මාදම්පේ ප්‍රදේශයේ පිහිටි විශාල භූමි ප්‍රමාණයක සිදුකරන සිලිකා වැලි කැණීම් සම්බන්ධයෙන් ශ්‍රේෂ්ඨාධිකරණය විසින් පසුගිය ජූලි 15 වන දා ලබා දුන් නියෝගයට පටහැනිව කටයුතු කර ඇති පතල් කැණීම් හා භූ විද්‍යා කාර්යාංශයේ අධ්‍යක්ෂ ජනරාල්වරයාට එරෙහිව අධිකරණයට අපහාස කිරීමේ චෝදනාව යටතේ නීතිමය පියවර ගන්නා ලෙස ඉල්ලා පරිසර යුක්ති කේන්ද්‍රය ශ්‍රේෂ්ඨාධිකරණයට පැමිණිල්ලක් ගොනු කලේය.
එම සිලිකා වැලි කැණීම්වලට අදාළ ශ්‍රේෂ්ඨාධිකරණයට හමුවේ ගොනුකර ඇති මූලික අයිතිවාසිකම් පෙත්සම කැඳවූ අවස්ථාවේදී එම තත්ත්වය පවත්නා තත්ත්වයෙන් පවත්වාගෙන යෑමට පියවර ගන්නා ලෙසට ශ්‍රේෂ්ඨාධිකරණය නියෝගයක් කර තිබියදීත් පතල් කැණීම් හා භූ විද්‍යා කාර්යාංශයේ අධ්‍යක්ෂ ජනරාල්වරයා විසින් නව වැලි ප්‍රවාහන බලපත්‍ර කිහිපයක් නිකුත් කර ඇති බව පරිසර යුක්ති කේන්ද්‍රය එමගින් පෙන්වා දී තිබුණි.
එම පැමිණිල්ල ඊයේ (11) එස්. තුරෙයිරාජා හා ශිරාන් ගුණරත්න යන විනිසුරු මඬුල්ල හමුවේ කැඳවන ලදී.
වගඋත්තරකාර පාර්ශ්වයට එම පැමිණිල්ලට අදාළ නොතීසි මේ දක්වා ලැබී නොමැති බවත් නොතීසි ලැබුණු පසුව අදාළ තොරතුරු ලබා ගෙන කරුණු දැක්වීමට දින ලබා දෙන ලෙසත් නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජනරාල් ඡායා ශ්‍රී නම්මුණි විනිසුරු මඩුල්ලෙන් ඉල්ලා සිටියේය.
ඒ අනුව, වගඋත්තරකාර පාර්ශ්වවලට නොතීසි නිකුත් කිරීමට පියවර ගන්නා ලෙසට පෙත්සම්කාර පාර්ශ්වයට නියෝග කළ විනිසුරු මඩුල්ල පතල් කැණීම් කාර්යාංශයේ අධ්‍යක්ෂ ජනරාල්වරයාට එරෙහිව ගොනුකර ඇති චෝදනා සලකා බැලීම සඳහා ලබන ජනවාරි 20 වනදා එම නඩුව යළි කැඳවීමට නියෝග කලේය.
මාදම්පේ ප්‍රදේශයේ ග්‍රාමසේවා වසම් නවයක සිලිකා වැලි කැණීම් 40ක් පවතින බව ත් අක්කර 200ක පමණ භූමි ප්‍රමාණයක් පුරා විහිදී ඇති එකී නීති විරෝධී වැලි කැණීම් නිසා විශාල පාරිසරික හානියක් සිදුවන බවත් පෙන්වා දෙමින් පරිසර යුක්ති කේන්ද්‍රය මින් පෙර ශ්‍රේෂ්ඨාධිකරණය මූලික අයිතිවාසිකම් පෙත්සමක් ගොනුකර තිබූ අතර එකී නීති විරෝධී ක්‍රියාදාමයන් වළක්වන නියෝගයක් මධ්‍යම පරිසර අධිකාරිය භූ විද්‍යා හා පතල් කැණීම් කාර්යාංශය ඇතුළු බලධාරීන්ට නිකුත් කරනා ලෙසත් එමඟින් ඉල්ලා තිබුණි.
ජ්‍යෙෂ්ඨ නීතිඥ ආචාර්ය රවින්ද්‍රනාත් දාබරේ මහතා පරිසර යුක්ති කේන්ද්‍රය වෙනුවෙන් පෙනී සිටියේය.
