බැඳුම්කර සිද්ධිය සම්බන්ධයෙන් චෝදනා ලැබ සිටින හිටපු මහා බැංකු අධිපති අර්ජුන් මහේන්ද්‍රන් මහතා ශ්‍රී ලංකාවට ගෙන්වා ගැනීමට නීතිපති දෙපාර්තමේන්තුව යළිත් වරක් උත්සාහ ගෙන ඇති නමුත් සිංගප්පූරු බලධාරීන් දැනුම් දී ඇත්තේ සිය රටේ නීතියට අනුව සිංගප්පූරු පුරවැසි භාවය හිමි හිටපු මහ බැංකු අධිපති අර්ජුන් මහේන්ද්‍රන් මහතා ශ්‍රී ලංකාවට ලබා දිය නොහැකි බවය.
උපතින් ශ්‍රී ලාංකිකයකුව පසුව සිංගප්පූර පුරවැසියෙකු වූ අර්ජුන් මහේන්ද්‍රන් මහතා ශ්‍රී ලංකා මහබැංකු අධිපති ධූරය හෙබවූයේ යහපාලන ආණ්ඩුව යටතේය.
2015 වසරේ බැඳුම්කර සිද්ධීයෙන් රුපියල් කෝටි 1000ක පාඩුවක් සිදු කළේ යැයි මහේන්ද්‍රන් මහතාට චෝදනා එල්ල වී තිබුණි.
මීට පෙරද මහේන්ද්‍රන් මහතා මෙරටට ගෙන්වා ගැනීමට නීතිපති දෙපාර්තමේන්තුව උත්සාහ ගත් නමුත් සිංගප්පූරු බලධාරීන්ගෙන් ඊට යහපත් ප්‍රතිචාරයක් ලැබුනේ නැත.
අල්ලස් කොමිසම පවරා ඇති නඩුවකට අදාලව කොළඹ මහේස්ත්‍රාත් අධිකරණය, මහේන්ද්‍රන් මහතාට පසුගිය 25 වැනිදා වන විට අධිකරණය හමුවේ පෙනී සිටින ලෙස නොතිසී නිකුත් කර තිබුණි.
බැඳුම්කර සාවද්‍ය පරිහරණය සම්බන්ධයෙන් මෙම නඩුව පවරා තිබුණි.
මීට අමතරව මහ බැංකු බැඳුම්කර වංචාව සම්බන්ධයෙන් මහේන්ද්‍රන් මහතා අත්අඩංගුවට ගැනීමට කොළඹ නිත්‍ය ත්‍රිපුද්ගල විනිසුරු මඩුල්ල ජාත්‍යන්තර පොලිසිය හරහා වරෙන්තු නිකුත් කිරීමක්ද කර තිබුණි.
ජනාධිපති අනුර කුමාර දිසානායක මහතා පසුගිය ජනාධිපතිවරණයට පෙර පවසා තිබුණේ, මහේන්ද්‍රන් මහතා මෙරටට යළි ගෙන්වා ගැනීමට අවශ්‍ය පියවර ගන්නා බවය.
එය තම ප්‍රමුඛ කාර්යයක් බවද ජනාධිපතිවරයා එහිදී අවධාරණය කලේය.
ජනාධිපතිවරණයෙන් පසු එවකට කැබිනට් ප්‍රකාශක විදේශ කටයුතු අමාත්‍ය විජිත හේරත් මහතා මාධ්‍ය හමුවේ පැහැදිලි කළේ, ජනාධිපති විමර්ශන කොමිසමේ සහ පාර්ලිමේන්තු තේරීම් කාරක සභාවේ කරුණු සැලකිල්ලට ගනිමින් බැඳුම්කර වංචාව සම්බන්ධයෙන් මහජන ආරක්ෂක අමාත්‍යංශය ද නීතිමය පරීක්ෂණ ආරම්භ කළ බවය.
මහේන්ද්‍රන් මහතා මහ බැංකුවේ අධිපතිවරයා ලෙස කටයුතු කරද්දී 2015 පෙබරවාරි 27 වැනිදා රජයේ බැඳුම්කර නිකුත් කිරිම මගින් එම වංචාව සිදුවුණු අතර මහේන්ද්‍රන් මහතාගේ බෑනා වන අර්ජුන් ඇලෝසියස්ට අයත් පර්පෙචුවල් ට්‍රෂෙරීස් ලිමිටඩ් ආයතනය බැඳුම්කර සිද්ධියේ ප්‍රධාන ප්‍රතිලාභියා ලෙස චෝදනා ලැබ සිටියේය.
මහේන්ද්‍රන් මහතා සිංගප්පූරුවේ නීතියට අනුව උදර්පණය කළ නොහැකි බව සිංගප්පූරුවේ නීති බලධාරීන් ශ්‍රී ලාංකික බලධාරීන්ට දිගින් දිගටම අවධාරණය කර ඇති බවද ඉහළ පෙළේ ආරංචි මාර්ග සඳහන් කර තිබේ.
මේ අතර මෙරට ප්‍රාග්ධන වෙළෙඳපොළ ඉතිහාසයේ සිදුවූ වඩාත් ආන්දෝලනාත්මක භාණ්ඩාගාර බැඳුම්කර වෙන්දේසිය සිදුවී අදට (27) වසර 10 ක් වේ.
2015 පෙබරවාරි 27 දින පැවති මෙම වෙන්දේසිය සඳහා රු. මිලියන 1,000කින් යුතු භාණ්ඩාගාර බැඳුම්කර ප්‍රමාණයක් ඉදිරිපත් කර තිබුණු අතර ඒ වන විට මේ හා සමාන ණය උපකරණ වෙනුවෙන් බැඳුම්කර වෙළෙඳපොළේ තීරණය වී තිබුණු පොළී අනුපාතිකය 9.50%ක් පමණ විය.
පුවත්4 days ago
කැබිනට් තීරණ2 days ago
පුවත්1 week ago
පුවත්1 week ago
පුවත්6 days ago