ප්‍රවාහන මහා මාර්ග වරාය සහ සිවිල් ගුවන් සේවා ඇමැති බිමල් රත්නායක සහ දුම්රිය සාමාන්‍යාධිකාරීවරයා ඇතුළු පිරිසකට ලබන පෙබරවාරි 19 වැනිදා අනුරාධපුර මහාධිකරණය හමුවේ පෙනී සිටින ලෙසට අනුරාධපුර මහාධිකරණ විනිසුරු නලින්ද හේවාවසම් මහතා නියෝග කර තිබේ.

ඒ, ඉන්දීය ණය ආධාර යටතේ උතුරු දුම්රිය මාර්ගයේ මහව සහ අනුරාධපුර අතර කොටස නවීකරණය කිරීමේදී ආබාධිත පුද්ගලයන් නොසලකා හැර, එම දුම්රිය මාර්ගය නිසි ප්‍රමිතියකින් තොරව, ඉදිකර ඇති බවට චෝදනා කරමින් ආබාධ සහිත කාන්තාවන්ගේ සංගමය අනුරාධපුර මහාධිකරණයට ඉදිරිපත් කළ පෙත්සමක් සලකා බලමිණි.

මහාධිකරණ විනිසුරුවරයා මෙසේ නියෝග කළේ තලාව, පහළගම ලිපිනයේ පදිංචි ආබාධ සහිත කාන්තාවන්ගේ සංගමයේ සභාපති එම්. ඩී. කමලාවතී, නීතිඥ අමන්දා කල්පශාකාගේ උපදෙස් පරිදි, නීතිඥ ධනුක කුමාරවඩු සහ නීතීඥ ඉසුරු මහේෂ් පණ්ඩිත යන මහත්වරුන් මගින් අනුරාධපුර මහාධිකරණයට ඉදිරිපත් කළ රීට් පෙත්සමක් සලකා බලමිනි.

මෙම නඩුවේ අනිකුත් වගඋත්තරකරුවන් ලෙස නම් කර ඇත්තේ ප්‍රවාහන, මහා මාර්ග වරාය හා සිවිල් ගුවන් සේවා අමාත්‍යාංශයේ ලේකම්වරයා, අධිකාරීවරයා ඉංජිනේරු අධිකාරී (උතුර, අනුරාධපුර) සහ නීතිපතිවරයායි.

මහව සිට අනුරාධපුරය දක්වා දුම්රිය මාර්ගය අලුත්වැඩියා කිරීමේදී වග උත්තර කරුවන් ආබාධ සහිත තැනැත්තන්ගේ අයිතිවාසිකම් පිළිබඳ පනත මුළුමනින්ම උල්ලංඝනය කර ඇති බවටද චෝදනා කළ පෙත්සම්කාරියගේ නීතිඥවරුන්, මේ තුලින් වග උත්තරකරුවන් ආබාධ සහිත තැනැත්තන් නොසලකා හැර ඇති බවද කීවේය.

ප්‍රශ්නගත දුම්රිය මාර්ගය අලුත්වැඩියා කිරීමේදී වග උත්තරකරුවන් සිය නිල තනතුරට අදාළ රාජකාරී පැහැර හැර ඇති බවටද චෝදනා කළ පෙත්ස්ම්කාරියගේ නීතිඥවරුන්, දුම්රිය මාර්ගයක් අළුත් වැඩියා කිරීමේදී ආබාධ සහිත පුද්ගලයන්ගේ අවශ්‍යතා ඉටු කිරීමට රාජ්‍ය නිලධාරින් නිල බලයෙන් බැඳී සිටින බවද අවධාරණය කළේය.

පෙත්සම්කාරියගේ නීතිඥවරුන් දැක්වූ කරුණු කෙරෙහි සිය අවධානය යොමු කළ අනුරාධපුර මහාධිකරණ විනිසුරු නලින්ද හේවාවසම් විමසා සිටියේ, මධ්‍යම ආණ්ඩුවට අයත් විෂයක් සම්බන්ධයෙන්, මධ්‍යම ආණ්ඩුවේ අමාත්‍යවරයකුට හා බලධාරීන්ට නොතීසි නිකුත් කිරීමට සහ මධ්‍යම ආණ්ඩුවට අයත් විෂයක් සම්බන්ධයෙන් රීට් ආඥා නිකුත් කිරීමට පළාත් බද මහාධිකරණයට බලයක් තිබේද යන්නයි?

ඊට ප්‍රතිචාර දක්වමින් පෙත්සම්කාරියගේ නීතිඥවරුන් මහධිකරණය පවසා සිටියේ, 1996 අංක 28 දරන ආබාධ සහිත තැනැත්තන්ගේ අයිතිවාසිකම් ආරක්ෂා කිරීමේ පනතේ 24 (1) සහ 24 (3) වගන්ති ප්‍රකාරව, ආබාධ සහිත පුද්ගලයන්ගේ අයිතිවාසිකම් උල්ලංඝනය වූ අවස්ථාවකදී ඊට අදාළව අධිකරණ බලය සහ සාධාරණ සහ යුක්ති සහගත ප්‍රතිකර්ම සහ සහන ලබාදීමට පළාත් බද මහාධිකරණයකට බලය පවතින බවය.

පෙත්සම්කාරිය ස්වකීය පෙත්සම මගින් ඉල්ලා ඇති රීට් ආඥාව නිකුත් කිරීම සම්බන්ධයෙන්ද පෙබරවාරි මස 19 වැනිදා සලකා බැලීමට නියමිතය.