ව්‍යාජ ලෙස සකස් කරන ලද පොහොර ගොවීන්ට වැඩි මිලට අලෙවි කළ පොලොන්නරුව, සිරිපුර ප්‍රදේශයේ මහා පරිමාණ ව්‍යාපාරික මධ්‍යස්ථානයක් වටලා, එහි කළමනාකාරවරයකු ඇතුළු සේවකයන් දොළොස්දෙනකු පොලොන්නරුව කොට්ඨාස විමර්ශන අංශය විසින් ඊයේ (14) අත්අඩංගුවට ගෙන ඇත.

දීර්ඝ කාලයක සිට නයිට්‍රජන් සියයට විසි එකක් (21%) පවතින පොහොර ඉතා අඩු මිලට ගෙනවිත්, සියයට හතළිස් හයක් (46%) නයිට්‍රජන් පවතින බව සඳහන් කර එම පොහොර බෑග්වල අසුරා ගොවීන්ට වැඩි මිලට අලෙවි කර ඇතැයි පැවසේ.

කලවම් කරන ලද පොහොර මිටි දහසකට ආසන්න සංඛ්‍යාවක්, පොහොර පටවා තිබූ ලොරි හතරක් සහ තවත් උපකරණ තොගයක් පොලොන්නරුව කොට්ඨාස විමර්ශන අංශය භාරයට ගෙන තිබේ.

මෙම ජාවාරම් සිදුකරන ප්‍රධාන සැකකරු ප්‍රදේශයෙන් පලාගොස් ඇති අතර, වැටලීම සිදු කරන අවස්ථාවේදී සේවකයන් එකොළොස්දෙනකු එම පොහොර මිශ්‍ර කරමින් සිටි බව එම විමර්ශන නිලධාරිහු පැවසූහ.

අත්අඩංගුවට ගත් මෙහි කළමනාකරු බව කියන පුද්ගලයා ඇඹිලිපිටිය ප්‍රදේශයේ පදිංචිකරුවකු වන අතර, පොහොර ඇසුරුම් කරමින් සිටි සේවකයන් මඩකලපුව සන්ධිවේලි ප්‍රදේශයේ පදිංචිකරුවන් බවද පොලිසිය සඳහන් කළේය.

වැඩි මිල සටහන් කරන ලද හිස් පොහොර මලු දෙදහකට ආසන්න සංඛ්‍යාවක්, පොහොර බෑග් මහන යන්ත්‍ර සහ මිල සටහන් කරන යන්ත්‍ර සූත්‍ර කිහිපයක්ද එම නිලධාරින් භාරයට ගෙන තිබේ.

මෙම ජාවාරම කරගෙන ගිය බව කියන ප්‍රධාන සැකකරු විසින් පෞද්ගලික පොහොර සමාගමකින් කිලෝ ග්‍රෑම් 50 මිටියක් රුපියල් පන්දහසක් වැනි මිලකට ලබාගෙන ඇත.

පසුව ඒවා අරලගංවිල, සිරිපුර, වැලිකන්ද ඇතුළු පොලොන්නරු දිස්ත්‍රික්කය පුරා සිටින ගොවීන්ට සහ අලෙවි නියෝජිතයන්ට බෙදා හැර තිබෙන බවද පොලිස් පරීක්ෂණවලදී හෙළිව තිබේ.

ඒ අනුව පොලොන්නරුව දිස්ත්‍රික්කයේ විශාල බිම් ප්‍රමාණයක වී වගාව සඳහා යල මහ දෙකන්නයේ බොහෝ ගොවීන් පිරිසක් කලක සිට යොදාගෙන ඇත්තේ මෙම ජාවාරම්කරුවාගෙන් ලබාගන්නා පොහොර බවත් ගොයම කහගැන්වී අස්වැන්න අඩුවීමට එය හේතුවක් වී ඇති බවට තොරතුරු හෙළිදරව් වී ඇති බවත් පොලිසිය පැවසීය.

මේ අතර මෙම මහා පරිමාණ ජාවාරම සඳහා ප්‍රධාන සැකකරු සමග තවත් කිහිපදෙනකු සම්බන්ධ වී ඇති බවට සැකකරන බව පොලොන්නරුව කොට්ඨාස අපරාධ විමර්ශන අංශය සඳහන් කළේය.

