ඉන්දියාවේ තිරුචිරපල්ලි දෙමළ සරණාගත කඳවුරේදී මත්ද්‍රව්‍ය සහ අවි ජාවාරමේ යෙදෙමින් දෙමළ ඊළාම් විමුක්ති කොටි ත්‍රස්තවාදී සංවිධානයේ ක්‍රියාකාරකම් වලට නැවත පණ දීමට උත්සාහ කළ ශ්‍රී ලාංකිකයන් නව දෙනකු අත් අඩංගුවට ගත් බව ඉන්දියානු ජාතික විමර්ශන ඒජන්සිය ප්‍රකාශ කර ඇත.
අත් අඩංගුවට ගත් සැකකරුවන්ගේ අනන්‍යතාවයන් හෙළි වී ඇති අතර ඔවුන් සී.ඥාණසේකරන් නොහොත් කිඹුලාඇල ගුණා,පුෂ්පරජා නොහොත් පූකුඩු කන්නා,මොහොමඩ් අසමින්,අලහප්පෙරුමග සුනිල් ගාමිණි ෆොන්සේකා,ස්ටැන්ලි කෙනඩි ප්‍රනාන්දු,ලඩියා චන්ද්‍රසේන,ධනුක රොෂාන්,වැල්ලේ සුරංග සහ තිලීපන් යන ශ්‍රී ලාංකිකයන් බව ඉන්දියානු බලධාරීහු පවසා තිබේ.
සී.ඥාණසේකරන් නොහොත් කිඹුලාඇල ගුණා දෙමළ ඊළාම් විමුක්ති කොටි සංවිධානයට නැවත පණ දීමේ කුමන්ත්‍රණයේ ප්‍රධාන සැකකරුවෙකු බව ඉන්දියානු නිලධාරීන් ප්‍රකාශ කර ඇත.
එල්.ටි.ටි.ඊ සංවිධානයට නැවත පණ දීමේ අරමුණින් ඉන්දියාවේ සහ ශ්‍රී ලංකාවේ නීති විරෝධී අවි සහ මත්ද්‍රව්‍ය ජාවාරමේ යෙදෙන පාකිස්තානයේ අවි සහ මත්ද්‍රව්‍ය සැපයුම්කරුවකු වන හාජි සලීම් නම් ජාවාරම්කරු සමඟ එකතු වී කිඹුලාඇල ගුණා සහ පූකුඩු කන්නාගේ මත් ද්‍රව්‍ය ජාවාරම් කල්ලිය කටයුතු කිරීම සම්බන්ධයෙන් විමර්ශනය කරන බව ඉන්දියානු විමර්ශන ඒජන්සිය ප්‍රකාශ කර ඇත.
හාජි සලීම් ශ්‍රී ලංකාවට අවි සහ මත් ද්‍රව්‍ය ජාවාරම් කිරීමේ විශාලතම ජාලය පාකිස්තානයේ සිට ක්‍රියාත්මක කරන බව ඉන්දියානු ත්‍රස්ත විමර්ශන ඒකකයේ නිලධාරියකු පවසා තිබේ.
(ලංකාදීප)
