කොළඹ ජාතික රෝහලේ හදිසි අනතුරු ඒකකයේ විකිරණ පරීක්ෂණ යන්ත්‍ර 02 අක්‍රීය තත්ත්වයට පත්ව ඇති නමුත් රෝගීන්ගේ විකිරණ පරීක්ෂණ කටයුතු සිදු කිරීම සඳහා රෝහල තුළ විකල්ප වැඩපිළිවෙළක් ක්‍රියාත්මක කර ඇති බව කොළඹ ජාතික රෝහලේ වැඩබලන නියෝජ්‍ය අධ්‍යක්ෂ ජනරාල් එස්.පී.ඒ්‍.එල් රණවීර මහතා පවසයි.

ඔහු පැවසුවේ මෙලෙස බිඳ වැටී ඇත්තේ පැරණි විකිරණ පරීක්ෂණ යන්ත්‍ර දෙකක් වන බවත් ක්‍රියාකාරි තත්ත්වයේ පැවැති හදිසි අනතුරු ඒකකයේ එකම විකිරණ යන්ත්‍රයද පසුගිය සඳුදා දින අක්‍රීය වී ඇති බවය.

එම විකිරණ පරීක්ෂණ යන්ත්‍රය යථාවත් කිරීම සඳහා අදාළ සමාගමට මේ වන විට දැනුම් දී ඇති බවත් ඔහු පැවසීය.

විකිරණ පරීක්ෂණ යන්ත්‍ර දෙකම යථාවත් කිරීම සඳහා සෞඛ්‍ය අමාත්‍යංශයට හා ජීව වෛද්‍ය ඉංජිනේරු අංශයට මේ වන විටත් දැනුම් දී ඇති බවත් අදාළ සමාගම් සමග එම යන්ත්‍ර යථාවත් කිරිමේ කටයුතු මේ වන විට සිදුකරමින් බවතින බවත් වැඩබලන නියෝජ්‍ය අධ්‍යක්ෂ ජනරාල්වරයා පැවසීය.

මෙම යන්ත්‍ර අක්‍රීය තත්ත්වයට පත්වුවද රෝගී සත්කාර සේවාවන් පවත්වාගෙන යාම සඳහා කඩිනමින් විකල්ප ක්‍රියාමාර්ග ගැනීමට ජාතික රෝහල කටයුතු කර ඇති බවත් ඒ අනුව රෝහල තුළම අනෙකුත් විකිරණ පරීක්ෂණ යන්ත්‍ර භාවිත කරමින් එම කටයුතු මේ වන විට සිදුකරමින් පවතින බවත් ඔහු වැඩිදුරටත් අදහස් දක්වමින් පැවසීය.

සබැඳි පුවත්

හිටපු ජනාධිපති රනිල් වික්‍රමසිංහ මහතාව අල්ලස් හෝ දුෂණ චෝදනා විමර්ශන කොමිෂන් සභාව වෙත කැඳවා තිබේ.

ඒ ඌව පළාත් හිටපු ප්‍රධාන අමාත්‍ය චාමර සම්පත් දසනායක මහතාට එරෙහි පැමිණිල්ලකට අදාළව සිදුකරන විමර්ශනයන් සඳහා ප්‍රකාශයක් සටහන් කරගැනීම සඳහාය.

චාමර සම්පත් දසනායක මහතා 2016 වසරේ දී රාජ්‍ය බැංකුවක පවත්වාගෙන ගිය ස්ථාවර තැන්පතු ගිණුම් කල්පිරීමට පෙර ඉවත්කර ගැනීමට කටයුතු කිරීමෙන් දුෂණයක් සිදුකර ඇතැයි සඳහන් කරමින් ඔහුට එරෙහිව යොමුකරන ලද පැමිණිල්ලක් මත මේ වනවිට විමර්ශන සිදුකරමින් පවතී.

ඊට අදාළව ඊයේ (10) දිනයේ දී විශේෂ ප්‍රකාශයක් රනිල් වික්‍රමසිංහ මහතා විසින් සිදුකර තිබුණු අතර, එමඟින් අල්ලස් හෝ දුෂණ චෝදනා විමර්ශන කොමිෂන් සභාව විසින් සිදුකරනු ලබන විමර්ශනයට අදාළ තොරතුරු රනිල් වික්‍රමසිංහ මහතා දන්නා බවටත් අදාළ විමර්ශනයට අදාළ සිද්ධියට යම් අවස්ථාවක මැදිහත් වී ඇති බවත් අල්ලස් හෝ දුෂණ චෝදනා විමර්ශන කොමිෂන් සභාව සඳහන් කරයි.

ඒ අනුව අදාළ ප්‍රකාශයෙන් රනිල් වික්‍රමසිංහ මහතා කළ කරුණු තහවුරු කරගැනීමට අදාළ ලේඛන සමඟ අප්‍රේල් මස 17 වනදා උදෑසන 9.30ට අල්ලස් කොමිසම වෙත පැමිණෙන ලෙස දැනුම්දී ඇත.

සබැඳි පුවත්

අමෙරිකාව විසින් චීනයට එරෙහිව පනවන ලැබූ අතිවිශාල තීරු බද්දට ප්‍රතිචාර ලෙස චීනය ද අද (11) ප්‍රතිචාර දක්වා ඇත.

ඒ අනුව අමෙරිකානු භාණ්ඩ සඳහා චීනය පනවා තිබූ තීරු බද්ද අද 125% දක්වා ඉහළ නංවා තිබේ.

අමෙරිකානු ආනයන සඳහා චීනය මීට පෙර 84% ක තීරු බද්දක් පනවා තිබුණි.

චීනයට එරෙහිව පැනවූ තීරු බදු සම්බන්ධයෙන් පැහැදිලිකිරීමක් සිදුකරමින් ධවල මන්දිරය ඊයේ (10) ප්‍රකාශ කළේ, චීන ආනයන මත පැන වූ සමස්ත තීරු බද්ද 145%ක් වන බවයි.

ඊට ප්‍රතිචාර ලෙස චීනය අද මෙම නව බදු ප්‍රතිශතය ප්‍රකාශයට පත්කර ඇත.