ඉකුත් වසරේ (2024) ජනවාරි සිට මාර්තු මස දක්වා කාලය තුළදී ඔට්ටු හා සුරා බදු (Betting & Gaming Tax) වශයෙන් රුපියල් මිලියන 7,333ක් අය වූවද, මේ වසරේ (2025) එම කාලය තුළදී එම බද්දෙන් අයවී ඇත්තේ රුපියල් මිලියන 1,921ක් පමණක් බව දේශීය ආදායම් දෙපාර්තමේන්තුවේ තොරතුරු සඳහන් කරයි.

ඒ අනුව, ඉකුත් වසරේ ජනවාරි සිට මාර්තු මාසය දක්වා එම බද්දෙන් ලද ආදායමට වඩා මේ වසරේ එම කාලය තුළදී ලද ආදායම රුපියල් මිලියන 5,412කින් අඩුවී තිබේ. 

කෙසේ නමුත්, දේශීය ආදායම් දෙපාර්තමේන්තුව ඉකුත් වසරේ (2024) එම කාලය තුළ ලද සමස්ත බදු ආදායමට වඩා මේ වසරේ උපයාගෙන තිබෙන සමස්ත බදු ආදායම ඉහළ ගොස් ඇත.

ඉකුත් වසරේ එම කාලය තුළදී දේශීය ආදායම් දෙපාර්තමේන්තුව රුපියල් මිලියන 331,528ක බදු ආදායමක් උපයාගෙන ඇත. මේ වසරේ එම කාලය තුළදී උපයා ගන්නා ලද බදු ආදායම රුපියල් මිලියන 413,222ක් දක්වා ඉහළ නංවාගෙන තිබේ. 

මේ අනුව ඉකුත් වසරේ නියමිත කාලයට වඩා රුපියල් මිලියන 81,694 ක බදු ආදායමක් උපයාගෙන ඇත. මෙලෙස අදායම ඉහළ යාමට වැට් සහ ආදායම් බදු බලපා ඇතැයිද දේශීය ආදායම් දෙපාර්තමේන්තුවේ ආරංචි මාර්ග කියයි.

ඉකුත් වසරේ අදාළ කාලය තුළදී රුපියල් මිලියන 115,227 ක් වැට් බදු වශයෙන් අයකරගෙන ඇත. මේ වසරේදී එය රුපියල් මිලියන 167,080 ක් දක්වා රුපියල් මිලියන 51,853 කින් ඉහළ ගොස් ඇත.

කෙසේ නමුත් බැංකු තැන්පතු ආදියෙන් අය කරන බදු (Withholding Tax (WHT)/AIT) ආදායම ඉකුත් වසරේ අදාළ කාලයට සාපේක්ෂව පහත වැටී ඇත. 

ඉකුත් වසරේ අදාළ කාලය තුළදී එම බද්ද වශයෙන් රුපියල් මිලියන 26,040 ක් උපයා ඇතත්, මේ වසරේදී එය රුපියල් මිලියන 23,259 ක් දක්වා අඩුවී තිබේ.

මූලාශ්‍රය – අරුණ