්නයේ ප්‍රදේශ වලටත් ගිං සහ අත්තනගලු ඔය පහළ ප්‍රදේශ වලට ගංවතුර අවදානම් නිවේදන නිකුත් කර ඇත.

කුකුළේ ගඟ ජලාශයේ වාන් දොරටුවක් විවෘත කර ඇති අතර එමඟින් විදුලි උත්පානය සඳහා යොදාගන්නා ජල පරිමාවද සමඟ තප්පරයට ඝන මීටර් 60ක් දක්වා අඩුකර ඇති බව කළුතර දිස්ත්‍රික් අපදා කළමනාකරණ ඒකකයේ සහකාර අධ්‍යක්ෂ කර්නල් අරවින්ද අමරසේකර මහතා පැවසීය.