ඇල්පිටිය ප්‍රදේශයේදී 17 හැවිරිදි තරුණියක් ඝාතනය කිරීමේ සිදුවීමට පෙර ඇයව පැහැරගත් බවට පැවසෙන තිරෝද රථය සහ එහි රියදුරු පොලීසිය විසින් අත්අඩංගුවට ගෙන තිබේ.

විමර්ශන සිදුකරමින් පැවති අතරතුර සැකකාර තිරෝද රථ රියදුරු කරන්දෙණිය පොලීසිය වෙත භාරවීමෙන් අනතුරුව මෙලෙස අත්අඩංගුවට ගෙන ඇත.

සැකකාර ත්‍රිරෝද රථ රියදුරු එහිදී පොලීසිය වෙත පවසා ඇත්තේ තමන් කුලී පදනමට එම ගමන ගිය බවත් පසුව අදාළ පුද්ගලයා සහ තරුණිය නානායක්කාර මාවත ආසන්නයේදී බස්සවා ගිය බවත්ය.

එම තරුණිය තම දෙමව්පියන් සමග තල්ගහවත්ත, කරන්දෙනිය ප්‍රදේශයේ පදිංචිව සිට ඇති අතර ඇයගේ වැඩිමහල් සහෝදරියගේ ස්වාමි පුරුෂයා සමග අනියම් සම්බන්ධතාවක් පවත්වා ඇති බව පොලීසිය පවසයි.

මරණකාරිය සහ සැකකරු දැනට මාස කිහිපයකට පෙර සිට ඇල්පිටිය ප්‍රදේශයේ කුලී නිවසක එකට ජීවත්න ඇති බවට විමර්ශනයේදී අනාවරණ වී ඇත.

දෙදෙනා අතර ඇතිවූ ආරවුලක් හේතුවෙන් එම තරුණිය නැවත තම මව සිටින නිවසට පැමිණ සිට ඇති අතර පසු දිනක අනියම් සම්බන්ධතාවය පැවැත්වූ පුරුෂයා විසින් බැන තර්ජනය කිරීමක් සම්බන්ධයෙන් පසුගිය 04 වැනිදා කරන්දෙණිය පොලිස් ස්ථානය වෙත ගොස් පැමිණිල්ලක් සිදුකර තිබුණි.

එම පැමිණිල්ල විභාගය සඳහා 08 වැනිදා පොලිස් ස්ථානයට යමින් සිටියදී සැකකරු තවත් කිහිපදෙනෙකු සමග ත්‍රිරෝද රථයකින් පැමිණ තල්ගහවත්ත ප්‍රදේශයේදී ඇයව පැහැරගෙන ගොස් ඇති බව පැවසේ.

එම තරුණිය පැහැර ගත් සැකකරු විසින් මෙම ඝාතනය සිදුකර ඇති බවට පොලිසිය විසින් සැකකරනු ලබන අතර ඔහු මේ වනවිට ප්‍රදේශයෙන් පළාගොස් ඇත.

සිද්ධිය සම්බන්ධයෙන් ඇල්පිටිය හා කරන්දෙණිය පොලීසිය වැඩිදුර විමර්ශන සිදුකරයි.