අදාළ සැකකරුවන් බී වාර්තාවක් මගින් පොලොන්නරුව මහෙස්ත්‍රාත් අධිකරණයට ඊයේ (14) ඉදිරිපත් කිරීමට නියමිතව තිබිණි.

මූලාශ්‍රය – අරුණ

මාර්ග අනතුරු අවම කිරිමට දැඩි නීති රීති ගෙන ඒමට අවශ්‍ය බව මහජන ආරක්ෂක අමාත්‍ය ආනන්ද විජේපාල මහතා පවසයි.

අමාත්‍යවරයා සඳහන් කළේ, දැනට තිබෙන නීතී රිති ද ශක්තිමත් කරන බවය.

අමාත්‍යවරයා පෙන්වා දෙන්නේ පවතින නීතී රිති පොලිස් නිලධාරින් විසින් නිසි ලෙස ක්‍රියාවට යෙදවිය යුතු බවයි.

පොලිස් නිලධාරීන් විසින් එම නීති රීති ක්‍රියාවේ යොදවන්නේ නැති අවස්ථා පිළිබඳව ද සොයා බලන බව අමාත්‍යවරයා විසින් සදහන් කරන ලදී.

කොත්මලේ බස් රථ අනතුර පිළිබද විමර්ශනය කිරිමට පත් කළ කමිටු වාර්තාව සති දෙකක් තුළ ලැබෙන බව අමාත්‍යවරයා පවසයි.

එම කමිටුව ජ්‍යෙෂ්ඨ නියෝජ්‍ය පොලිස්පති නීතීඥ අජිත් රෝහන මහතාගේ ප්‍රධානත්වයෙන් පත් කෙරිණි.

පළාත් පාලන ඡන්ද විමසීමේදී අතිරේක ලැයිස්තුවෙන් නම් කළ යුතු සභිකයන් සංඛ්‍යාව පක්ෂ හා කණ්ඩායම් ලේඛන ලබා දෙන පිළිවෙල අනුව එම නම් ගැසට් කරන බව මැතිවරණ කොමිෂන් සභාව සඳහන් කරයි.

ඒ අනුව එම ලැයිස්තු ලැබෙන පරිදි තේරි පත්වූ සභිකයන්ගේ නම් මැතිවරණ කොමිෂන් සභාව ගැසට් කරන බව මැතිවරණ කොමසාරිස් ජනරාල් සමන් ශ්‍රී රත්නායක මහතා පවසයි.

අතිරේක ලැයිස්තුවෙන් නම් කළ යුතු සභිකයන් සංඛ්‍යාව සහ කාන්තා නියෝජනය සිදුවිය යුතු ආකාරය කෙසේදැයි පක්ෂ ලේකම්වරුන්ට හා ස්වාධීන කණ්ඩායම් නායකයන්ට ලිඛිතව දැනුම් දී ඇති බවද  මැතිවරණ කොමසාරිස්වරයා විසින් පවසන ලදී.

මේ වන විට එම දේශපාලන පක්ෂ හා කණ්ඩායම් වලින් ඊට ලැබෙන ප්‍රතිචාරය යහපත් බව හෙතෙම වැඩිදුරටත් පැවසීය.

පළාත් පාලන ආයතන සභා ජුනි 2 වන දා වන විට ආරම්භ කිරීමට හැකි වන පරිදි මැතිවරණ පවත්වා තම කාර්යභාරය අවසන් කළ යුතු බව මැතිවරණ කොමසාරිස්වරයා පැවසීය.

දේශපාලන පක්ෂ හා ස්වාධීන කණ්ඩායම් ලබාගත් ඡන්ද සංඛ්‍යාව අනුව ලැයිස්තුවෙන් තේරී පත්වූ සභිකයන්ගේ නම් දින 07ක් ඇතුළත එවන්නැයි මැතිවරණ කොමිසම දැනුම් දී ඇති බව ඔහු වැඩිදුරට ත් සඳහන් කළේ ය.

මූලාශ්‍රය – මව්බිම